Deuteronomio 34
34
Sänꞌdyeꞌ muꞌ Moisés
1Moisés bojvi mụcuꞌcheꞌ, yacchuiꞌ mọꞌ cäjyasĉan jac Moab, mụcuꞌcheꞌ qui jịjcaij Nebocheꞌ, chaꞌshete roccheꞌ mụcuꞌ, Pisga tịj roccheꞌ. Muꞌ mụcuꞌ jijtuijve buꞌyi tsun Jericóve buꞌyi. Aty muꞌcheꞌ buꞌyi muꞌ Ayoꞌ jajiꞌcaviyiti mọꞌ jac Canaán. Muꞌcheꞌ buꞌyi cạveꞌ räj mọꞌ jac, tashiꞌ mọꞌ Galaad, meꞌdye Danve buꞌyiꞌ. 2Räj meꞌ meꞌ cạve mọꞌ: Neftalí, judyeyaꞌ Efraín, judyeyaꞌ Manasés, judyeyaꞌ jac Judá, meꞌdye därsiꞌve buꞌyiꞌ mar, Mar Mediterraneo tịj mọꞌ. 3Chimeꞌdye cạveꞌ Neguevve judyeyaꞌ mọꞌ cojirosiꞌ mojij Jordánsiꞌ, judyeyaꞌ mọꞌ mojij yóyaꞌdyemꞌ Jericó o, meꞌdye Zoarve buꞌyiꞌ, meꞌ meꞌ muꞌ Jenꞌ jajiꞌcaviyiti muꞌ Moisés mọꞌ jac Canaán. Mọꞌ Jericó manaꞌdyeiꞌsiꞌ bäꞌyedyeꞌ, jeꞌ in. 4Ayoꞌ jajiti Moisés:
—Ọij jac cạves q̂uinꞌ mi, mọꞌ yụꞌtyes jiquej yụ muꞌindyes raꞌ vóshidyes Abrahamtyiꞌ muꞌ, judyeyaꞌ Isaactyiꞌ, judyeyaꞌ Jacobtyiꞌ chimeꞌ. Ĉụiꞌsiꞌcheꞌ tịj yụ yụꞌtyeyacsi p̂eyacdyeꞌ jiquej yụ, junꞌ chuc raꞌ yụ soꞌmacsi ọij jac cạves q̂uinꞌ mi. Mọꞌdyes q̂uinꞌ mạꞌjeꞌ jịꞌcaveyeye yụ ọij jac, jam qui na ramꞌ yụ jiꞌsisye muꞌĉan mi —jajiti Jenꞌ muꞌ Moisés.
5Anicdye meꞌ, muꞌ Moisés, Ayoꞌtyiꞌ úñity muꞌ, Moabĉan säñi, yoj yidyemꞌ jiquej Ayoꞌ u. 6Moabĉansiꞌ mojij, muꞌĉan muꞌ Ayoꞌ rudyuꞌjajiti muꞌ Moisés, yocvetaque mọꞌ bäꞌyedyeꞌ Betpeor, jam qui namꞌ junꞌ chị́yete in junaꞌ chuc muꞌ ruꞌdyuij. 7Aty yiriꞌ cien päräꞌ quiꞌtac yómodyeꞌ tyiti muꞌ Moisés chat q̂uinꞌdyem säñi muꞌ, tacaꞌ tsanꞌ feryi muꞌ, mijam jedyeij, mijam oshnoꞌjoij.
8Cäjyasĉan jac mọꞌ Moab, muꞌĉan muꞌin Israeltyiꞌ vóshiꞌ in tárete in muꞌ Moisésvun, chibin quiꞌtac mạyedyeꞌ meꞌquiꞌ tárete in, anic fer dyijtute in. 9Josué, ạvaꞌ muꞌ Nuntyiꞌ, anic dyijyedyeꞌtumtyiꞌ muꞌ, ĉaĉaij na muꞌ Moisés jasoꞌmiti yụꞌtacdyeꞌ jiquej. Mọꞌdyes qui muꞌin muntyiꞌ in chiquete in, judyeyaꞌ seꞌvepte in Ayoꞌsiꞌ p̂eyacdyeꞌ muꞌ jasoꞌmitis Moisésvun jiquej. 10Itŝij yoctyiꞌ meꞌ jasoꞌmitity p̂eyacdyeꞌ Jenꞌ yojdyemꞌ Moisésvun u, ĉaĉaij na vejtute Ayoꞌ p̂eyaqui muꞌtum, 11-12mijam yoctyiꞌ meꞌ jịꞌcaveyacsi Jenꞌsiꞌ ferdyeꞌ muꞌ, yoquiꞌdyemꞌ Ayoꞌ jajutitiyaꞌ Egiptoĉan jiquej paj qui muꞌ jịꞌcaveyete Jenꞌsiꞌ ferdyeꞌ muꞌ muꞌĉantyiꞌ ayoꞌ, judyeyaꞌ nọ́taquity muꞌ räjtumdye Egiptoĉantyiꞌ muntyiꞌ in. Därsiꞌ vaꞌtacdyeꞌ Jenꞌsiꞌ muꞌ soꞌmacsi Moisés muꞌĉantyiꞌ in.
Currently Selected:
Deuteronomio 34: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
