Jäqui'ves Reyes 17
17
Oseas muꞌ jadyiquity Israelĉan ayoꞌbuꞌyi
1Aty yiriꞌtac päräꞌ jiyiꞌ yómodyeꞌ tyiti ayoꞌbuꞌyi muꞌ Acaz Judáĉan, chat q̂uinꞌdyemꞌ muꞌ Oseas, Elatyiꞌ ạvaꞌ muꞌ, tiyacchuiꞌ ayoꞌbuꞌyi Israelĉan. Arajtac yómodyeꞌ ayoꞌbuꞌyi muꞌĉan Samariaĉan muꞌ. 2Muꞌ Oseas anic ac̣hiꞌ bäꞌyi Ayoꞌsiꞌyaꞌ vej muꞌ, jam tsanꞌ cätstacsi yoctyiꞌ Israelĉantyiꞌ ayoꞌ jiquej in, uyaꞌyaꞌ muꞌ ac̣hiꞌ bäꞌyi.#17:2 Jenꞌ jayuꞌti Asiriaĉantyiꞌ ayoꞌ paj qui jiꞌpenacsi Israeltyiꞌ vóshiꞌ in, jambiꞌ atsij muꞌ, muꞌ Isaías jäꞌmij p̂eyeꞌ.
3Muꞌ Asiriaĉantyiꞌ ayoꞌ Salmanasar tịj muꞌ, atsij väc̣häꞌtyitytum muꞌ, chutidyeij Israelĉantyiꞌ muntyiꞌ in, jiꞌpente muꞌ Oseas in, räjtumdye Israelĉantyiꞌ muntyiꞌ in, úñedyeꞌĉan yụꞌtac in. Muꞌ Salmanasar cọdyetacsi querec̣ha räjĉan yómodyeꞌ, anic daiꞌ farajjeyete in. 4Yirisĉan yómodyeꞌ muꞌ Oseas yocve dyijyi, caminve juteꞌ p̂eyacdyeꞌ ayodyes Egiptoĉantyidyes, So tịj muꞌsiꞌ, cọdyete tsanꞌ nọ́tacdyeꞌ paj qui tupuj jiꞌpenacsi muꞌin Asiriaĉantyiꞌ muntyiꞌ in. Chimeꞌdye muꞌ Oseas aty jam farajjeyete yómodyedyety querec̣ha muꞌ Asiriaĉantyiꞌ ayoꞌ. Muꞌ ayoꞌ aty chị́quiyaꞌ muꞌ jutacsi paj qui muꞌ tapjete in muꞌ Oseas, Israelĉantyiꞌ ayoꞌ, ĉärꞌtaquisĉan cạte in.
Jiꞌpenacsi in Samariaĉantyiꞌ in
5Chat qui muꞌ atsij Asiriaĉantyiꞌ ayoꞌ väc̣häꞌtyitytum muꞌ Israel siteꞌ in, jiꞌpenacsi muꞌĉan bäꞌyity in, meꞌdye chaꞌsheꞌ in mọꞌ Samaria, mọꞌ naꞌrutumsiꞌ bäꞌyedyeꞌ. Muꞌĉan cọtoij buꞌyi in meꞌdyes qui jam junꞌtyeꞌ siteꞌ in mijam shuban chimeꞌ in. Chibin yómodyeꞌ tyiti in, 6aty arajtac yómodyeꞌ tyiti muꞌ ayoꞌbuꞌyi Oseas chat q̂uinꞌdyemꞌ Asiriaĉantyiꞌ väc̣häꞌtyity in muꞌin siteꞌ Samaria in, muꞌĉan bäꞌyity in jiꞌpenacsi in. Jäcacsi in muꞌin Israeltyiꞌ vóshiꞌ in, yocve qui jịjijcayacsi in ĉụiꞌsiꞌĉan jac jịjijcayacsi in Asiriaĉan, muꞌĉan jiꞌbäꞌyacseban in Halahĉan, Gozánĉansiꞌ bäꞌyedyeꞌ, c̣hẹiꞌyaꞌ muꞌ cojiro Habor, judyeyaꞌ chimeꞌ jiꞌbäꞌyacsi in mọꞌin bäꞌyedyeꞌĉan in medo in.
7Muꞌ Jenꞌ Ayoꞌ muꞌin Israeltyiꞌ vóshiꞌ in, muꞌ yi paj qui muꞌin peñi in, muꞌin Asiriaĉantyiꞌ in meꞌ jiꞌpenacsi in, ĉaĉaij na muꞌin juchaj soꞌmetety Jenꞌ in, muꞌ jiꞌc̣honacsity ayoꞌsiꞌyaꞌ ferdyeꞌ Egiptoĉantyis jiquej judyeyaꞌ jiꞌshupcacsity Egiptoĉantyiꞌ jiquej. Muꞌin anic där juchaij in Ayoꞌsiꞌyaꞌ vej muꞌ, muꞌin cudyitity jämꞌtacdyeꞌcheꞌ in 8judyeyaꞌ cäc̣häꞌchucsebi yicdyeꞌ muꞌin Canaánĉan bäꞌyity jiquej in, muꞌin vaꞌcacsequity Ayoꞌ paj qui Israeltyiꞌ vóshiꞌ muꞌĉan bäꞌyi in. Chimeꞌtyitydye muꞌin cäc̣häꞌchucsebi aꞌc̣his dyijyedyeꞌ muꞌin Israelĉantyiꞌ ayoꞌ in soꞌmacsis muntyiꞌ jiquej in, joꞌmemes juchaj muꞌinsiꞌ in.
Currently Selected:
Jäqui'ves Reyes 17: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
