Jäqui'ves Pedros 2
2
Pạrej väñädyeꞌyaꞌ jịꞌchiyacsi in
1Urucyaꞌ jiquej pạrej muꞌyaꞌ in Israeltyiꞌ vóshiꞌ in väñädyeꞌyaꞌ p̂eyaqui jiquej in, jeñej buꞌyi jasoꞌmitity p̂eyacdyeꞌ Jenꞌ in, meꞌ buꞌyi yuꞌti in. Meꞌdye raꞌ q̂uinꞌ chimeꞌ miꞌinyaꞌ in pạrej raꞌ muꞌyaꞌ väñädyeꞌyaꞌ p̂eyaquity in. Mọꞌ jiꞌchäyitidyeꞌ muꞌin väñädyeꞌ raꞌ mọmoꞌ jiꞌseꞌveyacsi in, joꞌmesyaꞌ raꞌ jiꞌac̣hiꞌtacsi in muꞌin seꞌvacsebity p̂eyacdyeꞌ muꞌin. Muꞌindye raꞌ vaꞌquecte Jesucristo in, Ayoꞌ tsun, muꞌ yaꞌitacsebity c̣honꞌdyeꞌ muꞌin. Mọꞌ raꞌ jiꞌmeꞌtacsiꞌ vaꞌtacdyeꞌyaꞌ muꞌin, vatyquej raꞌ mọmoꞌ tŝọ́tacsiꞌ. 2Daiꞌ raꞌ anicjetety Jenꞌ in jịjcatacsebiban in aꞌc̣his dyijyedyeꞌ muꞌin, judyeyaꞌ raꞌ muꞌin jorojyaty in cạvacsebi raꞌ aꞌc̣his dyijyedyeꞌ muꞌin, mọꞌdyes qui raꞌ ñiñepte in rụijsis p̂eyacdyeꞌ Jenꞌsiꞌ muꞌ. 3Muꞌin väñädyeꞌyaꞌ jịꞌchiyacsity in querec̣havedyeꞌyaꞌ raꞌ mọmoꞌ jiꞌchäyinac in cäjsisyaꞌ dyijyedyeꞌ muꞌin. Jenꞌ aty dyijyi vaꞌtacdyeꞌ raꞌ soꞌmacsi muꞌin meꞌtyity in, muꞌin raꞌ jam junꞌ c̣honchuc in, ĉaĉaij na tạꞌcaty aty yụꞌtac in tsäquiꞌsisĉandyety in.
4Jenꞌ jiquej jam junꞌ c̣honchucsi muꞌin juchaijtyiꞌ anjer jiquej in, vaꞌcacsequi tŝijĉan in, muꞌĉan taĉan c̣họꞌcoij tojmadyeꞌĉan in, junꞌ quiꞌ chuc raꞌ ayijyaꞌ tupudyeꞌ aty raꞌ Jenꞌ jịꞌcäts yụꞌtacsiyaꞌ juchadyeꞌyaꞌ muntyiꞌ in. 5Meꞌdye chimeꞌ muꞌ jam c̣honchucsi muꞌin ac̣hiꞌyity muntyiꞌ jiquej in muꞌ tas jiꞌtomacsi bänedyeꞌyaꞌ jiquej. Meꞌdye Noé yirity mọmoꞌ jiꞌc̣honte judyeyaꞌ chimeꞌ räjtumdye ạvaꞌ muꞌ, yävätidyeꞌ rụiꞌcuꞌ in, muꞌin mọmoꞌ jiꞌc̣honacsi. Muꞌ Noé voroꞌtacsity tsanꞌ rụijsis p̂eyacdyeꞌ, junꞌ chuc raꞌ rụij bäꞌyi in. 6Chimeꞌdye muꞌ Jenꞌ soꞌmacsi vaꞌtacdyeꞌ jiquej muꞌin Sodomaĉantyiꞌ in judyeyaꞌ Gomorraĉantyiꞌ in, bäꞌyedyeꞌtumdye p̂udaij coꞌshaij in.#2:6 Génesis 19:24 Mọꞌ dyijtucdyes shupquiꞌ muntyidyes in, paj qui jam meꞌ aꞌc̣his bäꞌyi in. 7Meꞌdye yirity mọmoꞌ jiꞌc̣honte Lot, mumꞌ yirity rụijtyity muntyiꞌ, muꞌ cạvacsebity aꞌc̣his dyijyedyeꞌ muꞌin, voꞌvodyeꞌyaꞌ jiquej muꞌin, joꞌmesyaꞌ jiꞌyoquete in.
8Muꞌ rụijtyity Lot räj mạyedyeꞌ jịjcaij cạvacsebi aꞌc̣his dyijyedyeꞌ muꞌin, muꞌin jajbuꞌyetety in, judyeyaꞌ seꞌvacsebi aꞌc̣his p̂eyacdyeꞌ muꞌin chimeꞌ. Mọꞌ muꞌ fer jajiꞌtariti ĉojtyiꞌĉan muꞌ Lot. 9Anicdye meꞌ, muꞌ Ayoꞌ tupuj jiꞌc̣honacsi ñịbedyesyaꞌ muꞌin cäc̣häꞌchuptety Jenꞌsiꞌ dyijyedyeꞌ jụijyaꞌ in, muꞌin na ac̣hiꞌyity in muꞌ tupuj yụꞌtacsi vaꞌtacdyeꞌĉandyety in, muꞌin raꞌ yejĉoij ĉärꞌtac in junꞌ quiꞌ chuc raꞌ ayij tupudyeꞌ aty raꞌ Jenꞌ jịꞌcäts yụꞌtacsi juchadyeꞌyaꞌ muntyiꞌ in. 10Dadamꞌ muꞌin aꞌc̣his dyijyedyeꞌ aꞌsiꞌ cạquity in judyeyaꞌ äcäijjetety Ayoꞌ in judyeyaꞌ jam chiquetety in, muꞌin meꞌtyity in muꞌin raꞌ mujuꞌchaꞌ cạiꞌ vaꞌtacdyeꞌ in. Meꞌ buꞌyi raꞌ muꞌin väñädyeꞌ jịꞌchiyacsity in, muꞌin meꞌmeꞌyity in judyeyaꞌ tyucjety chun in, mijam ạ̈räjjeyacsi muꞌin fer buꞌyity cheꞌvety in, meij mọmoꞌ ñinacsi in. 11Muꞌin na anjer in jam meꞌ in, muꞌin mujuꞌchaꞌ fer buꞌyi in, jam jeñej muntyiꞌ in, meꞌ tsanꞌ meꞌ, muꞌin qui namꞌ jam ñinacsi in muꞌin fer buꞌyity cheꞌve bäꞌyity in, Jenꞌsiꞌyaꞌ vej muꞌ jam junꞌ ñinacsi in.
12Muꞌin na väñädyeꞌ jịꞌchiyacsity in muꞌin jeñej jebacdyeꞌ in, meꞌ in, anic jayej dyijyedyeꞌ muꞌin, jeñej jebacdyeꞌ meꞌ dyijyi in. Mọꞌ jebacdyeꞌ naꞌiꞌ paj qui jibejĉan tŝọiꞌve judyeyaꞌ ujaiꞌ in, meꞌ buꞌyidye chimeꞌ muꞌin meꞌtyity q̂uinꞌ in. Jụꞌñis chuc jam chiqueꞌsiꞌ in jedyeꞌ chuc cạiꞌ mọꞌ, mọꞌ ñiñeꞌ mọmoꞌ in, yódyemꞌ jebacdyeꞌ o, meꞌ raꞌ ijac in, 13meꞌdye raꞌ vaꞌtacdyeꞌ cạiꞌ in. Junꞌ chuc ñịbeꞌ jịꞌcavacsaque in, meꞌdye raꞌ muꞌin chimeꞌ ñịbeꞌ jịꞌcavac in. Mọmꞌ dyijtuiꞌ in ĉụiꞌ maꞌjotyiti in aꞌc̣hisyaꞌ dyijyedyeꞌ aꞌsiꞌ muꞌin, itŝiꞌ tsị́cadyeꞌ muꞌin, meꞌ tsanꞌ mạij, där aꞌc̣his jämꞌtaqui in. Anic där tsịcaꞌ shupqui miꞌinyaꞌ, meꞌ tsanꞌ aꞌc̣his bäꞌyi in, uts na meꞌ väñädyeꞌyaꞌ jiꞌc̣hamꞌdyi miꞌinyaꞌ in judyeyaꞌ penꞌdyetunac in jämꞌdyeyaꞌ Jenꞌdyes säcsi miꞌin, muꞌin chimeꞌ jibityinac in, mọꞌ maꞌjotyeꞌ in.
14Jam memꞌ cạveꞌ in yiris p̂en, aty cạveꞌyaꞌ in mạꞌjeꞌ q̂uinꞌdyemꞌ meꞌtyeꞌ in, mijam noꞌbi juchajĉan in, jam mạꞌjeꞌ farajjeꞌ juchaj muꞌin. Chimeꞌdye seꞌ jaꞌyacsi in aꞌc̣hisyaꞌ dyijyedyeꞌ muꞌin jambiꞌ fer buꞌyity Jenꞌdyes bäꞌyity in, jeñej jibej meꞌ jịvaꞌchacsi in. Anic fer mạꞌjete querec̣ha in, muꞌ mọmoꞌ dyijtute in. Muꞌin meꞌtyity in tsäquiꞌsisĉandyety yụꞌtac in. 15Farajjeꞌ in mọꞌ rụijsis majmi, monꞌdyeꞌĉan bäꞌban in, cäc̣häꞌchubibajte dyijyedyeꞌ in muꞌsiꞌ Balaamsiꞌ jiquej, Beortyiꞌ ạvaꞌ muꞌ. Dyijyi querec̣havedyeꞌyaꞌ aꞌc̣hisyaꞌ carijtacdyeꞌ muꞌ, 16mọꞌdyes qui muꞌ fạraꞌjeyac juchadyeꞌyaꞌ jiquej muꞌ, ĉụiꞌtyiꞌdye bórico muꞌ fạraꞌjajiĉunꞌdyi, jeñej muntyiꞌ meꞌ p̂eyaqui muꞌ jebacdyeꞌ yédyeꞌĉandye, jajiꞌdyäquibiti shapudyeꞌ muꞌ.
17Muꞌin q̂uinꞌ väñädyeꞌ jịꞌchiyacsity in jeñej buꞌyi noria itŝis ojñiꞌ in, chimeꞌdye jeñej buꞌyi dyicbaꞌbadyeꞌ in, jeñej itŝis añej, vaꞌqueques tyiꞌmu, meꞌ buꞌyi fibiꞌ bäꞌyi in vaꞌcac raꞌ in. Muꞌin tsäquiꞌsisĉandyety in, Jenꞌ raꞌ vaꞌcacsequi mọjoꞌchasĉan tojmas. 18Fibiꞌnacdyeꞌtum p̂eyaqui in aniꞌ aniꞌyi in, itŝiꞌ jeꞌ dyijyedyeꞌ p̂eyaqui in. Muꞌin cäj jịꞌchiyacsi muꞌin in q̂uinꞌdyemꞌ c̣hoñity in muꞌinyaꞌ in cäjsis dyijyedyeꞌ cạiꞌtyiꞌ jiquej in, jéyacsi in junꞌ chuc aꞌc̣his mạꞌjeꞌ aꞌ muꞌin, meꞌ tupuj bäꞌyi in, meꞌ aꞌc̣hisyaꞌ dyijyedyeꞌ seꞌ jaꞌyacsi in, quivij jịꞌcaꞌnacseban camanꞌ in jiꞌpenacseban in. 19Väñädyeꞌyaꞌ jéyacsi in, yi in: "Cäc̣häꞌchutiñeꞌ jụijyaꞌ miꞌin ọij jiꞌchäyitidyeꞌ tsun, mọꞌyaꞌ raꞌ c̣hoñiꞌ miꞌin carijsisyaꞌ jiꞌchäyitidyeꞌ", yi in. Meꞌ tsanꞌ meꞌ yi in, muꞌindye qui namꞌ meꞌ úñedyeꞌĉan bäꞌyi in, ĉaĉaij na mọꞌ aꞌc̣his dyijyedyeꞌ muꞌin, mọꞌ mọmoꞌ bächäcsebiꞌ aꞌ muꞌin. Jeshaꞌ yirity muntyiꞌ jedyeꞌ chuc jabächäti, mọꞌdyemꞌ jaꞌayotuti, úñity shupquimꞌ. 20Tyi chuc chị́yetety in muꞌ Ayoꞌ tsun Jesucristo, Jiꞌc̣honsinꞌtyiꞌ tsun, c̣hoñi jụijyaꞌ in mọꞌyaꞌ ac̣hiꞌtacsisyaꞌ dyijyedyeꞌ jacches, quivij qui namꞌ camanꞌ dyijyeban jụijyaꞌ in, mọꞌdyemꞌ bächäcsebanꞌ, meꞌ camanꞌ jụijyaꞌ in, dadamꞌ qui raꞌ mujuꞌchaꞌ ñịbeꞌ cạveꞌ in jam jeñej jiquej jambiꞌdyemꞌ chị́yete jiquej in. 21Dadamꞌ raꞌ vaꞌtacdyeꞌ soꞌmac in muꞌin chị́yety tsanꞌ in mọꞌ rụijsis p̂eyacdyeꞌ Jenꞌsiꞌ muꞌ judyeyaꞌ vaꞌquequety in. Damꞌdye jämꞌ jam seꞌvepte in Jenꞌsiꞌ p̂eyacdyeꞌ in mọꞌ soꞌmacsis jiquej in. 22Muꞌin meꞌtyity in muꞌin jịꞌcätseꞌ in mọꞌ rụijsis p̂eyacdyeꞌ yiꞌ: "Jeñej yiris ac̣huj chạiꞌ chum judyeyaꞌ quivij jebaĉanꞌ chash mọꞌ", yocsiꞌ chimeꞌ yiꞌ: "Jeñej yiris cochij, meꞌ tsanꞌ jiꞌdyuc jämꞌsiꞌĉan ojñiꞌ, meꞌ tsanꞌ meꞌ quivij qui namꞌ bọjcaꞌĉan jịjcabanꞌ rätsäꞌñibunꞌ", meꞌ buꞌyi muꞌin shupqui in farajjeꞌtyiꞌ Jenꞌdyes in.
Currently Selected:
Jäqui'ves Pedros 2: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
