Exodo 9

Vaꞌtacdyeꞌ säñiꞌ cuꞌdyeꞌ in

1Ayoꞌ jajiti muꞌ Moisés:

—Ĉọcme muꞌ ayoꞌ jéte ram: "Yi muꞌ Jenꞌ, hebreoty Ayoꞌ muꞌin, muꞌ yi jin mi: Farajjeyacseva yụ́tyiꞌ muntyiꞌ in paj qui timaꞌquin yụ in. 2Jam raꞌ farajjeyacsi jụijyam, yejĉoij nọ́csiyaꞌ mi, 3Jenꞌ raꞌ quivij yụꞌtaqui ferdyeꞌ muꞌ, muꞌ raꞌ soꞌmibunac japacjodyeꞌ cuꞌdyeꞌ miꞌin. Säñiꞌ raꞌ cavayo in, judyeyaꞌ bórico in, cameyo in, vaca in judyeyaꞌ oveca in, räj raꞌ mọꞌin tyejoiꞌ in. 4Muꞌinsiꞌ na raꞌ cuꞌdyeꞌ Israeltyis vóshiꞌ muꞌ, mijam raꞌ yiris jedyeiꞌ säñiꞌ muꞌin", meꞌ raꞌ jéte mi muꞌ ayoꞌ —yi muꞌ Jenꞌ.

5Chimeꞌdye muꞌ Jenꞌ yụꞌtyeꞌ tupudyeꞌ vaꞌtacdyedyes, yi muꞌ:

—Nojno raꞌ mạyedyeꞌ yụ raꞌ meꞌ yụꞌtyeꞌ —yi jajiti Moisés. 6Anicdye meꞌ, nojno mạyedyeꞌ muꞌ Jenꞌ vaꞌtacdyeꞌ juteꞌ, säñiꞌ cuꞌdyeꞌ muꞌin Egiptoĉantyis in, muꞌinsiꞌ na in Israeltyis vóshiꞌ in mijam muꞌinsiꞌ yiris säñiꞌ in. 7Muꞌ ayoꞌ cavin jutacsi muntyiꞌ in paj qui cạvacsecbi in cuꞌdyeꞌ muꞌin Israeltyis vóshiꞌ muꞌin, chị́qui mijam yiris säñiꞌ cuꞌdyeꞌ muꞌin. Meꞌ tsanꞌ meꞌ yejĉoij qui namꞌ yäcäjyi ĉojtyiꞌ muꞌ, tacaꞌdye jam farajjeyacsi muꞌin Israeltyiꞌ vóshiꞌ muꞌ.

Vaꞌtacdyeꞌ ñäpdyeꞌ

8Ayoꞌ jajiti Moisés Aaróntum:

—Poc̣hocjetacac jornoĉansiꞌ chim, chat qui raꞌ ĉọctinte muꞌ ayoꞌ. Muꞌsiꞌyaꞌ raꞌ vej muꞌ, muꞌ Moisés cheꞌve vaꞌquequeꞌ mọꞌ chim. 9Yoquiꞌ buꞌyiꞌdyemꞌ ọij Egipto o, paj meꞌquiꞌ buꞌyiꞌ raꞌ shupquiꞌ mọꞌ ñäpdyeꞌ, räj raꞌ cạiꞌ muntyiꞌ in judyeyaꞌ cuꞌdyeꞌ chimeꞌ muꞌin, jam raꞌ yirity ñụiꞌjajiti.

10Anicdye meꞌ, muꞌ Moisés judyeyaꞌ muꞌ Aarón poc̣hocjetaque chim jornoĉansiꞌ in, chat ĉọcte qui in muꞌ ayoꞌ. Muꞌyaꞌ muꞌ Moisés cheꞌve vaꞌquequeꞌ bucjeꞌ mọꞌ chim, räj vatyquej ñäpdyeꞌ játŝuti muntyiꞌ in judyeyaꞌ cuꞌdyeꞌ muꞌin chimeꞌ. 11Muꞌin na cọcojsiꞌ in jam muꞌin junꞌ ĉọcte Moisés in, paj qui tsanꞌ chimeꞌjeꞌdye in, ĉaĉaij na chimeꞌdye játŝuti ñäpdyeꞌ in yojdyemꞌ räj Egiptoĉantyiꞌ u in. 12Muꞌ na Jenꞌ jiꞌyäjqueptemꞌ ĉojtyiꞌ ayoty muꞌ, paj qui jam seꞌvacsebi p̂eyacdyeꞌ muꞌin Moiséssiꞌ judyeyaꞌ Aarónsiꞌ, rụijdye yi Ayoꞌ jiquej jajitaque.

Vaꞌtacdyeꞌ tsafaꞌ

13Chat qui muꞌ Ayoꞌ jajiti muꞌ Moisés:

—Nojno raꞌ mạyedyeꞌ pamꞌdye sacyi mi, ĉọcme muꞌ ayoꞌ jéte ram: "Muꞌ Jenꞌ Ayoꞌ muꞌin hebreoty in yi jin mi: Farajjeyacseva yụ́tyiꞌ muntyiꞌ in paj qui timaꞌquin yụ in, 14ĉaĉaij na raꞌ q̂uinꞌ räj vaꞌtacdyeꞌ yụs mícheꞌ raꞌ tŝọiꞌ, nọ́taquitycheꞌ mi judyeyaꞌ räj muntyiꞌcheꞌ mi, meꞌ raꞌ chịj mi jam tyi cätstyin yụ in úchety jacchety in. 15Yụ mạꞌjeꞌ jụijyaꞌ, tupuj yụ soꞌmeye japacjodyeꞌ jiquej, tupuj yụ c̣hiconꞌteyac miꞌin, räjtumdye muntyiꞌ mi, mijam raꞌ yirity rụiꞌcuꞌ jiꞌyajcati. 16Meꞌ tsanꞌ meꞌ yụ́dye qui namꞌ tsạꞌchuye jiquej, mạꞌjeꞌ jịꞌcaveyeye ferdyeꞌ yụ paj qui räj jacchety muntyiꞌ in chäyin yụ in yụ mujuꞌchaty. 17Meꞌ tsanꞌ meꞌ yejĉoij qui namꞌ vaꞌbunyi mi, mijam farajjibutiꞌ muntyiꞌ yụty mi. 18Mọꞌdyes nojno raꞌ mạyedyeꞌ yoquiꞌdyemꞌ q̂uinꞌ tsun u, yụ raꞌ jịꞌtŝote därmuntyiꞌ tsafaꞌ miꞌinyaꞌ. Muꞌ chat anic mujuꞌchaꞌ tsäquiꞌ tsafaꞌ, jam jeñej urucyaty tsafaꞌ jọꞌchaijtyiꞌ jiquej in úĉan Egiptoĉan in, uyaꞌyaꞌ muꞌin jiquej in. 19Jäꞌmij jiꞌsitaca acaꞌĉan vaca mi judyeyaꞌ jedyeꞌ chuc mọꞌyaꞌ mi, ĉaĉaij nash raꞌ muꞌ tsafaꞌ jam majmadyety, tas ramꞌ ijacsi jorojyaty muntyiꞌ in judyeyaꞌ cuꞌdyeꞌ miꞌin chimeꞌ", meꞌ raꞌ jétem muꞌ ayoꞌ Egiptoĉantyiꞌ —yi Ayoꞌ jajiti Moisés.

20Pạrej muꞌin nọ́taquity ayoty in anicjepte Jenꞌsiꞌ p̂eyacdyeꞌ in, noiꞌyi muꞌin in, mọꞌdyes qui jiꞌsitaqui in úñity muꞌin judyeyaꞌ cuꞌdyeꞌ muꞌin. 21Pạrej na in jam anicyi in, jam jiꞌsitaqui úñity muꞌin judyeyaꞌ cuꞌdyeꞌ muꞌin. 22Chat qui muꞌ Ayoꞌ jajiti Moisés:

—Mạyedyeꞌcheꞌ c̣họcoꞌjevaꞌ un mi paj qui tsafaꞌ jọꞌchaij mạyedyeꞌchety, paj muntyiꞌcheꞌ tŝọij judyeyaꞌ cuꞌdyeꞌcheꞌ muꞌin, judyeyaꞌ cätidyeꞌcheꞌ chimeꞌ Egiptoĉansiꞌ muꞌin.

23Meꞌdye muꞌ Moisés c̣họcoꞌjeyaqui un mạyedyeꞌcheꞌ. Muꞌ Ayoꞌ yụꞌte pururu venaꞌyaqui judyeyaꞌ fer pịrisyi, chat qui tsafaꞌ jọꞌchaij tsäquiꞌtyity. Yoquiꞌ buꞌyidyemꞌ Egipto o, meꞌquiꞌve buꞌyi jọꞌchaij, venaꞌyaquimꞌ jịjcaij, 24mijam méquiꞌ dyäcjetyeꞌ. Anic mujuꞌchaꞌ tyes tyeij jọꞌchaij tsafaꞌ, anic tsäquiꞌ tŝọij, jam jeñej urucyaꞌ jiquej Egiptoĉan. 25Vatyquej mọmoꞌ ac̣hiꞌtyeꞌ Egiptoĉansiꞌ jedyeꞌ, räj cä́tidyeꞌ in, räj chenꞌjeꞌ son, chimeꞌdye muntyiꞌ ijacsi judyeyaꞌ cuꞌdyeꞌ chimeꞌ in. 26Gosénĉan na jam tŝọij, yóĉandyemꞌ bäꞌyi u in Israeltyiꞌ vóshiꞌ muꞌin, mijam méquity muꞌĉan jọꞌchaij.

27Muꞌ Egiptoĉantyiꞌ ayoꞌ pärenꞌdye jiꞌvorvacsi Moisés judyeyaꞌ Aarón, jéyacsi:

—Anic juchaij yụ judyeyaꞌ muntyiꞌ in, jam Ayoꞌsiꞌ juchaj muꞌ. 28Cọdyemac Ayoꞌ tsundyes, paj meꞌquiꞌdye meꞌtaqui uts pururu, judyeyaꞌ tsafaꞌ, chat qui raꞌ yụ farajjeyac miꞌin —yi muꞌ ayoꞌ.

29Yi muꞌ Moisés vorjete:

—Aty raꞌ yụ shubanyaꞌ ọij bäꞌyedyeꞌ, quivij raꞌ c̣họcoꞌjeꞌ mạyedyeꞌcheꞌ un yụ, cọdyete raꞌ Ayoꞌ yụ. Chat qui raꞌ q̂uinꞌdyemꞌ dyäqui muꞌ pururu judyeyaꞌ muꞌ tsafaꞌ, meꞌ raꞌ chat chịj mi muꞌ Ayoꞌ meꞌchuiꞌ ọij jac. 30Meꞌ tsanꞌ meꞌ, yụ qui namꞌ chị́yeye junꞌ chuc mi jambiꞌ irijyi Jenꞌcheꞌ Ayoꞌcheꞌ tsun, mijam nọ́taquity chimeꞌ mi irijyi muꞌcheꞌ in —yi muꞌ Moisés jéte muꞌ ayoꞌ.

31Muꞌ quịꞌsidyety cä́tidyeꞌ lino judyeyaꞌ mọꞌ sicdyeꞌ cebada anic räj mọꞌ jaꞌac̣hiꞌti tsafaꞌ, ĉaĉaij na mọꞌ toptiꞌdyemꞌ cebada, judyeyaꞌ muꞌ lino aty muꞌ jámi. 32Muꞌ na trivo judyeyaꞌ muꞌ ceteno jam muꞌ junꞌ jaꞌac̣hiꞌti ĉaĉaij na muꞌ mụ́yi chịbi.

33Chat qui muꞌ Moisés shuban bäꞌyedyeꞌĉantyiꞌ, c̣họcoꞌjeꞌ mạyedyeꞌcheꞌ un muꞌ, cọdaqui qui Ayoꞌcheꞌ. Yiristum täts muꞌ tsafaꞌ judyeyaꞌ pururu judyeyaꞌ añej. 34-35Muꞌ na ayoꞌ aty cạveꞌ meꞌ, chat cuvij juchaij muꞌ, jämꞌ yäcäjyejoij ĉojtyiꞌ muꞌ judyeyaꞌ nọ́taquitytyiꞌ muꞌ. Uts na jam tacaꞌ farajjeyacsi Israeltyiꞌ vóshiꞌ muꞌ, rụijdye yi muꞌ Ayoꞌ jajiti Moisés jiquej.

Currently Selected:

Exodo 9: CAS

Highlight

Copy