Tashches Tesalonicaĉantyidyes 3
3
1-2Dyijtucdyeꞌyaꞌ fer miꞌin, aty jam junꞌ dyichchutiyaꞌ yụ chat qui dyijyi yụ jiꞌyajcati taĉan yụ Atenasĉan. Muꞌĉan qui jutete yụ miꞌinyaꞌ muꞌ vojity tsun Timoteo, muꞌ carijtaquity Jenꞌdyes tsuntum yiriꞌyaꞌ. Meꞌ tsanꞌ yụ yirity jiꞌyajcati Atenasĉan,#3:1-2 Úñedyeꞌ 17:15 dyijtuyac qui namꞌ yụ paj qui muꞌ ĉucnac miꞌin paj qui muꞌ quivij fer buꞌyi yuꞌbunac anicyedyeꞌyaꞌ miꞌin judyeyaꞌ jiꞌmaꞌyibunac Jenꞌdyes chimeꞌ. 3Meꞌ raꞌ muꞌ paj qui jam peñi miꞌin, jịꞌĉojtiñeꞌyaꞌ mọꞌ ñịbedyes q̂uinꞌ. Chịj nash miꞌin, muꞌdye meꞌ Jenꞌ yuꞌsinꞌ tsun paj qui meꞌ jịꞌĉojtyejaꞌ ñịbedyes. 4Miꞌintumdyemꞌ jiquej tsun, jäꞌmij jéyac jiquej tsun miꞌin junꞌ chuc raꞌ meꞌ jịꞌĉojtyejaꞌ ñịbedyes tsun. Anicdye meꞌ cạ̈tsiꞌ mọꞌ p̂eyacdyeꞌ, aty cạvetiñeꞌ miꞌin. 5Mọꞌdyes yụ fer dyijtuyac miꞌin jiquej, vatyquej raꞌ peñi miꞌin, vatyquej raꞌ Sọyoꞌ jiꞌĉujtyinac, vatyquej raꞌ fibiꞌ mọmoꞌ voroꞌtyeyac tsun, meꞌ buꞌyi dyijyi yụ. Mọꞌdyes yụ jiquej jutete muꞌ Timoteo miꞌinyaꞌ chat muꞌ qui ĉucnac paj qui chị́yebiyac anicyedyeꞌ miꞌin vatyquej raꞌ yejĉoij tacaꞌ cäc̣häꞌchutinte Jenꞌ miꞌin.
6Aty atsijbanyaꞌ muꞌ Timoteo miꞌinsiꞌĉantyiꞌ bäꞌyedyeꞌ tsun tiĉunꞌbite p̂eyacdyeꞌ muꞌ tuyibunsiꞌ tsun, yiꞌ jụꞌñij chuc miꞌin. Jíbun tsun yejĉoij ca miꞌin anicjetinte Jenꞌ, judyeyaꞌ ca yejĉoij vaj meij mạꞌjitidyeij miꞌin. Muꞌ jin tsun junꞌ chuc miꞌin yejĉoij maꞌjodyeꞌtum dyijtutiĉaꞌ tsun miꞌin, judyeyaꞌ ca fer mạꞌjeꞌ cavitiĉaꞌ tsun miꞌin, yojdyemꞌ tsun u mạꞌjeꞌ cạveyac chimeꞌ miꞌin. 7Vojity, aty seꞌvaqui tsun junꞌ chuc bäꞌyi miꞌin judyeyaꞌ yejĉoij anicyi miꞌin, mọꞌ jiꞌjiijbubun táredyeꞌ tsun. Meꞌ tsanꞌ därsiꞌ ñịbedyes jịꞌĉojtyeꞌ tsun, meꞌ tsanꞌ fersiꞌ ñịbedyes jiꞌcaviyin tsun in, jiĉun qui namꞌ yuꞌtyin tsun ĉaĉaij na seꞌvaqui tsun junꞌ chuc bäꞌyi miꞌin. 8Fer buꞌyi Jenꞌdyes bäꞌyi jụijyaꞌ miꞌin, mọꞌ dadamꞌ fer buꞌyi ĉojtyiꞌĉan yuꞌbun tsun. 9Mọꞌdyes q̂uinꞌ tsun dadamꞌ mujuꞌchaꞌyaꞌ yoshoropaij jéte Jenꞌ tsun miꞌindyes, ĉaĉaij na miꞌin rụij cäc̣häꞌchutinte muꞌ Jenꞌ, mọꞌdyes tsun maꞌjoij yuꞌtiĉaꞌ tsun miꞌin, meꞌ maꞌjoij tsun miꞌindyes Jenꞌsiꞌyaꞌ vej muꞌ. 10Räjĉan yejĉoij tsun fercheꞌ cọdyete Jenꞌ tsun, mạij judyeyaꞌ tsedyedyeꞌ, paj qui tsun tupuj cạveĉadyeyac miꞌin, Jenꞌ yi jụijyaꞌ, paj qui tupuj chimeꞌ nọ́tyeĉadyeyac miꞌin, jụꞌñis chuc jayej miꞌin Jenꞌdyes.
11Mọꞌdyes tsun cọdyete Jenꞌ muꞌ Ạvatusinꞌtyiꞌ tsun, judyeyaꞌ muꞌ Jesucristo Ayoꞌ tsun paj qui muꞌ yi paj qui tsun muꞌve ĉọcyac. 12Chimeꞌdye tsun cọdyete Jenꞌ paj qui muꞌ ñútyinac paj qui miꞌin dadamꞌ yejĉoij vaj meij mạꞌjitidyeij miꞌin, judyeyaꞌ chimeꞌ paj qui dadamꞌ räj mạꞌjeyacsi muntyiꞌ miꞌin, yojdyemꞌ tsun u fer mạꞌjeyac miꞌin, meꞌdye raꞌ miꞌin chimeꞌ mạꞌjeyacsi muntyiꞌ in. 13Chimeꞌdye cọdyete Jenꞌ tsun paj qui ferdyeꞌ soꞌminac ĉojtyiꞌĉan miꞌin q̂uinꞌ, paj qui jam jụꞌñiij miꞌin Jenꞌsiꞌyaꞌ vej muꞌ, muꞌ Ạvatusinꞌtyiꞌ tsun, aty atsijbanyaꞌ muꞌ Jesús Ayoꞌ tsun, räj tucsebanyaꞌ muntyiꞌ muꞌ.
Currently Selected:
Tashches Tesalonicaĉantyidyes 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
