Exodo 34
34
Mụiꞌtyity sánacdyeꞌtumtyiꞌ mij
1Ayoꞌ jajiti Moisés:
—Jaiꞌdacseva päräꞌ mij in, yódyedyeijdyemꞌ muꞌin tashchety jiquej u in muꞌin sánacdyeꞌtumtyiꞌ jiquej in, p̂etaijjeyacsity jiquej mi, yụ raꞌ quivij yụꞌbanꞌ mọꞌcheꞌ sánacdyeꞌ. 2Jäꞌmiiꞌtyeva nojno raꞌ pamꞌ úcheꞌ atsij mi jadyiccheꞌ uts mụcuꞌ Sinaí, yụ́siꞌyaꞌ raꞌ vej yuꞌti mi. 3Itŝij raꞌ tyi penꞌdyetun mi, mijam raꞌ tyi yoctyiꞌ mụcuꞌcheꞌ penꞌdyetun. Chimeꞌ mọꞌin cuꞌdyeꞌ in jam raꞌ jiꞌsäcsacsi in c̣hẹiꞌyaꞌ muꞌ mụcuꞌ.
4Chat qui muꞌ Moisés jaiꞌdacsi päräꞌ mij in yódyeijdyemꞌ muꞌin tashchety jiquej u in judyeyaꞌ pamꞌdye bojvete muꞌ mụcuꞌ. Unĉan muꞌ Moisés cạcsi muꞌin päräꞌ mij in yoj jajitidyemꞌ muꞌ Ayoꞌ jiquej u. 5Chat qui chạij muꞌ Ayoꞌ, dyicbaꞌbadyeꞌĉan jijtuij judyeyaꞌ runꞌquenꞌyi Moisésyaꞌ. Äjjajiti Ayoꞌ ĉụiꞌsiꞌyaꞌ tịj muꞌ. 6Muꞌ Jenꞌ jacaꞌñivaꞌti vejyaꞌ muꞌ Moiséssiꞌ äjquevaꞌjoij muꞌ. Yi muꞌ Jenꞌ:
—Muꞌ Ayoꞌ, muꞌ Ayoꞌ, muꞌ Jenꞌ jämꞌyity judyeyaꞌ ñịbeꞌjitidyestumtyiꞌ, jam cavin fạ́coijtyiꞌ, räjĉan mạꞌjitidyestumtyiꞌ judyeyaꞌ dyichyedyeꞌtumtyiꞌ. 7Muꞌ mạꞌjeyacsity junꞌtum mir rụiꞌcuꞌ in, judyeyaꞌ vayacjeyacsebi ac̣hiꞌtidyeꞌ muꞌin judyeyaꞌ juchaj muꞌin, paj tsanꞌ muꞌin jam chäquibuntyiꞌ p̂eyacdyeꞌyaꞌ in. Paj tsanꞌ meꞌ muꞌ raꞌ soꞌmacsi vaꞌtacdyeꞌ muꞌin juchajtumtyiꞌ in, chimeꞌdye muꞌintyiꞌ ạvaꞌ in judyeyaꞌ vịyaꞌ muꞌin judyeyaꞌ vóshiꞌ muꞌin —yi muꞌ Jenꞌ.
8Muꞌ Moisés dyụtsyi muꞌyaꞌ täjjequeꞌ jac jáfiyaꞌ judyeyaꞌ timaꞌquete Jenꞌ. 9Yi muꞌ Moisés:
—Meꞌ na jụijyaꞌ mísyaꞌ vej aty dạqueꞌ yụ mạꞌjitidyesyaꞌ mi, chat qui yụ cọdyeye paj qui mi penꞌdyetutiĉaꞌ tsun. Paj tsanꞌ uts muntyiꞌ in anic yäcäty ĉojtyiꞌ in, yụ cọdyeye paj qui mi vayacjibutiĉaꞌ ac̣hiꞌyedyeꞌ tsun judyeyaꞌ juchaj tsun, judyeyaꞌ mídyes yuꞌtiĉaꞌ tsun mi räjĉan —yi muꞌ Moisés.
10Yi muꞌ Jenꞌ jajiti:
—Q̂uinꞌ yụ yụꞌtyeyeyac p̂eyacdyeꞌ. Vejyaꞌ mity muntyiꞌ in yụ raꞌ jämꞌtyeyacsi äjyedyes muꞌin jam junꞌ jämꞌtacsis jiquej yụ yoctyiꞌyaꞌ jacchety muntyiꞌ in. Muꞌin muntyiꞌ in mítum bäꞌyity in anic raꞌ cạveꞌ in yụs äjyedyeꞌ jämꞌtyeyacsis raꞌ yụ. 11Jịꞌcätsibutiĉamꞌ yụs yụꞌtacdyeꞌ soꞌmeyacsi q̂uinꞌ chat qui raꞌ yụ meijjetyeyac muꞌin amorreo in, cananeo in, hitita in, fereseo in, heveo in judyeyaꞌ muꞌin jebuseo in. 12Ĉujcatiĉamꞌ jämꞌ miꞌin, jam raꞌ vaj meij yuꞌtyiyiti jämꞌsiꞌ p̂eyacdyeꞌ muꞌintum bäꞌyity in yóĉandyemꞌ raꞌ jịjcaij u miꞌin. Meꞌ jụijyaꞌ jämꞌsiꞌ p̂eyacdyeꞌ soꞌmitidyeij miꞌin vatyquej raꞌ jiꞌpeñinac in aꞌc̣hisyaꞌ dyijyedyeꞌ muꞌin. 13Jịvaꞌchacsebi raꞌ miꞌin muꞌinsiꞌ jiꞌcoꞌshayaquis jenꞌ buꞌyitydyes muꞌin. P̂etaijjeyacsebi raꞌ miꞌin mij muꞌintyiꞌ yụꞌtactyiꞌ in jenꞌ buꞌyitydyety in. Judyeyaꞌ pacsebi raꞌ miꞌin son timaꞌcacdyes mọꞌ jenꞌ buꞌyis Asera. 14Jam raꞌ junꞌ timaꞌcacsi jenꞌ buꞌyity in. Muꞌ Jenꞌ Ayoꞌ miꞌin tịj muꞌ dyijtunactyiꞌ, muꞌ nash muꞌ anictyity Jenꞌ judyeyaꞌ anic dyijtunactyiꞌ muꞌ.
15Ĉujcatiĉamꞌ jämꞌ miꞌin jam raꞌ vaj meij yuꞌtyiyiti jämꞌsiꞌ p̂eyacdyeꞌ muꞌintum bäꞌyity in yóĉandyemꞌ raꞌ jịjcaij u miꞌin. Ĉaĉaij na jämꞌdyeyaꞌ muꞌin jiꞌcoꞌshayaqui jenꞌ buꞌyitydyety muꞌin chat qui raꞌ muꞌin fayinac in paj qui penꞌdyetucsi joꞌmesyaꞌ judyeyaꞌ säcsi muꞌintum miꞌin jebeiꞌyaꞌ mọꞌ shush in soꞌmactyiꞌ jenꞌ buꞌyityyaꞌ in. 16Judyeyaꞌ chimeꞌ miꞌin raꞌ jiꞌvämaqui sonꞌ ạvaꞌ miꞌin muꞌinsiꞌcheꞌ ạvaꞌ muꞌin chat qui raꞌ mọꞌinmun timaꞌcacsiꞌ mọꞌintyiꞌ jenꞌ buꞌyity.
17Jam raꞌ jiꞌchintinte fiyero miꞌin paj qui jämꞌtacsi miꞌin jenꞌ buꞌyity in fiyeroyaꞌ.
Mọꞌin feshta in
18Jämꞌtiñeꞌ raꞌ mọꞌ feshta jam dujrity pan. Yävätidyeꞌ raꞌ mạyedyeꞌ jebetinte muꞌ pan jam jiꞌdujraquistumtyiꞌ miꞌin yoj jeyacdyemꞌ jiquej u. Jämꞌtiñeꞌ raꞌ mọꞌ feshta mọꞌ tupudyeꞌ yụꞌtac muꞌĉan ịvaj Abib ĉaĉaij na muꞌĉandye ịvaj shupĉan miꞌin Egiptoĉan jiquej.
19Räj muꞌin tashchety naꞌity in yụ́dyety raꞌ shupqui in. Chimeꞌ räj muꞌin tashchety sonꞌ naꞌity cuꞌdyeꞌ miꞌintyiꞌ yụ́dyety raꞌ shupqui. Paj tsanꞌ toro naꞌity, jam jụijyaꞌ oveca sonꞌ naꞌity in, jam jụijyaꞌ chivo sonꞌ naꞌity in. 20Muꞌ tashchety ạvaꞌ bóricoty, tupuj bóricodyes soꞌmetinte Jenꞌ yiris banꞌsis oveca, mọꞌyaꞌ raꞌ yaꞌityetinte banꞌtyity bórico. Jam meꞌ yaꞌityetinte jụijyaꞌ miꞌin, ijac raꞌ muꞌ bóricoty ạvaꞌ mọꞌ, ĉonꞌjetinte raꞌ miꞌin äcänꞌĉan. Räj tashchety ạvaꞌ miꞌin jemoñeꞌ yaꞌitac chimeꞌ in. Jam raꞌ dạ̈räꞌ jiꞌcaviti miꞌin yụ́syaꞌ vej.
21Jäbän raꞌ mạyedyeꞌ carijtaqui miꞌin. Mọꞌ qui namꞌ yävätidyeꞌyis mạyedyeꞌ jịꞌjutyiti raꞌ miꞌin, paj tsanꞌ tupudyeꞌ jäꞌmiiꞌtyidyes quịjodyedyes miꞌin, paj tsanꞌ vädacdyes tupudyeꞌ, mọꞌ chaꞌsheꞌyaꞌ yävätidyeꞌyis mạyedyeꞌ jịꞌjutyiti raꞌ miꞌin.
22Jämꞌtiñeꞌ ramꞌ mọꞌ feshta simanas aty intsiiꞌyaꞌ muꞌ tashchety trivo. Mọꞌ feshta jadyicves vädacdyeꞌ jämꞌtiñeꞌ raꞌ miꞌin jadyicve mọꞌ yómodyeꞌ. 23Chibin quiꞌ yirisĉan yómodyeꞌ räj Israeltyiꞌ vóshiꞌ sonꞌ in jemoñeꞌ jiꞌcaviti in Ayoꞌyaꞌ muꞌin, muꞌ Jenꞌ Israeltyiꞌ in. 24Yụ raꞌ meijjeyacsi räj muꞌin yoctyiꞌ muntyiꞌ in miꞌinyaꞌ, chat qui raꞌ dadamꞌ där shupquiꞌ mọꞌ jac miꞌinsiꞌ. Chimeꞌ itŝij tyi raꞌ dyijtubibunac jac miꞌin paj qui jictyibunac chutidyeꞌyaꞌ yoquiꞌdyemꞌ miꞌin u chibin quiꞌ yirisĉan yómodyeꞌ jiꞌcaviti miꞌin muꞌyaꞌdye Jenꞌ Ayoꞌ miꞌin.
25Soꞌmitiĉaꞌ jụijyaꞌ yiris jiꞌcoꞌshayacdyeꞌ judyeyaꞌ chäsh, jam raꞌ mọꞌdye tupudyeꞌ soꞌmitiĉamꞌ pan jiꞌdujraquistumtyiꞌ. Chimeꞌ mọꞌ jiꞌshucdyidyeꞌ shush mọꞌ feshta jiꞌc̣honacdyessiꞌ jam raꞌ jämꞌjetiñeꞌ mọꞌ nojnodyes.
26Tuiꞌ ram mọꞌ mọjoꞌchas mísiꞌ tashis vädacdyeꞌ Jenꞌsiꞌyaꞌ acaꞌ muꞌ. Jam raꞌ dyächtac muꞌ banꞌtyity chivo tseꞌsiꞌĉan reche.
Moisés sáñepte yụꞌtacdyeꞌ Jenꞌsiꞌ
27Ayoꞌ jajiti muꞌ Moisés:
—Sáñevaꞌ ọij q̂uinꞌ p̂eyacdyeꞌ, mọꞌ yụꞌtacdyeꞌ yụꞌtyeyeyes mi judyeyaꞌ räj Israeltyidyes vóshiꞌ in.
28Taccheꞌ mụcuꞌcheꞌ muꞌ Moisés Ayoꞌtum, vạjpedyeꞌ quiꞌtac mạyedyeꞌ, mijam jedyeꞌ damꞌjeꞌ muꞌcheꞌ. Muꞌ sáñeꞌ mijcheꞌ mọꞌ yụꞌtacdyes p̂eyacdyeꞌ Jenꞌsiꞌ muꞌ, mọꞌ yiriꞌtac yụꞌtacdyeꞌ Jenꞌsiꞌ muꞌ. 29Chat qui muꞌ Moisés chạban mụcuꞌchety Sinaíchety, päräꞌ mij jaiꞌdactyiꞌ tucseban, mọꞌcheꞌ sánac Jenꞌsiꞌ yụꞌtacdyeꞌ muꞌ, unĉan tucseban. Jam chịj anic na pashyaque vejyaꞌ jiquej p̂eyacdyeꞌyaꞌ Jenꞌtum. 30Muꞌ na Aarón räjtumdye muꞌin Israeltyiꞌ vóshiꞌ in cạvepte vej in, noiꞌyi in jam mạꞌjeꞌ ĉọshte in. 31Moisés fayacsi muꞌ Aarón judyeyaꞌ muꞌin tashcheꞌ buꞌyity in, muꞌin mọmoꞌ ĉọshte in chat qui muꞌ p̂eyaqui muꞌintum in. 32Q̂uinꞌdyemꞌ räj muntyiꞌ atsij in ĉọshte in. Muꞌ qui Moisés räj mọꞌ jéyacsi yụꞌtacdyeꞌ in jasoꞌmitis Ayoꞌ Sinaícheꞌ. 33Aty meꞌsiꞌ jéyacsiyaꞌ, méquivetyyaꞌ quịꞌsiꞌ vejyaꞌ busjiti.
34Moisés junꞌsiꞌ ĉụiꞌyaꞌ siti mọꞌ acaꞌ tinates Jenꞌsiꞌ muꞌ, muꞌ p̂eyaqui Ayoꞌtum, muꞌ meijjeyaqui chum bustyity vejyaꞌ muꞌ. Shuban qui namꞌ busjibun vejyaꞌ, chat qui muꞌ jiꞌjiyacseban Israeltyiꞌ vóshiꞌ in mọꞌ p̂eyacdyeꞌ jasoꞌmitis Jenꞌ. 35Muꞌin na muntyiꞌ in cạvepte vej in anic pashyimꞌ, mọꞌdyes qui bus buꞌyi vejyaꞌ muꞌ junꞌsiꞌ chuc quivij sisbite Jenꞌsiꞌ acaꞌ muꞌ, paj qui p̂eyaqui Ayoꞌtum, q̂uinꞌdyemꞌ quivij meijjeyaqui vejyaty muꞌ.
Currently Selected:
Exodo 34: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
