Tashches Juansi' 1
1
Cristo P̂eyacdyeꞌ buꞌyity judyeyaꞌ Tsạꞌchucsity
1Tsun sáñeꞌ ọij miꞌindyes p̂eijte tsun muꞌ P̂eyacdyeꞌ buꞌyity judyeyaꞌ tsạꞌchucsity. Itŝiꞌdyemꞌ jedyeꞌ mọꞌyamꞌ jiquej, aty muꞌ tạꞌcaty muꞌyaꞌ.#1:1 Juan 1:1 Tsun seꞌvepte p̂eyacdyeꞌ muꞌ, judyeyaꞌ cạvete tsun ĉụiꞌsiꞌyaꞌ vej tsun, judyeyaꞌ unyaꞌ tocoꞌjete chimeꞌ tsun. 2Atsijyaꞌ jiquej muꞌ Tsạꞌchucsity, tsun cạvete,#1:2 Juan 1:14,18 mọꞌdyes qui tsun jéyacsi muntyiꞌ in judyeyaꞌ miꞌin chimeꞌ jịꞌchiqueyeyac junꞌ chuc muꞌ Tsạꞌchucsity muntyiꞌ, muꞌ yụꞌtacsi paj qui Jenꞌyaꞌ bäꞌyi in. Muꞌ Jenꞌyaty atsij jiꞌcaviti tsunyaꞌ, Jenꞌ jiꞌcaviyin tsun. 3Tsun qui jịꞌchiqueyeyac miꞌin ĉaĉaij na cạvete tsun judyeyaꞌ seꞌvete tsun, paj qui Cristoty miꞌin paj qui vaj cäts yiriꞌyaꞌ cäc̣häꞌchupja Jenꞌsiꞌ dyijyedyeꞌ muꞌ, muꞌ Ạvatusinꞌtyiꞌ tsun judyeyaꞌ Jesucristosmun dyijyedyeꞌ chimeꞌ, Jenꞌtyiꞌ Ạvaꞌ muꞌ. 4Mọꞌdyes tsun q̂uinꞌ ọij jéyac miꞌin sánacdyeꞌcheꞌ paj qui cätssistum maꞌjodyeꞌ bäꞌyi tsun.
Jenꞌ mạij buꞌyity
5Ọij nash p̂eyacdyeꞌ jin tsun muꞌ Jesucristo, mọꞌdye p̂eyacdyeꞌ jiꞌjiyeyac tsun, mọꞌ yiꞌ: Jenꞌ mạij buꞌyity, muꞌyaꞌ itŝiꞌ méquis tojmas. 6Meꞌ tsanꞌ yéjaꞌ tsun: "Yụ cäc̣häꞌchuptety Jenꞌsiꞌ dyijyedyeꞌ muꞌ", yéjaꞌ jụijyaꞌ, yejĉojaꞌ qui namꞌ tojmadyeꞌĉan bäꞌjaꞌ jụijyaꞌ tsun, väñädyeꞌ shupquiꞌ mọꞌ p̂eyacdyeꞌ tsun, mijam rụij bäꞌjaꞌ chimeꞌ. 7Cäc̣häꞌchujaꞌ jụijyaꞌ mọꞌ mạijquedyeꞌ muꞌ, yojdyemꞌ muꞌ Jenꞌ u mạijquedyeꞌĉan bäꞌyi, meꞌ raꞌ chat vaj cäts cäc̣häꞌchupja Jenꞌsiꞌ dyijyedyeꞌ muꞌ, judyeyaꞌ raꞌ muꞌsiꞌ chäsh muꞌ Jesucristos, Jenꞌtyiꞌ Ạvaꞌ muꞌ, mọꞌ raꞌ c̣hiconꞌjityisinꞌ räj juchaj tsun.
8Chimeꞌdye yéjaꞌ jụijyaꞌ tsun: "Itŝiꞌ juchaj yụ", yéjaꞌ, ĉụiꞌ väñätutiĉaꞌ, mijam méquis rụijsis dyijyedyeꞌ meꞌchujaꞌ. 9P̂eijjaꞌ na juchaj jụijyaꞌ tsun chat qui raꞌ muꞌ Jenꞌ vayacjibusinꞌ juchaj tsun, judyeyaꞌ raꞌ c̣hiconꞌjibusinꞌ räj aꞌc̣his dyijyedyeꞌ ĉojtyiꞌĉansiꞌ tsun, ĉaĉaij na muꞌ Jenꞌ anic rụijtyity judyeyaꞌ jịꞌcätsety p̂eyacdyeꞌ muꞌ. 10Tsun yéjaꞌ jụijyaꞌ: "Itŝiꞌ juchaj yụ", yéjaꞌ, jeñej väñäijtyiꞌ Jenꞌ, meꞌ shupquiꞌ p̂eyacdyeꞌ tsun, mijam chimeꞌ meꞌchupja p̂eyacdyeꞌ muꞌ yoj yiꞌdyemꞌ sánacdyeꞌ um räj muntyiꞌ juchajtum tsun.
Currently Selected:
Tashches Juansi' 1: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
