Colosasĉantyidyes 4
4
1Chimeꞌdye miꞌin meꞌchucsity úñity miꞌin, jemoñeꞌ anic rụij bächäcsi úñity miꞌin jam raꞌ aꞌc̣histum dyijyedyeꞌ cạvacsi miꞌin. Chịj tyuꞌ u miꞌin muꞌyaꞌ nash ĉụiꞌtyiꞌ Ayoꞌ miꞌin mạyedyeꞌchety, muꞌtyiꞌ nash miꞌin úñity muꞌ.
2Jam raꞌ farajjetiñeꞌ cọdacdyeꞌ Jenꞌcheꞌ miꞌin, dyij buꞌyi raꞌ ĉojtyiꞌĉan miꞌin cọdacdyeꞌĉan miꞌin, yejĉoij raꞌ yoshoropaij jétinte Jenꞌ. 3Cọdaĉamꞌ Jenꞌcheꞌ tsundyes chimeꞌ, paj qui muꞌ Jenꞌ vancaiꞌ yụꞌtyeꞌ carijtacdyeꞌ tsundyes, voroꞌyedyeꞌ Jenꞌsiꞌ p̂eyacdyeꞌ muꞌ, mọꞌ p̂eijtes Cristo, mọꞌ jam chị́yeptes urucyaty muntyiꞌ jiquej in. Q̂uinꞌ qui namꞌ p̂eyacdyedyes ĉäꞌräij yụ voroꞌyedyeꞌyaꞌ yụ, mọꞌ jiꞌmeꞌtyiyin yụ in. 4Cọdyemac Jenꞌ yụ́dyes paj qui yụ tupuj jorojĉanjepte mọꞌ Cristos p̂eyacdyeꞌ muꞌ, ĉaĉaij na mọꞌ yụꞌtacdyeꞌ yụ.
5Jemoñeꞌ miꞌin dyijyedyeꞌtum bäꞌyi muꞌintum in jam anicjetetytum Jenꞌ in, jam raꞌ fibiꞌ mọmoꞌ bäꞌyi muꞌintum miꞌin, räjĉan raꞌ jịꞌchiqueyacsi miꞌin Jenꞌsiꞌ p̂eyacdyeꞌ muꞌ. 6Jämꞌsimꞌ p̂eyacdyeꞌ maꞌjodyes jiꞌshupquevac yoctyiꞌtum muntyiꞌ in. Jäꞌmiij raꞌ dyijyi miꞌin paj qui tupuj rụij vorjeyacseban miꞌin tyi chuc cudyityinactyiꞌ p̂eyacdyeꞌ jụijyaꞌ Jenꞌdyes in.
Voryetacdyeꞌ Pablos
7Uts mạꞌjeyacdyety vojity tsun Tiquico, muꞌ raꞌ ĉucnac jụijyaꞌ miꞌin, räj raꞌ jínac junꞌ chuc yụ q̂uinꞌ bäꞌyi úĉan. Muꞌ nash rụijtyity nọ́taquity tsun, muꞌ carijtaquity yụ́tum Ayodyes tsun. 8Meꞌdyes yụ raꞌ jutete miꞌinyaꞌ paj qui muꞌ jínac miꞌin junꞌ chuc bäꞌyi q̂uinꞌ tsun úĉan, paj qui muꞌ maꞌjoij yuꞌtyinac miꞌin. 9Muꞌve raꞌ jịjcaij Tiquico penꞌdyeꞌtum raꞌ muꞌ Onésimotum, muꞌ raꞌ jịjcatety. Onésimo miꞌinĉantyiꞌ, muꞌ nash mạꞌjeyacdyety vojity tsun, judyeyaꞌ rụij cäc̣häꞌchutety Jenꞌ.#4:9 Filemón 10-12 Muꞌin raꞌ räj jínac in junꞌ chuc bäꞌyi q̂uinꞌ tsun úyaꞌ.
10Uts Aristarco muꞌ penꞌdyetuntyiꞌ yụ ĉärꞌtaquisĉan, muꞌ vorjinac miꞌin chimeꞌ. Uts Marcos vojityyetacdyemꞌ Bernabéty, muꞌ chimeꞌ vorjinac miꞌin. A nash jéyac jiquej miꞌin paj qui jämꞌ tiĉunꞌtinte miꞌin muꞌ Marcos, ventyicnacyaꞌ muꞌ. 11Uts Jesús, Justo jétety in, muꞌ chimeꞌ vorjinac miꞌin. Muꞌinĉantyiꞌ judío in anicjetety Jesucristo in, muꞌin mọmoꞌ chibin ñútyintyiꞌ yụ in, uts Aristarco judyeyaꞌ Marcos judyeyaꞌ Justo, muꞌin mọmoꞌ ñútyityin yụ in voroꞌyedyeꞌ mọꞌ p̂eyacdyeꞌ p̂eyes mọꞌ ayoꞌbuꞌyedyeꞌ Jenꞌsiꞌ muꞌ, maꞌjoij yuꞌtyin ĉojtyiꞌĉan yụ in. 12Muꞌ Epafras miꞌinĉantyiꞌ chimeꞌ, muꞌ vorjinac chimeꞌ, úñity Cristoty muꞌ. Muꞌ räjĉan fer cọdyete Jenꞌ miꞌindyes paj qui fer buꞌyi bäꞌyi Jenꞌdyes miꞌin, paj qui räj ĉojtyiꞌĉan cäc̣häꞌchubitinte Jenꞌsiꞌ dyijyedyeꞌ muꞌ. 13Yụ nash chị́yepte Epafrassiꞌ dyijyedyeꞌ muꞌ, junꞌ chuc muꞌ fer dyijtunac miꞌin, muꞌ fer úñi miꞌindyes cọdacdyeꞌĉan Jenꞌcheꞌ muꞌ. Jam miꞌin mọmoꞌ meꞌ dyijtunac muꞌ, chimeꞌdye dyijtucsi yoctyiꞌ anicjetety Jenꞌ in Laodiceaĉan bäꞌyity in judyeyaꞌ Hierápolisĉan bäꞌyity chimeꞌ in. 14Uts pịñitucsity Lucas mạꞌjeyacdyety tsun, muꞌ chimeꞌ vorjinac miꞌin, judyeyaꞌ muꞌ Demas chimeꞌ vorjinac miꞌin.
15Vorjeyacsejamꞌ muꞌin anicjetety Jenꞌ in Laodiceaĉan bäꞌyity in. Chimeꞌdye vorjevac miꞌin mọꞌ Ninfa, räjtumdye muꞌin anicjetety Jenꞌ chimeꞌ in, muꞌin vajmuꞌyaijtyiꞌ in mọꞌsiꞌĉan acaꞌ in. 16Aty meꞌsiꞌ p̂iyibutiĉaꞌyaꞌ miꞌin ọij sánacdyeꞌ yụs miꞌin, chat qui raꞌ jutetiñeꞌ muꞌinyaꞌ in Laodiceaĉan bäꞌyityyaꞌ in, paj qui muꞌĉantyiꞌ chimeꞌ p̂eyeꞌ in ọij p̂eyacdyeꞌ. Jemoñeꞌ miꞌin p̂iyibutiĉaꞌ chimeꞌ miꞌin yocsiꞌ sánacdyeꞌ yụ, mọꞌ jutes yụ jiquej Laodiceaĉantyidyes in, mọꞌ raꞌ juteꞌ in miꞌindyes. 17Chimeꞌdye raꞌ jétinte muꞌ Arquipo: "Fervaꞌta paj qui jịꞌcätseꞌ mi mọꞌ carijtacdyeꞌ soꞌminsiꞌ jiquej muꞌ Ayoꞌ tsun", meꞌ jémac miꞌin.
18Yụ Pablo, ọij sáñeꞌ yụ voryetacdyeꞌ miꞌindyes, ĉụiꞌsiꞌyaꞌ un sáñeꞌ yụ. Jam raꞌ yaquintubutiĉaꞌ miꞌin ĉärꞌtacdyeꞌ yụ, taĉan ĉäꞌräij úĉan yụ. Yụ cọdyete Jenꞌ paj qui ñịbeꞌjitidyes soꞌminac miꞌin. Paj meꞌ.
Currently Selected:
Colosasĉantyidyes 4: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
