Isaías 53
53
1¿Tyidyemꞌ raꞌ anicjeꞌ in ọij p̂eyacdyeꞌ seꞌveꞌsiꞌ tsun?
¿Tyidyemꞌ raꞌ cạvepte in Ayoꞌsiꞌ ferdyeꞌ muꞌ?
2Mọꞌ dyijyedyeꞌ Ayoꞌsiꞌ muꞌ paj qui úñity muꞌ p̂añi muꞌsiꞌyaꞌ vej muꞌ,
yojdyemꞌ miquis cätidyeꞌ o chịbiꞌsiꞌ chañesĉan jac.
Jam jämꞌtyiꞌ ĉọ́jaꞌ muntyiꞌ tsun,
mijam fer buꞌyity ĉọ́jaꞌ tsun.
3Muntyiꞌ in äcäijjete in,
judyeyaꞌ vaꞌquecte in.
Anic ñịbeꞌ bäꞌyi muꞌ,
där ñịbedyes jịꞌĉojtyeꞌ muꞌ.
Yéjaꞌ tsun:
"Mijam raꞌ cạveja uts, jedyedyetydyemꞌ muꞌ."
4Tsundyes jịꞌĉojtyeꞌ ñịbedyes,
judyeyaꞌ tsundyes jịꞌĉojtyeꞌ areꞌredyeꞌ chimeꞌ.
Tsun na jam chị́jaꞌ,
jeñej ĉụiꞌsidyes juchaj muꞌ ĉọ́jaꞌ,
muꞌ Jenꞌ soꞌmete vaꞌtacdyeꞌ,
meꞌ ĉọ́jaꞌ tsun,
jeñej ĉụiꞌsidyes juchaj vaꞌtacdyeꞌ jasoꞌmiti,
meꞌ ĉọ́jaꞌ tsun.
5Tsunsidyes na jiquej mọꞌ juchaj meꞌte areꞌte in,
tsunsidyes ac̣hiꞌyedyeꞌ siꞌbete in.
Mọꞌ vaꞌtacdyeꞌ jịꞌĉojtyes muꞌ,
mọꞌ jiꞌchäĉujsinꞌ,
mọꞌ areꞌredyeꞌ jịꞌĉojtyeꞌsiꞌ muꞌ,
mọꞌ jiꞌc̣honsinꞌ tsun.
6Tsun jeñej buꞌjaꞌ moñis oveca,
ĉụiꞌsiꞌyaꞌ dyijyedyeꞌ tsun junanaj ĉụiꞌ jịjcajaꞌ.
Muꞌ Ayoꞌ jịꞌtŝoyete juchaj tsun räjenꞌsiꞌ tsun,
muꞌ vaꞌtacdyeꞌ jasoꞌmiti tsundyesiꞌ.
7Meꞌ tsanꞌ meꞌ ñịbeꞌte in,
uts na jam fạraꞌjeĉunacsi,
mijam jätäjyi,
jeñej yiris oveca cạc ijacdyes,
meꞌ muꞌ c̣huꞌc̣huij.
Jeñej yiris oveca täꞌtsetacsiꞌ fin mọꞌ,
meꞌdye muꞌ jam jätäjyi.
8Anic cäj yụꞌtyeyete p̂eyacdyeꞌ in jiꞌijacdyedyes muꞌ,
mijam tyi ñutsjetyete in,
aty ijate in,
muntyidyes juchaj ijac yụ́tyidyes muntyiꞌ in.
9Rudyuꞌjeyac yóyaꞌdyemꞌ ac̣hiꞌyity muntyiꞌ u,
yódyemꞌ jedyeꞌtumtyiꞌ muntyiꞌ u,
meꞌ buꞌyi rudyuꞌjeyac muꞌ.
Meꞌ tsanꞌ jam juchaij muꞌ,
mijam yiris väñädyeꞌ p̂eyeꞌ muꞌ, uts na meꞌjete in.
10Ayoꞌsiꞌyaꞌ dyijyedyeꞌ muꞌ yi paj qui meꞌ ñịbedyes jịꞌĉojtyeꞌ muꞌ,
ĉaĉaij na muntyidyes ijac muꞌ,
paj qui muꞌ Ayoꞌ vayacjeyacsebi juchaj muꞌin.
Chat qui raꞌ yejĉoij tsạꞌ buꞌban muꞌ,
cạvaqui raꞌ ạvaꞌ muꞌ,
muꞌ raꞌ jịꞌcätsepte Ayoꞌsiꞌ dyijyedyeꞌ muꞌ.
11Jiꞌcajñeꞌ därsiꞌ ñịbedyes muꞌ,
muꞌ rụijtyity Úñity Ayoꞌtyiꞌ,
chat qui raꞌ maꞌjoban muꞌ,
chịj raꞌ muꞌ jam fibidyes ñịbedyes muꞌ,
muꞌ raꞌ rụij yụꞌtacsi vayacjeyacsebi juchaj muꞌin daiꞌtyiꞌ muntyiꞌ in,
ĉaĉaij na muꞌ cạcsebi räj juchaj muꞌin.
12Mọꞌdyes Jenꞌ raꞌ fer buꞌyi yụꞌte,
ayoꞌbuꞌyi raꞌ yụꞌte muꞌ,
ĉaĉaij na muꞌ ĉụiꞌ jiꞌsästi paj qui säñi muntyidyes in.
Yódyemꞌ ac̣hiꞌyity muntyiꞌ u, meꞌ ijac muꞌ,
cạcsebi juchaj daiꞌtyis muntyiꞌ in muꞌindyes säñi muꞌ,
judyeyaꞌ cọdyete Jenꞌ juchajtumtyidyes muntyiꞌ in.
Currently Selected:
Isaías 53: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
