लूका 6:27-49

मनदो ईंगराः बड़रापे अअयूमतना हँकू एचेरेयिंग कतायतना, अपेरिकुःआ मुदइ होड़कूपे अलार-दुलार। अपेकू आड-बेकारवाता हँकू सुदा नपायपे एचेय। अपेकू सती-सरापता हँकूपे भलावा अरू अपेकू लंदा एरांगवाता हँकू लगापे अरजी। तोनोंगीग अपेराः खउना गलूय चपाड़ दो, डिरही गलू हों लगापे एमेगोड। तोनोंगीग अपेराः सेरमो तुसिंगतो सोनहेय लुड़ी गोःगे दो, आमराः अंगा हों गोः लगा अहापे रोंकावगेय। तोनोंगीग होड़ अपे एचेरेय असेयता, हनापे एमेगोड अरू तोनोंगीग अपे अते तोनोंगाः जिनिसे गोःया दो हना अहापे असे कुदाय। एटाः होड़कूते अपे चहाःतना हनन इया हँकू सुदापे एचेय। अपेकू दुलारता हँकू एकलापे दुलार दो, हनारे अपे चिला नपाय बुतापे एचेकेरा? कसूर होड़कू हों अँनकूकू दुलारता हँकुःआ होड़कूकू दुलारता। अपेकू नपायता हँकुःआ होड़कू एकलापे नपाय दो, हनारे अपे चिला नपाय बुतापे एचेकेरा? कसूर होड़कू हों नान इयाकू एचेयता। अपे तोनोंगीग एचेरे पइंचा एमेवाडखन गोः कुदागे लगापे ओंगले दो, हनारे अपे चिला नपाय बुतापे एचेकेरा? कसूर होड़कू हों एमेकेडखन गोः कुदागे लगाकू ओंगलेता। मनदो अपे मुदइकूपे दुलार अरू नपायकूपे। ईंग गोः कुदायतिंग, माःआन ओंगोलवाडखन अलोपे एमेय। नाःआ इया अपे एचेयतान दो, सतायरे अपे भाबी भगवानरिकुःआ लइंकू हवे, माःआन एटाः होड़कू एचेरेपे उदुःगुःता अरू अपे लगा भगवान मरंग इमाने एमेता। भगवान मेरकू धनियाबादगेयता हँकुःआ होड़कू अरू अँननकूराः नफा लगाकू ओंगलेता हँकुःआ होड़कू होंय सोगावकूता। अपे ईंगपे अयूम, अपेरीग अपांग भगवान सोगावाकूताय, हनन इया अपे हों एटाः होड़कूपे सोगावा। तोनोंगीग अहापे फड़ियावगेय दो, तोनोंगीग अपे हों ओरोकू फड़ियावतेडपेःआ। तोनोंगीग मेरपे बदीगेय दो, अपे हों ओरोकू बदीतेडपेःआ। एटाःकूराः कसूरपे बराव एंडागे दो, भगवान हों अपेराः कसूरे बराव एंडागोडता। अपे एटाः होड़कू बगरापे एमेवाकू दो, भगवान हों अपे लगा बगराय एमेवापेता। डिलिंगीरे हुड़ू कसाव पेरेगकेडखनकू एंडाता हान इया अपे लगा हों भगवान एमेयता। अपे सोंगगेता हनानाः तंबीते अपे लगा हों भगवान सोंगगेता।” हनते ईसू मीटोंग कहड़ीय कताया, “अंधा होड़ अनंधा होड़ दूरे उदुः अवेवायताय जा? ओरो! बना होड़ डोडहारे हमाकिन कसड़ जुवाःता। चेला अनँयग गुरुजी अते मरंग कोवाया। गुरुजी चेलाय चेडगोडता हना तयोमरे हाँयग चेला गुरुजी इयाय होयाःता। आम सउंगताराः मेडरे चुबाः बोलोकिया हना गुंडाम ञेलतना मनदो अनम मेडरे बोलोकिया हना चइला चिला लगा मेरेम ञेञेलतना? आम अनम मेडराः चइला मेरेम ञेलता दो, करा उड़ी आम सउंगता एचेरेम कता अवेयता, ईंग आम मेडरे बोलोकिया हना गुंडायिंग उडुंगगोडता, माःआन? ने पचघुचिया होड़, मड़ंगरे आम मेडरे बोलोकिया हना चइलाम उडुंगवा। हनाते आम सउंगताराः मेडरे बोलोकिया हना गुंडा उडुंग लगा नपायतेम ञेल अवेयता। तोनोंगाः नपाय सींग दूबरे आड जोःओ मेर जोःता अरू आड सींग दूबरे नपाय जोःओ ओरो जोनेना। जमा सींग दूब जोःओत ञेलकेडखनबू सिनहागोडता। पोटवा दूबते लुवा जोःओ अरू पुटूस दूबते अंगूर जोःओ मेरबू गोडता। नपाय होड़ अनँयग नपाय जीवते नपाय नपाय बड़राय कताता अरू नपाये एचेयता। अरू आड होड़ अनँयग आड जीवते बेलूर बेलूर बड़राय कताता अरू बेलूरे एचेयता। आहते उडुंगगुःता हना बड़राराः सोर जीव हवे। ईंग ईसूरीग चेला हवे, माःआन अपे कतनता, मनदो ईंगराः बड़रा मेरपे मनाःता दो चिला लगा परबू परबू, माःआन ईंगपे राःतना? ईंग एचेरे वेगकियानखन ईंगराः कताय मनाःता, हाँय करा इयायीग होड़ हवे हना ईंग अपे एचेरे उदुःगेतिंग। हाँय, ओड़ाः तुला मेला गनाहीर गडाकेडखन चटइन चोटरेय नेवतेरा हाँयग होड़ इया इदानिया। दो नईरे दाः पेरेगकियानखन ओड़ाःरे टपूयान। हना ओड़ाः बड़ियाड़ तुलात दोहोना हना अते ओड़ाः मेर रूबगान। ईंग बड़रा मेरेय मनाःता हाँयग होड़, बेगर नेवते बितीलरे ओड़ाःए तुलातेरा, हाँयग होड़ इया इदानिया। दो नईरे दाः पेरेगकियानखन ओड़ाःरे टपूयान। दो हना ओड़ाः रूब एंडायान अरू ओड़ाःराः कहिसाः मेर बनसावगान।”