Exodo 11

Jenꞌ jịꞌchicaqui ijac raꞌ in tashchety ạvaꞌ muꞌin

1Ayoꞌ jajiti Moisés:

—Yiriꞌ quiꞌdyety raꞌ meꞌte yụ muꞌ ayoꞌ judyeyaꞌ Egiptoĉantyiꞌ muntyiꞌ in, chat q̂uinꞌdyemꞌ raꞌ farajjinac miꞌin, jam qui na ramꞌ meꞌ mọmoꞌ farajjinac, dadamꞌ raꞌ mujuꞌchaꞌ jiꞌcavintyinac paj qui cavintum jọban miꞌin. 2Jéyacseva muꞌin Israeltyiꞌ vóshiꞌ in, p̂en in judyeyaꞌ sonꞌ in paj qui cọdyetacsetaqui in Egiptoĉantyiꞌ in oro muꞌin judyeyaꞌ plata muꞌin chimeꞌ, cọdyetacsetaqui in c̣hẹiꞌyaꞌ bäꞌyity in.

3Ayoꞌ yi paj qui muꞌin Egiptoĉantyiꞌ in irijyi muꞌincheꞌ in Israeltyiꞌcheꞌ vóshiꞌ muꞌ. Chimeꞌdye muꞌin nọ́taquity ayoty judyeyaꞌ räjtumdye Egiptoĉantyiꞌ muntyiꞌ in cạvete in muꞌ Moisés anic ferdyeꞌtumtyiꞌ, anic quijñete in.

4Yi muꞌ Moisés jétacte ayoꞌ:

—Meꞌ nash yi muꞌ Jenꞌ: "Tsedyedyeꞌ raꞌ menyaꞌ räj raꞌ ĉọcsecbi acaꞌ yụ Egiptoĉantyis in. 5Yụ raꞌ ijacsi räj tashcheꞌ naꞌity sonꞌ ạvaꞌ in, paj tsanꞌ ayoty ạvaꞌ muꞌ, paj tsanꞌ úñistyiꞌ ạvaꞌ mọꞌ, mọꞌ musaquistyiꞌ, räj raꞌ naijyejoij in. Chimeꞌdye raꞌ tashchety cuꞌdyety ạvaꞌ mọꞌin säñi raꞌ in ọ́ĉan Egiptoĉansiꞌ in. 6Anic raꞌ tári in ạvaꞌvundyes muꞌin Egiptoĉantyiꞌ in. Mọjoꞌchaꞌ raꞌ därsiꞌ táredyeꞌ shupquiꞌ muꞌin jam meꞌ cạveꞌ jiquej in, mijam raꞌ cuvij joꞌmes jiꞌcavibunꞌ", yi muꞌ Jenꞌ. 7Muꞌin na Israeltyiꞌ vóshiꞌ muꞌ jam raꞌ jedyeij muꞌin in, mijam raꞌ jedyeꞌ väjnacsiꞌ mọꞌĉan ac̣huj, mijam raꞌ muntyiꞌ väjñete in mijam raꞌ cuꞌdyeꞌ chimeꞌ. Meꞌ raꞌ chịj miꞌin muꞌ Ayoꞌ pạrej yụꞌtacsi muꞌin Israeltyiꞌ vóshiꞌ in. 8Aty raꞌ meꞌsiꞌ, muꞌin nọ́taquity mi räj atsij raꞌ in cavishun yụ in, dyụtsyi raꞌ yụ́yaꞌ in, jin raꞌ yụ in: "Tạij jọbada mi cạĉan raꞌ muntyiꞌ mi", chat raꞌ q̂uinꞌdyemꞌ jọban yụ —yi muꞌ Moisés jéte ayoꞌ.

Moisés anic där fạ́coij, acaꞌĉantyiꞌ shuban, yạjquibajte muꞌ ayoꞌ. 9Muꞌ qui Ayoꞌ jajiti muꞌ Moisés:

—Útsi ayoꞌ mijam raꞌ méquiꞌ seꞌvinac miꞌin, meꞌ raꞌ yụ cuvij jịꞌcaveyacsi ferdyeꞌ yụ Egiptoĉantyiꞌ muntyiꞌ in.

10Meꞌ tsanꞌ meꞌ Moisés judyeyaꞌ muꞌ Aarón daiꞌ quiꞌ jịꞌcaveyete tsanꞌ in muꞌ ayoꞌ Jenꞌsiꞌ ferdyeꞌ muꞌ, uts na jam méquiꞌ mạꞌjeꞌ farajjeyacsi Israeltyiꞌ vóshiꞌ muꞌ paj qui shuban Egiptoĉantyiꞌ in, ĉaĉaij na muꞌ Jenꞌ jiꞌyäjquevaꞌbite ĉojtyiꞌ muꞌ ayoty muꞌ.

Currently Selected:

Exodo 11: CAS

Highlight

Copy