Hebreodyes 1
1
Jenꞌtyiꞌ Ạvaꞌ muꞌ jiꞌjiyisinꞌ Jenꞌsiꞌ p̂eyacdyeꞌ muꞌ
1Urucyaꞌ jiquej daiꞌ quiꞌ muꞌ Jenꞌ yụꞌtyeyeyacsi p̂eyacdyeꞌ muꞌ vóshiꞌvun tsun jiquej in, yịjyi p̂eyacdyeꞌ soꞌmacsi jiquej muꞌin jasoꞌmitity p̂eyacdyeꞌ muꞌ, chat muꞌin qui jiꞌjiyeyacsi muntyiꞌ in. 2Q̂uinꞌ chat ọij jadyiquis tupudyeꞌ muꞌ Jenꞌ ĉụiꞌtyiꞌyaꞌ Ạvaꞌ muꞌ yuꞌtyiyisinꞌ p̂eyacdyeꞌ muꞌ. Ạvaꞌtum muꞌ, muꞌ Jenꞌ räj ọij jämꞌtyeꞌ jac judyeyaꞌ mạyedyeꞌ, judyeyaꞌ yụꞌtaqui Ạvaꞌ muꞌ, muꞌ qui räj meꞌchuiꞌ jedyeꞌ. 3Jenꞌtyiꞌ Ạvaꞌ muꞌ jeñej buꞌyi Jenꞌsiꞌ queptacdyeꞌ muꞌ, muꞌ meꞌchuptety därsiꞌ ferdyeꞌ muꞌ judyeyaꞌ mạijquedyeꞌ muꞌ. Chimeꞌdye muꞌ Ạvaꞌ muꞌ fersiꞌyaꞌ p̂eyacdyeꞌ muꞌ räj bächäcsi jac judyeyaꞌ mạyedyeꞌ. Muꞌ c̣hiconꞌjityitacsinꞌ juchaj tsun, chat qui mạyedyeꞌcheꞌ jịjcaban, muꞌcheꞌ bäꞌban tacve buꞌyi mujuꞌchatyyaꞌ Jenꞌ.
Jenꞌtyiꞌ Ạvaꞌ muꞌ mujuꞌchaꞌ buꞌyi, uyaꞌyaꞌ anjer in
4Jenꞌtyiꞌ Ạvaꞌ muꞌ mujuꞌchaꞌ shupqui, uyaꞌyaꞌ qui muꞌin anjer in. Anic mọjoꞌchas tịj jayuꞌtyiyiti Jenꞌ, Ạvaꞌ, jéyaqui, muꞌinsiꞌ na tịj anjersiꞌ in ọyaꞌyaꞌ muꞌin.
5Muꞌ Jenꞌ mijam yirity anjer jéte:
"Mi nash Ạvaꞌ yụ,
q̂uinꞌ aty ạvatuye",#1:5 Mateos 3:17
jam jéyacsi anjer in. Yocsiꞌ sánacdyeꞌ yiꞌ:
"Yụ raꞌ Jenꞌ muꞌ,
judyeyaꞌ muꞌ raꞌ Ạvaꞌ yụ", yiꞌ sánacdyeꞌ.
6Yocsiꞌ sánacdyeꞌ chimuꞌdye p̂eijbite Ạvaꞌ muꞌ. Muꞌ Jenꞌ aty raꞌ jutaquiyaꞌ muꞌ tạꞌcaty Ạvaꞌ muꞌ paj qui úcheꞌ jaccheꞌ jijtuij, yi muꞌ:
"Paj timaꞌquete in räj muꞌin Jenꞌtyiꞌ anjer muꞌ", yiꞌ sánacdyeꞌ.
7Chimeꞌdye muꞌ Jenꞌ jiꞌjäcacsi anjer in yi muꞌ:
"Jenꞌ yụꞌtacsi anjer in úñity buꞌyi mọmoꞌ in,
jeñej buꞌyi qui namꞌ tyiꞌmu in,
judyeyaꞌ tŝij buꞌyi in, meꞌ buꞌyi yụꞌtacsi."
8Muꞌ na Ạvaꞌ muꞌ yocvedye p̂eijte jéyaqui:
"Jam raꞌ jụꞌñisĉan mạyedyeꞌ mọtsiꞌ ayoꞌbuꞌyedyeꞌ mi,
mi nash anictyity Jenꞌ anic rụij ayoꞌbuꞌyi mi,
mijam méquiꞌ cäjsis dyijyedyeꞌ meꞌchuiꞌ mi," jéyaqui Ạvaꞌ muꞌ.
9"Mi anic fer maꞌjotyeꞌ mọꞌ rụijsis dyijyedyeꞌ,
mọꞌ na aꞌc̣his dyijyedyeꞌ in fạ́cacsim,
jam mọꞌ maꞌjotyeꞌ mi,
mọꞌdyes muꞌ Jenꞌ Ayoꞌ mítyiꞌ muꞌ tsimꞌtyin mi judyeyaꞌ maꞌjodyeꞌ soꞌmin,
mujuꞌchaꞌ muꞌ yuꞌtyin,
penꞌdyeꞌ na mi, uyaꞌyaꞌ muꞌin in.
10Chimeꞌdye muꞌ Jenꞌ yi jéyaqui Ạvaꞌ muꞌ:
"Mi Ayoꞌ, tashcheꞌ jiquej jämꞌtyeꞌ mi ọij jac jiquej,
chimeꞌdye mạyedyeꞌ jämꞌtyeꞌ mi.
11Mọꞌ raꞌ räj mọtsiꞌ,
mi na raꞌ jam jụꞌñisĉan mạyedyeꞌ mọtsiꞌ.
Jac judyeyaꞌ mạyedyeꞌ mọꞌin ramꞌ ishoiꞌ in,
yojdyemꞌ quịꞌsiꞌ tạbaijtyiꞌ u,
meꞌjoiꞌ raꞌ mọꞌin ac̣hiꞌjoiꞌ in.
12Yojdyemꞌ yirity muntyiꞌ vaꞌcajquiqui tạbaty quịꞌsiꞌ u,
mụiꞌtyityĉan qui quịꞌsiꞌ cäbun,
meꞌdye raꞌ chimeꞌ ọij jac judyeyaꞌ mạyedyeꞌ.
Mi na raꞌ jam jụꞌñisĉan mạyedyeꞌ mọtsi,
mi raꞌ yejĉoij,
mijam raꞌ junꞌ yocve shupqui mi", yiꞌ sánacdyeꞌ.
13Jenꞌ jam yirity anjer jéte meꞌdye Ạvamꞌ jéyaqui:
"Tacve buꞌyi raꞌ bäꞌyi yụ́yam,
junꞌ quiꞌ chuc yụ jiꞌpenbiye muꞌin fáquintyiꞌ in", jéyaqui Ạvaꞌ muꞌ.
14Jam meꞌ jéyacsi muꞌin anjer in ĉaĉaij na muꞌin úñity Jenꞌtyiꞌ in. Jenꞌ jämꞌtacsi anjer in ạꞌedyeꞌ buꞌyi in, paj qui muꞌin nọ́tacsi muntyiꞌ in, muꞌin c̣honꞌdyedyety raꞌ in.
Currently Selected:
Hebreodyes 1: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
