Exodo 3

Jenꞌ jafaijdyi Moisés

1Moisés ĉọjcacsity oveca, tyúñes ĉọjcaqui oveca Jetros, muꞌ Jetro cọdaquity Jenꞌcheꞌ,#3:1 Yocsiꞌ tịj muꞌ Jetros "Reuel". Madiánĉan bäꞌyity. Yirisĉan mạyedyeꞌ muꞌ Moisés yocve cạcsi oveca in cäjyaꞌ tyeij tajñiꞌĉan, ĉụiꞌdye ventyecte mụcuꞌ Horeb,#3:1 Päräꞌ tịj mụcus: Horeb judyeyaꞌ Sinaí. Jenꞌtyiꞌ mụcuꞌ muꞌ. 2Muꞌyaꞌ muꞌ Ayoꞌtyiꞌ Anjer jiꞌcaviti Moisésyaꞌ, ĉụiꞌ furyisyaꞌ son, muꞌyaꞌ jiꞌcaviti muꞌ. Moisés jämꞌtuiꞌ cạveꞌ mọꞌ son, meꞌ tsanꞌ furquiꞌ jam qui namꞌ jụꞌñiꞌ coꞌshaiꞌ mọꞌ räjquis son. 3Yi Moisés:

—Där ọij äjyedyeꞌ jiꞌcavitiꞌ furquevaꞌjoiꞌsiꞌ son, jam qui namꞌ junꞌ p̂udaijjoiꞌ, yụ ĉa cạvequeꞌ —yi Moisés.

4Ayoꞌ jacaviti muꞌ Moisés ĉọ́queꞌ mọꞌ, chat muꞌĉan jafaijti furquevaꞌjoiꞌsiꞌĉan, muꞌĉan yi muꞌ:

—Moisés, Moisés —yi vatyquej muꞌĉan.

Moisés vorjete:

—Utsdye u yụ —yi Moisés.

5Yi jajiti muꞌ Jenꞌ:

—Jam raꞌ c̣hẹiꞌyaꞌ jijtuij mi, chacjeyaca yujches mi, ĉaĉaij na tsäquiꞌ buꞌyiꞌ ọij jac, aty Jenꞌdyes yụꞌtac. 6Yụ nash Jenꞌ vóshity mi jiquej, Abrahamtyiꞌ judyeyaꞌ Isaactyiꞌ judyeyaꞌ Jacobtyiꞌ chimeꞌ —jajiti Jenꞌ muꞌ Moisés.

Moisés busjiti vejyaꞌ ĉaĉaij na noiꞌyi cạvete Jenꞌ. 7Ayoꞌ yi jajiti Moisés:

—A nash cạvacsi muntyiꞌ yụ, anic där ñịbeꞌ cạveꞌ Egiptoĉan in. Chimeꞌdye seꞌvacsebiij táredyeꞌ muꞌin ñịbedyesyaꞌ muꞌin, muꞌin ĉọjcacsity in där muꞌin ñịbeꞌ jịꞌcavacsi in, chị́yacsebi yụ ñịbedyes muꞌin. 8Mọꞌdyes yụ chạij yụ raꞌ jiꞌc̣honacsi paj qui muꞌin Egiptoĉantyiꞌ in jam ñịbeꞌ jịꞌcavacsi in. Yụ raꞌ jiꞌshupcacseban Egiptoĉantyiꞌ in yocsiꞌĉan qui raꞌ jac yụꞌtacsi yụ därsiꞌĉan, anic jämꞌsiꞌĉan jac, yóĉandyemꞌ jam jedyeꞌ jayej o, paj muꞌĉan bäꞌyi in, mọꞌ jac yóĉandyemꞌ bäꞌyi cananeo u in, hitita in, amorreo in, fereseo in, heveo in judyeyaꞌ jebuseo in, meꞌ meꞌ muꞌĉan bäꞌyi q̂uinꞌ in. 9Anic seꞌvacsebi yụ därsiꞌ táredyeꞌ muꞌin Israeltyiꞌ vóshiꞌ in, chimeꞌ ñịbedyesmun cạvacsebi yụ. 10Yụ raꞌ jutebadyeye Egiptoĉan, muꞌĉan raꞌ jéte mi muꞌ ayoꞌ paj qui muꞌ farajjeyacseban muꞌin Israeltyiꞌ vóshiꞌ muꞌ, jiꞌshupcacseban ram Egiptoĉantyiꞌ —jajiti Moisés muꞌ Jenꞌ.

11Moisés vorjete muꞌ Jenꞌ:

—Jam nash yụ fer buꞌyity paj qui yụ jéte muꞌ ayoꞌ, mijam yụ tupuj jiꞌshupcacsi Israeltyiꞌ vóshiꞌ muꞌin.

12Vorjajiti muꞌ Jenꞌ:

—Yụ́dye raꞌ penꞌdyetuye, aty raꞌ jorojyaꞌ jụijyaꞌ miꞌin, timaꞌquibudyiĉaꞌ raꞌ yụ miꞌin úcheꞌ mụcuꞌcheꞌ, mọꞌ raꞌ jịꞌĉocdyes yụ́dye juteye mi —yi jajiti Jenꞌ.

13Moisés vorjete muꞌ Jenꞌ:

—Meꞌ jéyacsi jụijyaꞌ yụ: "Muꞌ Jenꞌ vóshiꞌvuntyiꞌ jiquej miꞌin, muꞌ nash jutin yụ", jéyacsi yụ jụijyaꞌ, judyeyaꞌ muꞌin raꞌ jin yụ in, "¿Tyi caꞌ tịj muꞌ jutintyiꞌ mi?" Yi jin jụijyaꞌ yụ in ¿jätäjjeyacsi qui bu raꞌ yụ?

14Yi Jenꞌ vorjajiti:

—YỤ́DYE NASH YỤ,#3:14 "YỤ́DYE NASH YỤ" yiꞌ caꞌ yiꞌ "Jehová hebreosĉan p̂eyacdyeꞌ. meꞌ shupquiꞌ tịj yụ. Jéyacseva: "Muꞌ tịj muꞌ: YỤ́DYE NASH YỤ, muꞌ nash jutintyiꞌ yụ miꞌinyaꞌ q̂uinꞌ."

15Meꞌ raꞌ jéyacsi mi Israeltyiꞌ vóshiꞌ muꞌ: "Muꞌ Jehová muꞌ nash jutintyiꞌ yụ, muꞌdye Jenꞌ muꞌintyiꞌ vóshity jiquej miꞌin, Abrahamtyiꞌ judyeyaꞌ Isaactyiꞌ judyeyaꞌ Jacobtyiꞌ chimeꞌ, muꞌ nash jutin yụ", yi raꞌ jéyacsim. Räjĉan buꞌyiꞌ raꞌ ọij tịj yụ, mijam raꞌ jụꞌñisĉan mạyedyeꞌ mọtsiꞌ. 16Tạij caꞌñibuda Egiptoĉan jịjcabada, vajmuꞌyaꞌjeyacseva muꞌin tashcheꞌ buꞌyity Israeltyiꞌ vóshiꞌ muꞌin, jéyacseva: "Jenꞌ vóshiꞌvuntyiꞌ Ayoꞌ jiquej miꞌin, Abrahamtyiꞌ judyeyaꞌ Isaactyiꞌ judyeyaꞌ Jacobtyiꞌ muꞌ jiꞌcaviti yụ́yaꞌ, muꞌ jin yụ, muꞌ nash fer dyijtunac miꞌin judyeyaꞌ cavibunac ñịbedyes miꞌin junꞌtyinac chuc Egiptoĉantyiꞌ in. 17Muꞌ nash yi, muꞌ ca raꞌ jiꞌshupquinac úĉantyiꞌ miꞌin Egiptoĉan q̂uinꞌ, yóĉandyemꞌ ñịbeꞌ cạvetiñeꞌĉan u, muꞌĉan qui raꞌ canac yocsiꞌĉan jac anic jämꞌsiꞌĉan, yóĉandyemꞌ jam jedyeꞌ jayejjoiꞌ o. Q̂uinꞌ muꞌyaꞌ tacaꞌ yoctyiꞌ muntyiꞌ muꞌĉan bäꞌyity in: tịj muꞌin cananeo in, judyeyaꞌ hitita in, amorreo in, fereseo in, heveo in judyeyaꞌ jebuseo in, meꞌ meꞌ muꞌĉan bäꞌyity in, yi jin yụ muꞌ Jenꞌ", jéyacseva.

18Muꞌin tashcheꞌ buꞌyity in chäquibun raꞌ p̂eyacdyeꞌ in judyeyaꞌ muꞌin raꞌ penꞌdyetun in, ĉọctinte raꞌ muꞌ Egiptoĉantyiꞌ ayoꞌ, jétinte raꞌ miꞌin: "Muꞌ Jenꞌ Ayoꞌ tsun hebreoty, muꞌ jiꞌcaviti tsunyaꞌ, mọꞌdyes qui tsun jéyac mi: farajjitiĉamꞌ tsun paj qui cäjyaꞌ jịjcaij tsun, chibin raꞌ mạyedyeꞌ miꞌi tsun. Mọꞌĉan raꞌ jiꞌcoꞌshayequeꞌ cuꞌdyeꞌ tsun tsuntyidyes Jenꞌ, muꞌ nash Ayoꞌ tsun", meꞌ raꞌ jéte mi muꞌ Egiptoĉantyiꞌ ayoꞌ. 19A nash chịj yụ muꞌ raꞌ ayoꞌ jam junꞌ farajjeyacsi, meꞌdye raꞌ yụ́syaꞌ mọmoꞌ ferdyeꞌ tupuj farajjeyacsi. 20Meꞌ raꞌ jịꞌcaveyacsi ferdyeꞌ yụ Egiptoĉantyiꞌ muntyiꞌ in, anic raꞌ yoc yoc jịꞌcaveyacsi tsäquiꞌsis yụ, chat q̂uinꞌdyemꞌ raꞌ muꞌ ayoꞌ farajjeyacsi.

21Chimeꞌdye yụ raꞌ yi paj qui muꞌin Egiptoĉantyiꞌ in irijyi in Israeltyiꞌcheꞌ vóshiꞌ in, chat qui raꞌ jam dạ̈räꞌ jọban in, jedyeꞌtum qui raꞌ sacjebanꞌ in. 22Mọꞌin p̂en in Israelsiꞌ vóshiꞌ muꞌ, mọꞌin raꞌ cọdyetacsetaquiꞌ in Egiptoĉansiꞌ in, mọꞌin c̣hẹiꞌyaꞌ bäꞌyis in judyeyaꞌ mọꞌinĉansiꞌdye in, paj qui mọꞌin ñịbeꞌjeyacsiꞌ in yaꞌiꞌsiꞌ jedyeꞌ mọꞌin, oro mọꞌin judyeyaꞌ plata mọꞌin, judyeyaꞌ quịꞌsiꞌ mọꞌin, meꞌ meꞌ raꞌ soꞌmacsiꞌ in. Mọꞌĉan qui raꞌ cäbunꞌ ạvaꞌ mọꞌin, meꞌ raꞌ cạcsebiꞌ in Egiptoĉansiꞌ jedyeꞌ muꞌin —yi Jenꞌ jajiti Moisés.

Currently Selected:

Exodo 3: CAS

Highlight

Copy