रूमी 16

पउलूसराः सलाम

1ने अजी बोपोहकूतिंग, अपे ईंगपे अयूम। पीबे#16:1 होयाःकून करे ननाँयग पीबे रूमी सहररिकुःआ बिसवासी होड़कू लगा पउलूसराः चिठीय इदीतेरा। ञावीग मी होड़ अइमी इदा। हाँय किंकिरिया सहरराः मीटोंग कलसियारीग सेवकीन हवे। 2हाँय ईंग लगा अरू मुरुक बगरा होड़कू लगा होंय संघरावातेडलेःआ। हनालगा हाँय अपे एचेरेय सेन मेला नपायतेपे नेत-नेवारगेय अरू अपे भगवानरिकुःआ सुद होड़कूपे मान मरजइतता हनन इया हाँय होँपे संघरावा।

3ईंग सुदा ईसू मसीकिन सेवाता हँकिनाः पिरिसकी अरू अकिला#मूक चेला 18:1-3,18-26 ईंग अगीतेपे सलामगोडकिन। 4हँकिन ईंग लगा गुजुः लगा हों सपड़ावतकिन दोहोना। हनालगा ईंग, अरू जमा बेगर एहूदा बिसवासी होड़कू हँकिनले धनियाबादतना। 5हँकिन ओड़ाःरेकू जुमाःता हँकुःआ जमा बिसवासी होड़कू ईंग अगीतेपे सलामगोडकू।

इपेनितूस ईंगरीग दुलार सउंगता हवे। हाँय आसिया राइजरे जमाकू अते मड़ंग, ईसू मसी एचेरेय बिसवासकेरा। अपे हाँयपे सलामगोड। 6अपे लगा मुरुक मिहनइत घड़ीने सेवाकेरा, हाँयग मरियमपे सलामगोड। 7अंदरुनिकूस अरू उनियास ईंग अगीतेपे सलामगोडकिन। हँकिन ईंगरिकिनाः जइत सगा होड़किन हवे अरू ईंग सुदा जेहेलरेकिन दोहोना। ईसूरिकुःआ मूक चेलाकूतेनते हँकिन मान मरजइतगे इया होड़किन दोहोना अरू हँकिन ईंग अते मड़ंग ईसू मसी एचेरेकिन बिसवासकेरा। 8अंपलियातूस ईसू मसी एचेरेय बिसवासगेतना। अरू हाँय ईंगरीग दुलार सउंगता हवे। अपे ईंग अगीतेपे सलामगोडेय। 9उरबानूस अलेरीग सेवा देंगवा होड़ हवे अरू इसताकूस ईंगरीग दुलार होड़ हवे। ईंग अगीते हँकिनपे सलामगोड। 10ईसू मसी जुकूर इदानिया हाँयग अपिलेसपे सलामगोड। अरिसतोबुलुस ओड़ाःरिकुःआ जमा बिसवासी होड़कूपे सलामगोड। 11ईंगरीग जइत सगा हेरोदियोन ईंग अगीतेपे सलामगोडेय। नरकिसूस ओड़ाःरिकुःआ जमा बिसवासी होड़कूपे सलामगोड।

12मुरुक मिहनइत घड़ीन परबूकिन सेवाता हँकिनाः अइमीकिन तुरुपिना अरू तुरुपिसा ईंग अगीतेपे सलामगोडकिन। पिरिसीस ईंगरीग सउंगतायीन हवे। अरू हाँय हों मुरुक मिहनइत घड़ीन परबूय सेवाकेरा। हाँयग अइमी ईंग अगीतेपे सलामगोडेय। 13परबू सुनावकिरिया हाँयग होड़ रुपूस अरू हाँयरीग एंगात ईंगरीग अया इया इदानिया, हँकिन बना होड़ ईंग अगीतेपे सलामगोडकिन। 14असुंगकिरितूस अरू पिलिगोन अरू हिरमइस अरू पतरूबास अरू हेरमास अरू हँकू सुदा इदानकुःआ हँकुःआ जमा बिसवासी होड़कू, हँकू जमाकू ईंग अगीतेपे सलामवाकूपे। 15पिलुलूगूस अरू जुलिया अरू ओलुमपास अरू नेरियूस अरू हाँयरीग मेसेत अरू हँकू सुदा इदानकुःआ जमा बिसवासी होड़कू ईंग अगीते मसी सलामगोडकू। 16अपे जमा बिसवासी होड़कू सुद ओंगोल अरू मसी दुलारतेपे सलाम होड़ेंग। मसीराः जमा कलसियारिकुःआ होड़कू अपेकू सलामपेतना।

टुटीग चेड

17दो ईंगरिकुःआ अजी बोपोहकूतिंग, अपे एचेरे गोड़न-पइयनकियानखन अरू मीटोंग कतायिंग असेयतना, होड़कू अपे चेडकिया हना चेडतो अते एटाः इया चेडकेडखन होड़कूकू हिगार हटिंगगोडकूता अरू होड़कू बिसवासतेकू एचे चलाःगोडकूता। दो हँकुःआ होड़कू सुदा सवासितीपे दोहोन अरू हँकू अते तोरेपे दोहोन। 18नाःआ इयाकू एचेयता हँकुःआ होड़कू अबूरीग परबू ईसू मसी मेरकू सेवायता, मनदो अँननकू नफा पवाः लगाकू सेवातना। हँकू अँनकूराः बोनावतो बड़राते सुधा होड़कूकू बहकावगोडकूताकू। 19मनदो अपे बदीरे जमा होड़कू सुसुदीतना, हँकू भगवानराः कताकूनकू मनाःता, माःआन। हनालगा ईंग अपे बदीरे मुरुक बहालरे इदानिंगा। मनदो अपे बदीरे नाःआ इयायिंग चहाःतना, अपे नपाय कता बदीरे कनहूनदारकू अरू बेलूर कता बदीरे बेगर गारबार होड़कूपे बड़ाँव जुवाः। 20अबू सलसते एमेवाबूता हाँयग भगवान, अपेराः काटते ओहेन कलउ एचे रमदावकेडखन हाँयराः जंगरे चबागोडता।

अबूरीग परबू ईसू मसी अपेराः जीवे मयावागोड ञवन।

21ईंगरीग सेवा देंगवा होड़ तिमुतियूस अपेय सलामवातना। हनन इया ईंगरिकुःआ जइत सगा होड़कू लुकियूस अरू एसोन अरू सोसिपतरूस अपेकू सलामवातना।

22ईंग लगा नाःआ चिठीय ओजाःकेरा, हाँयग तिरतियूस अपेय मसी सलामतना।

23गयूसराः ओड़ाःरे ईंग दोहोनता अरू नंडाकुःआ बिसवासी होड़कू हाँयराः ओड़ाःरेकू जुमाःता। हाँय अपेय सलामतना। नाःआ सहरराः#16:23 कुरिंती सहर बदीरे कतायतना। आन-धानकूनराः हातपात होड़ इरासतूस अपेय सलामवातना। अरू कुवारतोस हों अपेय सलामतना। 24[अबूरीग परबू ईसू मसी अपेराः जीवे मयावागोड ञवन।]

टुटीगगुः बेलाराः जाग

25भगवानराः जाग होयाः। हाँय ईसू मसीराः नपाय सरवन ईंग अरू एटाःकू परसारकेड अते अपेराः जीव बिसवासरेय एचे बड़ियाड़ अवेपेता। नाःआ नपाय सरवन मड़ंग जूग वरीते जमा जइत होड़कू लगा ओकोत इया दोहोना। 26मनदो नुँहू हना सरवन भगवान अनँयगराः बड़रा कता होड़कूते अरू सगर सइट वरीय दोहोनता हाँयग भगवानराः हुकुमते जमा जइत होड़कू एचेरेय एचे उदुःवाडकुःआ, जेमहा जमा होड़कू हाँय एचेरे बिसवासकेडखन हाँयराः हुकुम मनाः होड़कूकू बड़ाँव जुवाः। 27मिनीटोंग भगवान इदा अरू जमा इयाःआ कनहून हनाँय एचेरे इदा। हनालगा ईसू मसी एचेकेरा, हना अते जमा होड़कू भगवानकू जागगोड ञवन। आमीन!

Currently Selected:

रूमी 16: kfp

Highlight

Copy

Compare