Uñedye' 22
22
1Yi jéyacsi:
—Chätidyeꞌ räj miꞌin, seꞌvibutiĉamꞌ p̂eyacdyeꞌ yụ, yụ raꞌ ñutsjiti miꞌinsiꞌyaꞌ vej.
2Meꞌdye seꞌvete in ĉụiꞌsiꞌĉan p̂eyaqui p̂eyacdyeꞌ hebreosĉan, dadamꞌ c̣huꞌc̣henꞌyejoij in. Muꞌ na yejĉoij jéyacsi:
3—Yụ nash judío, Tarsoĉan naꞌityiꞌ yụ Ciliciaĉansiꞌ bäꞌyedyeꞌ, úĉan qui namꞌ Jerusalénĉan p̂añi yụ. Muꞌdye Gamaliel jiꞌchäyin yụ. Anic jämꞌ jiꞌchäyin yụ in junꞌ chuc raꞌ chiqueꞌ yụ yụꞌtacdyeꞌ soꞌmacsis vóshiꞌvun tsun jiquej. Anic jämꞌ dyijtute Jenꞌ yụ yódyemꞌ q̂uinꞌ miꞌin u dyijtutinte Jenꞌ. 4Anic fer fạ́cacsi jiquej yụ muꞌin cäc̣häꞌchuptety in Jesússiꞌ majmi muꞌ, mạꞌjeꞌ tas ijacsi yụ. Yụ tapjeyacsi, ĉärꞌtacsi yụ, sonꞌ in judyeyaꞌ p̂en chimeꞌ in. 5Muꞌin chimeꞌ in, muꞌ tashchety cudyitity Jenꞌcheꞌ räjtumdye muꞌin tashcheꞌ buꞌyity muntyiꞌ in, anic chäyibun yụ in ọij rụijsis p̂eyacdyeꞌ yụ. Muꞌin soꞌmin yụ in ferdyeꞌtumsiꞌ paper chätidyedyes tsun Damascoĉandyes, mọꞌcheꞌ yiꞌ muꞌin ca raꞌ soꞌmin yụ in tyi chuc anicjetety Jesús in. Mọꞌdyes qui muꞌve jịjcaij yụ dyijyi yụ mạꞌjeꞌ c̣họcocoꞌ tucsi yụ úĉan Jerusalénĉan in paj qui úĉan vaꞌtacdyeꞌ soꞌmac in —jéyacsi muꞌ Pablo —.
Muꞌ Pablo jéyacsi junꞌ chuc jụjjete Jesucristo jiquej
6Meꞌdye roiꞌjeꞌ tsun. C̣hẹiꞌyaꞌyequi Damasco tyiti tsun, quichĉan tsun, meꞌĉandye mạyedyeꞌches mạijjin yụ, anic fer tŝútyin yụ. 7Mạijyedyeꞌĉan mụijyaꞌ tŝọij yụ, seꞌveꞌ vatyquej yụ yiris p̂eyacdyeꞌ, yiꞌ: "Saulo, Saulo, ¿junꞌ dash meꞌtim?" jin yụ. 8Yụ qui yi vorjete: "¿Tyi ĉaĉaij mi u?" Vorjin yụ: "Yụ u Jesús Nazaretĉantyiꞌ yojdyetydyemꞌ meꞌtety um." 9Muꞌin na penꞌdyeꞌ yụ in cạveꞌ tsanꞌ in mọꞌ mạijquedyeꞌ, tyumꞌ tyeij ĉojtyiꞌ muꞌin, jam qui namꞌ muꞌin seꞌveꞌ in mọꞌ p̂eyacdyeꞌ mọꞌ jinsiꞌ yụ. 10Yụ qui jéte: "¿Jätäjyi caꞌ mi yụ́dyes?" Vorjin yụ Ayoꞌ tsun: "Sacyebada tạij Damascoĉan jịjcava, muꞌĉan raꞌ jin in junꞌ chuc dyijyedyeꞌ yụ judyeyaꞌ junꞌ chuc raꞌ chimeꞌ mi", yi jin yụ. 11Yụ na aty jam junꞌ naijti, mọꞌ mạijquedyeꞌ mọꞌdye mọmoꞌ jiꞌtofeyin yụ. Mọꞌdyes qui muꞌin penꞌdyeꞌ yụ in un chubun yụ in, muꞌindye Damascoĉan can yụ in.
12Muꞌĉan yirity muntyiꞌ, Ananías tịj muꞌ, anic dyijyity Jenꞌcheꞌ muꞌ chiquebitety yụꞌtacdyeꞌ. Räj Damascoĉantyiꞌ judío in anic jämꞌyi ĉọ́te in. 13Muꞌdye ĉútin yụ, jin yụ: "Mi vojity Saulo, naijbuda", jin yụ. P̂eyacdyeꞌĉandye naijbun yụ, nạijbajte yụ. 14Yi qui jin yụ: "Jenꞌ vóshiꞌvuntyiꞌ tsun muꞌ aty tsimꞌtyin mi, muꞌ raꞌ jin mi junꞌ chuc dyijyedyeꞌ muꞌ, chimeꞌdye junꞌ chuc raꞌ mi, mi ca raꞌ cạvepte muꞌ rụijtyity Ạvaꞌ muꞌ, judyeyaꞌ raꞌ chimeꞌ seꞌvepte mi chụꞌĉansiꞌ p̂eyacdyemꞌ. 15Mi ca raꞌ voroꞌtacsity p̂eyacdyeꞌ muꞌ, jéyacsi raꞌ mi räj úchety muntyiꞌ in cạveꞌsiꞌ mi judyeyaꞌ seꞌves mi. 16Q̂uinꞌ chat yiristum mọmoꞌ jiꞌchojta, Ayoꞌsiꞌcheꞌ raꞌ tịj muꞌ cọdaquim Jenꞌcheꞌ chat qui raꞌ c̣hiconꞌjibun juchaj mi", yi jin yụ muꞌ Ananías —jéyacsi muꞌ Pablo —.
Pablo jéyacsi junꞌ chuc muꞌ voroꞌtacsi jam judío in
17Aty meꞌsiꞌ caꞌñibun yụ Jerusalénĉan jijtuban yụ. Cọdaqui Jenꞌcheꞌ yụ Jenꞌsiꞌĉan acaꞌ muꞌ, chat jịꞌcavacdyeꞌĉan jiꞌcaviti yụ́yaꞌ muꞌ Ayoꞌ. 18Yụ qui namꞌ nạijte, muꞌ jin yụ: "Cavin shubada mi úĉantyiꞌ Jerusalénĉantyiꞌ, úĉantyiꞌ muntyiꞌ in jam raꞌ chäquibun p̂eyacdyeꞌ in", yi jin yụ. 19Yụ qui vorjete: "Ayoꞌ yụ, junꞌdyemꞌ jam seꞌvin yụ in ĉaĉaij na jämꞌ chäyin yụ in junꞌ chuc yụ jiquej jịꞌñibeꞌcabiye muꞌin anicjintyiꞌ in. Chimeꞌdye sitacsi yụ vajmuꞌyaijĉan in, jäcacsi yụ judyeyaꞌ siꞌbacsi yụ judyeyaꞌ ĉärꞌtacsi yụ. 20Aty ijabun in úñity mi Esteban, muꞌyaꞌ yụ chimeꞌ, jämꞌ ĉọcsebi yụ dyijyedyeꞌ ujatetysiꞌ in, ĉọjcacsebi chum yụ quịꞌsiꞌ muꞌin, muꞌin ijactyiꞌ in, meꞌ yi yụ jiquej", jéte yụ muꞌ Ayoꞌ. 21Muꞌ na vorjin yụ: "Tạij sacta, yụ raꞌ juteye paj qui voroꞌtacsequi mi muꞌin jam judío in moch bäꞌyity in", yi muꞌ jin yụ Ayoꞌ —meꞌ jéyacsi muꞌ Pablo.
Väc̣häꞌtyitytyiꞌ ayoꞌ muꞌ raꞌ jiꞌsiꞌbete muꞌ Pablo
22Muntyiꞌ in jämꞌ seꞌvete in muꞌ Pablo junꞌ chuc p̂eyeꞌ voroꞌtacdyeꞌ muꞌ jam judíodyes in, chat qui tiyacchuiꞌ äjnaqui in fer p̂eyaqui yi in:
—Ijamac uts muntyiꞌ paj meꞌquiꞌdye tsạꞌ buꞌyi —yi in.
23Dadamꞌ yejĉoij äjnaqui in, chischisjeyaqui quịꞌsiꞌ muꞌin, judyeyaꞌ cheꞌve vaꞌquequeꞌ p̂uijdas in jịꞌfajcacdyes muꞌin. 24Muꞌ na ayoꞌ väc̣häꞌtyitytyiꞌ in jéyacsi paj qui jiꞌsiste in jiꞌchäyitidyeꞌĉan väc̣häꞌtyitysiꞌ in. Aty muꞌĉan in jutacsi paj qui siꞌbete in muꞌ Pablo, paj qui p̂eyeꞌve juchaj muꞌ, junꞌ buty muꞌin judío in meꞌ fạ́quete in. 25Aty tsanꞌ c̣họꞌcoij muꞌ, aty raꞌ tsanꞌ siꞌbete in, chat qui muꞌ Pablo cọdyete p̂eyacdyeꞌ muꞌ ĉọjcacsity väc̣häꞌtyity in, jéte:
—¿Tupuj buty siꞌbetinte miꞌin yirity anictyity Romaĉantyiꞌ jambiꞌdyemꞌ dạcbitinteyaꞌ juchaj muꞌ? ¿Jätäjyiꞌ caꞌ yụꞌtacdyeꞌ Romaĉantyis? —jéte muꞌ Pablo.
26Muꞌ ĉọjcacsity aty seꞌvaqui Romaĉantyiꞌ muꞌ Pablo, cavin ĉọcte muꞌ väc̣häꞌtyitytyiꞌ ayoꞌ in jéte:
—¿Chịj mi u jedyeꞌ chuc junꞌtaqui mi? Muꞌ muntyiꞌ anictyity Romaĉantyiꞌ —jéte.
27Muꞌ qui ayoꞌ ĉọcte muꞌ Pablo jéte:
—¿Mi adac anictyity Romaĉantyiꞌ?
Vorjete Pablo muꞌ ayoꞌ:
—Anic nash meꞌ yụ.
28Yi muꞌ ayoꞌ jéte:
—Yụ nash chimeꞌdye romano, anic där yaꞌiꞌ jäqueꞌ mọꞌ paper Romaĉantyiꞌ jishupquinsiꞌ yụ.
Yi Pablo vorjete:
—Yụ nash meꞌ naꞌi romano.
29Muꞌin na siꞌbetety raꞌ tsanꞌ Pablo in cavintum meijyi muꞌyaꞌ in. Muꞌdye ayoꞌ väc̣häꞌtyitytyiꞌ, meijyi chimeꞌ muꞌyaꞌ, aty meꞌ chịjyaꞌ Romaĉantyiꞌ na muꞌ jiquej, mọꞌdyes muꞌ noiꞌyi ĉaĉaij na aty jiꞌsapte tsanꞌ muꞌ Pablo cadenayaꞌ, ĉaĉaij na jam meꞌ yiꞌ Romaĉantyis yụꞌtacdyeꞌ muꞌin.
Pablo jiꞌmeꞌte in ayoꞌyaꞌ judío in
30Muꞌ väc̣häꞌtyitytyiꞌ ayoꞌ muꞌin mạꞌjeꞌ räj chịj jedyeꞌ buty jiꞌmeꞌtyeyete in muꞌin judío in, mọꞌdyes qui nojno mạyedyeꞌ jutacsi muꞌ paj qui muꞌin räj vajmuꞌyaij in muꞌin tashcheꞌ cudyitity Jenꞌcheꞌ in, räjtumdye ayoꞌ judíoty muꞌin. Chat qui muꞌ jutacsi paj qui muꞌin dajbajte in muꞌ Pablo, judyeyaꞌ yụꞌte in ayoꞌsiꞌyaꞌ vej muꞌin.
Currently Selected:
Uñedye' 22: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
