Santiagos 3
3
Nem tsun
1Vojity yụ, jam raꞌ daiꞌ yuꞌti jịꞌchiyacsity miꞌin. Chịj miꞌin muꞌ Jenꞌ dadamꞌ raꞌ fer mujuꞌchaꞌ jịꞌcäts yuꞌsinꞌ junꞌ chuc bäꞌjaꞌ tsun jịꞌchiyacsejaty tsun, jam jeñej yoctyiꞌ anicjetety in. 2Jeshaꞌ anicjejaty Jenꞌ räj mọꞌyaꞌ cäj cạjaꞌ tsun. Muꞌ na jam cäj cạiꞌtyiꞌ p̂eyacdyeꞌ muꞌ, muꞌ meꞌtyity anic rụij bäꞌyi, chịj bächäqui ĉụiꞌsiꞌ aꞌ muꞌ räjtumdye nem muꞌ. 3Meꞌdye muꞌin chimeꞌ cavayo in, yụꞌtyeyeyac jiꞌdyäcaqui chụꞌĉan muꞌin paj qui tupuj joꞌmesyaꞌ chäquisinꞌ in. Meꞌ tsanꞌ därsiꞌ jebacdyeꞌ, joꞌmesyaꞌ tupuj bächäc. 4Meꞌdye chimeꞌ muꞌ marĉantyiꞌ covamba, meꞌ tsanꞌ jiyi därtyiꞌ muꞌ, meꞌ tsanꞌ fertyiꞌ tyiꞌmu jácati, mọꞌ qui namꞌ miquis jịꞌchuiꞌtaquis muꞌ, mọꞌ tupuj bächäte junanaj chuc mạꞌjeꞌ jịjcaij muꞌ bächätety. 5Meꞌdye chimeꞌ nem tsun, meꞌ tsanꞌ miquis aꞌsiꞌ jedyeꞌ mọꞌ, därsiꞌ qui namꞌ shupquiꞌ ferdyeꞌ meꞌchuiꞌ, carij bächäc jeñej miquis adyeꞌ tupuj jiꞌcoꞌshayeꞌ därsiꞌ däräꞌ.
6Rụijdye meꞌ, chụꞌĉansiꞌ nem tsun jeñej buꞌyiꞌ ac̣hiꞌtacsis tŝij. Aꞌc̣hisyaꞌ p̂eyacdyeꞌ tsun, mọꞌyaꞌ ac̣hiꞌtaĉaꞌ räj dyijyedyeꞌ tsun judyeyaꞌ aꞌ tsun. Sọyoꞌyaꞌ shupquiꞌ ferdyeꞌ nemsiꞌ tsun, räjenꞌ dyijyedyeꞌ muntyis muꞌin ac̣hiꞌtacsebiꞌ. 7Jeshaꞌ, jụꞌñis ĉụiꞌ mọmoꞌ jebacdyeꞌ in tupuj cuꞌdyetucsejaꞌ muntyiꞌ tsun, paj tsanꞌ vajedyedyeꞌ jụijyaꞌ, judyeyaꞌ jaijtyiꞌ, judyeyaꞌ nas judyeyaꞌ ojñiꞌĉansiꞌ chimeꞌ in, jụꞌñis ĉụiꞌ mọmoꞌ tupuj cuꞌdyetuc in. 8Mọꞌ qui namꞌ nem tsun jam tyi tupuj jiꞌdyäquibusinꞌ in, yejĉoiꞌ mọmoꞌ jiꞌshupqueꞌ aꞌc̣his p̂eyacdyeꞌ, jeñej venenotumsiꞌ meꞌ buꞌyiꞌ p̂eyacdyeꞌ tsun. 9Nemyaꞌ tsun timaꞌqueja Jenꞌ, chịmoꞌyaꞌdye nemyaꞌ tsun ñinacsejaꞌ muntyiꞌ in jämꞌtacsity Jenꞌ, yódyeijdyemꞌ muꞌ u, joꞌmeij jämꞌtacsi.#3:9 Génesis 1:26 10Ĉụiꞌsiꞌyaꞌ nem tsun tupuj jiꞌshupquejaꞌ jämꞌsiꞌ timaꞌcacdyeꞌ judyeyaꞌ aꞌc̣his ñinacsedyeꞌ chimeꞌ, meꞌ meꞌ jiꞌshupquejaꞌ. Vojity, jam mọꞌ jämꞌ joꞌmes. 11¿Vaj meꞌ buty shupquiꞌ yiriꞌyaꞌ yirisĉan noria jämꞌsiꞌ ojñiꞌ judyeyaꞌ aꞌc̣his? Jam junꞌ. 12Meꞌdye chimeꞌ cätidyeꞌ in, mọꞌ cätidyeꞌ higuera jam junꞌ jiꞌshupqueꞌ orivo in, judyeyaꞌ ova chimeꞌ jam junꞌ jiꞌshupqueꞌ higo in. Jeñej yirity jijmoꞌmoj aꞌc̣hity jam junꞌ tupuj jiꞌshupqueꞌ jämꞌsiꞌ ojñiꞌ. Meꞌ raꞌ tsun chimeꞌ jam raꞌ tupuj jiꞌshupquejaꞌ aꞌc̣his p̂eyacdyeꞌ chụꞌĉan tsun.
Anicsis dyijyedyeꞌ
13Muꞌyaꞌ miꞌinĉantyiꞌ pạrej muntyiꞌ anic dyijyedyeꞌtumtyiꞌ jụijyaꞌ ĉúti, jemoñeꞌ rụij bäꞌyi, paj jam vaꞌbunyedyeꞌtum bäꞌyi. Meꞌ bäꞌyi jụijyaꞌ muꞌ, mọꞌyaꞌ raꞌ tupuj chị́yete yoctyiꞌ in anic dyijyedyeꞌtumtyiꞌ muꞌ. 14Jam meꞌ jụijyaꞌ miꞌin, ĉụiꞌ mọmoꞌ dyijtuti jụijyaꞌ miꞌin judyeyaꞌ jịꞌfajquiyitidyeij jedyeꞌ jụijyaꞌ miꞌin, jam raꞌ vaꞌbunyi miꞌin mijam raꞌ yi miꞌin: "Tsun nash mujuꞌchaꞌ dyijyedyeꞌtumtyiꞌ muntyiꞌ." Meꞌ jụijyaꞌ yi miꞌin chäcdyis väñädyeꞌ shupquiꞌ miꞌin. 15Mọꞌ nash dyijyedyeꞌ jam Jenꞌsiꞌ muꞌ, muntyis mọmoꞌ muꞌin, jacches, Sọyos dyijyedyeꞌ mọꞌ, 16mọꞌdyes qui ĉụiꞌ dyijtutiĉaꞌ jụijyaꞌ, jiꞌfajquiyitiĉaꞌ jedyeꞌ jụijyaꞌ, meꞌ jụijyaꞌ tsun, aty raꞌ chutiĉaꞌ bäꞌjaꞌ tsun, anic qui raꞌ yịjyi aꞌc̣his cạjaꞌ. 17Jam muꞌin meꞌ in muꞌin meꞌchuptety Jenꞌsiꞌ dyijyedyeꞌ in, muꞌin yedyej rụijsis dyijyedyeꞌ meꞌchuiꞌtyiꞌ in, jämꞌjiti bäꞌyi in, judyeyaꞌ jämꞌyedyeꞌtum bäꞌyi in, judyeyaꞌ seꞌvitidyeij in, judyeyaꞌ chimeꞌ ñịbeꞌ ĉọcsi in judyeyaꞌ nọ́tyetacsi yoctyiꞌ in. Chimeꞌdye muꞌin vaj cäts cạvacsi muntyiꞌ in, mijam fibiꞌnacdyeꞌtum bäꞌyi in, meꞌ buꞌyi muꞌin bäꞌyi in muꞌin Jenꞌsiꞌtum dyijyedyeꞌ bäꞌyity in. 18Dyijtujaꞌ jämꞌjitidyes tsun, paj qui jiꞌjämꞌ yụꞌtacsejaꞌ muntyiꞌ in, meꞌ raꞌ chat rụij bäꞌyi muntyiꞌ in.
Currently Selected:
Santiagos 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
