К Римлянам 9
9
Кияӷныӷым Накмикыхкӣ Югыт
1Апыӷьюкақа лъпысинун ипаңӯқ. Иқлъыңиқңунӷитуңа қаюҳлъяк Христосым пика̄ңа, Аглыӷналӷӣм Таӷныӷамлъю иглыӷутңўа̄к умьюгахка. 2Уңипа̄сюгамси хўатын: қивӷуҳлъягӯңа қаюҳлъяк қа̄мхурухлъяк илюмкун на̄ңигалңуӷмың ақниҳқуткыҳлъягўа̄нка 3юлгутынка, Иудеит. Пияқлъыгуяқан, лъңит апалъюқлъюки Кияӷныӷымтуқ нанқихтыкаңаңа аӷью̄ӷналюңа, иқитыстыкаңаңалъю Христосымың. 4Юлгутынка Израилым киңунқӣ, Кияӷныӷым алъюҳқикақӣ лъңанун авақута̄люки. Алӣҳтыкақа̄ ниӷуҳқылъыни лъңитнун. Акықӯқақӣ сялъыҳқаминың лъңитнун. Тӯныхкақӣ Лӣлиҳтӯсяминың. Апыҳтуқақӣ лъңанун манигӯтылъыҳқамың ылъқуӷулъюки. Акықӯқақӣлъю қуяслъықнилюки қа̄ткыхкаңатни. 5Киңунқӣт сивунықсюхўа̄мта, та̄кутхун киңуныҳтыхун Христос алъхықа̄гуқ югулюни. Лъңа Кияӷныӷӯқ иглыӷутилӷӣ сямың тамаҳа̄ның. Усюқылъыңи қӯнпырухлъяк кынлыңуна̄н! Аминь.
6Кияӷныӷа̄м акықусяни пимаңитагӯ Израилыӷмӣнун? Нака̄! Акықусяни пикақа̄ лъңитнун, иўырңа иляңинаҳӣ киңунӷи Израилым Израилыӷмӣпигӯт. 7Иляңинаҳӣлъю Авраамым киңунӷи лъңан авақутапӣкӣ. Кияӷныӷым пикақа̄ Авраам хўатын: «Киңунӷыт лъпынун акықусянка Исаакакун аюқсяҳқа̄гут». 8Та̄на хўатын писӣгуқ, иляңи авақутат алъхықат Авраамымын авақутақынӷитӣ Кияӷныӷым. Иўырңа алъхықаҳӣна̄т Кияӷныӷым акықуся̄кун Авраамымун киңуныпӣкӣ Авраамым. 9Кияӷныӷым акықуся̄ Авраамымун хўатытуқ: «Аюмиқун утыӷниқума хўатын лъӣқан Сарра иӷныңылъықуқ».
10Та̄на Саррам иӷныӷа Исаакыңӯқ, сивуныҳпут. Нулиҳтуӷлюни Ревеккамың, атака̄к малӷик иӷныӷыхкынка Ревеккам. 11-12Талўа сялин алъхылъҳилъюкык, сялинлъю пиңигалъюкык пинилӷӣмың налиӷмың сыӷлыӷмың, Кияӷныӷым пикақа̄ Ревекка: «Нуйыклъӣм қыпҳа̄лъықа̄ уюқлъиқ». Атанық таўатын пика̄гуқ лӣгикысқылъюку лъңинаӷми накмӣҳтыңунилюни сялъыҳқаминың. Кияӷныӷым накмикыхкақа̄ та̄на иӷнық қаюҳлъяк лъңаңӯқ Кияӷныӷым туқлъюӷьюка̄. Накмикыхкақынӷита̄ қаюҳлъяк та̄м иӷныӷым сяңўа̄ пикақутаңаның. 13Акузитни Игақыхкани игақыхка̄лӷӣ: «Пиниқыхкақақа Иаков, нақам угумикыхкақақа Исав».
14Сямыңʼңам пинақыстыху та̄на? Кияӷнық анахута̄? Йыӷлыгилъю! 15Қаюҳлъяк Моисей хўатын пикақа̄:
«Наңлъыхтаҳлъықуңа китумун алңунак наңлъықсяҳқамнун;
нафуҳтаҳлъықуңа китумун алңунак нафуқсяҳқамнун».
16Ынка̄ңам югыт алъхыҳтыпагниңита̄т Кияӷныӷым наңлъыхталъҳа пиюклъюку налиӷмың сялъыӷмыхтыхун. Кияӷныҳӣна̄гуқ накмӣӷьяҳқақ наңлъыксяҳқаминун. 17Акузитни Игақыхкани игақңа̄қ Кияӷныӷым пикақа̄ Фараон хўатын: «Умӣлгуҳтыстыкақамкын кылгунъалюку аҳтуӷьяҳқа̄нӷилъқа лъпыгун. Ынка̄м югыт нунатаҳа̄ни тамаҳа̄ни уңипақылъықа̄т а̄тқа». 18Ынка̄м Кияӷныӷым наңлъыгьягуткаюга̄ кина алңунак пиюкыхкани, пиныҳлъю̄хтыстақа̄лъю кина алңунак пиюкыхкани.
Кияӷныӷым Угумиюлъҳалъю, Наңлъыхталъҳалъю
19Ынка̄м а̄плъықаҳпыңа хўатын: «Кияӷнық таўатытңукан, сяңанңам нанқихлъықаки килъю алңунак аӷью̄ӷьяҳқа̄люки? Китум алңунак айгӣнаӷьяҳқақынӷита̄ Кияӷныӷым пиюкылъҳа». 20Иўырңа кинаңузин, югми, выӷусна̄скын Кияӷнық? Қикумың улима̄ӷым сягныӷым а̄псигата̄ улимастыни хўатын: «Сяңама хўатылъюңа улимазиңа?» 21Югым қикумың сягныңлъяҳтым пиюкылъыӷмитун атуқсяҳқақа̄ қику. Улимаюкумикык ма̄лӷук ата̄симың қикумың пияҳқақа̄к, а̄лъҳа мыгнуналӷӣмун атӯлюку, иляңа сямун алңунак атӯлюку.
22Кияӷныӷым кылгусюкақа̄ угумиюлъыҳлъяни, лӣсимакысюга̄лъю аҳтуӷьяҳқа̄нӷилъыни. Иўырңа нуқытунъыҳпакақӣ нанқихтыкани на̄фқынъалюки. 23Таўатын пика̄гуқ лӣсимакысқылъюку ниӷуҳқылъыҳлъяни наңлъыкыхкаминун. Ята̄ҳқыкыстақақӣ лъңитнун алъхыҳтысқылъюку ниӷуҳқылъыни. 24Талўа хўаңкуталъю туқлъюқақӣнкут, нака̄н Иудейяңинаӷның иўырңа язычнигныңлъю. 25Осиям ӯкналиқылъҳани Кияӷнық пика̄гуқ хўатын язычнигның:
«Тама̄кут юкынӷилъкынка, атиҳлъықанка: “Югынка”.
Тама̄кут югыт пиниқынӷилъкынка, атиҳлъықанка: “Пиниқыхканка”.
26Таўани Кияӷныӷым уңипа̄тфигитни: “Юкынӷитамси”,
таўанилъю атиҳлъықӣт:
“Авақутӣ уңувалӷӣм Кияӷныӷым”».
27Исаиям акилӷӯткыхкақа̄ Израиль хўатын:
«Қайўа Израилыӷмӣт ысным қына̄взыӷа̄тун угляҳтаткалиӷңа̄та,
таўалъӣма қафсинкӯраҳа̄т югулилъыңьяҳқа̄гут,
28қаюҳлъяк Атанӷым кима̄ўилъңунани нанқихтыңъўа̄ҳлъықӣ нунам юги».
29Сивунӷани Исаиям пинақнилъҳатун аюқуқ:
«Атанӷым аҳтуӷьяҳқаҳа̄нӷилңӯм сӣпусимаңисяқаңилъю киңуныӷмың,
қамахтыңъўа̄ӷлюта на̄фқылъыңнаяҳтукут Содомылъю, Гоморрамлъю ныҳлъягыхкытун».
Израилыӷмӣт Ухпынӷитылъҳат
30Сямыңʼңам пилъықыста? Язычнигыт, лъңитның налъҳусяӷнақуткумаңитут Кияӷныӷмун, иўырңа Кияӷныӷым налъҳусяқақӣ ылъқуӷутңалъыӷминун апалъюқлъюку ухпықилъҳат. 31Израилыӷмӣт малиҳқутақнақуткыхка̄гут Лӣлиҳтӯсянун ылъқуӷутңаналютың Кияӷныӷмун, иўырңа пиля̄тақумаңитут. 32Сяңамың пиля̄тақунӷитат? Қаюҳлъяк налъҳусяӷнақуткылӷӣт лъңитның Кияӷныӷмун сялъыӷмыхтыхун, ныӷьюкыхпына̄н Кияӷныӷмун налъҳусӣсқылъютың ылъқуӷутңалъҳанун. Ынка̄м на̄хтақут «на̄хтусикун уйӷахкун». 33Игақыхка̄лӷӣ Акузитни Игақыхкани хўатын:
«Ӣи, Сиоными ныкыхтақа уйӷак югыт на̄хтысқылъюки,
та̄м уйӷагым иқуслъықӣ.
Иўырңа кина алңунак ухпықуми лъңакун кайңуюгна̄нӷитуқ».
Currently Selected:
К Римлянам 9: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
К Римлянам 9
9
Кияӷныӷым Накмикыхкӣ Югыт
1Апыӷьюкақа лъпысинун ипаңӯқ. Иқлъыңиқңунӷитуңа қаюҳлъяк Христосым пика̄ңа, Аглыӷналӷӣм Таӷныӷамлъю иглыӷутңўа̄к умьюгахка. 2Уңипа̄сюгамси хўатын: қивӷуҳлъягӯңа қаюҳлъяк қа̄мхурухлъяк илюмкун на̄ңигалңуӷмың ақниҳқуткыҳлъягўа̄нка 3юлгутынка, Иудеит. Пияқлъыгуяқан, лъңит апалъюқлъюки Кияӷныӷымтуқ нанқихтыкаңаңа аӷью̄ӷналюңа, иқитыстыкаңаңалъю Христосымың. 4Юлгутынка Израилым киңунқӣ, Кияӷныӷым алъюҳқикақӣ лъңанун авақута̄люки. Алӣҳтыкақа̄ ниӷуҳқылъыни лъңитнун. Акықӯқақӣ сялъыҳқаминың лъңитнун. Тӯныхкақӣ Лӣлиҳтӯсяминың. Апыҳтуқақӣ лъңанун манигӯтылъыҳқамың ылъқуӷулъюки. Акықӯқақӣлъю қуяслъықнилюки қа̄ткыхкаңатни. 5Киңунқӣт сивунықсюхўа̄мта, та̄кутхун киңуныҳтыхун Христос алъхықа̄гуқ югулюни. Лъңа Кияӷныӷӯқ иглыӷутилӷӣ сямың тамаҳа̄ның. Усюқылъыңи қӯнпырухлъяк кынлыңуна̄н! Аминь.
6Кияӷныӷа̄м акықусяни пимаңитагӯ Израилыӷмӣнун? Нака̄! Акықусяни пикақа̄ лъңитнун, иўырңа иляңинаҳӣ киңунӷи Израилым Израилыӷмӣпигӯт. 7Иляңинаҳӣлъю Авраамым киңунӷи лъңан авақутапӣкӣ. Кияӷныӷым пикақа̄ Авраам хўатын: «Киңунӷыт лъпынун акықусянка Исаакакун аюқсяҳқа̄гут». 8Та̄на хўатын писӣгуқ, иляңи авақутат алъхықат Авраамымын авақутақынӷитӣ Кияӷныӷым. Иўырңа алъхықаҳӣна̄т Кияӷныӷым акықуся̄кун Авраамымун киңуныпӣкӣ Авраамым. 9Кияӷныӷым акықуся̄ Авраамымун хўатытуқ: «Аюмиқун утыӷниқума хўатын лъӣқан Сарра иӷныңылъықуқ».
10Та̄на Саррам иӷныӷа Исаакыңӯқ, сивуныҳпут. Нулиҳтуӷлюни Ревеккамың, атака̄к малӷик иӷныӷыхкынка Ревеккам. 11-12Талўа сялин алъхылъҳилъюкык, сялинлъю пиңигалъюкык пинилӷӣмың налиӷмың сыӷлыӷмың, Кияӷныӷым пикақа̄ Ревекка: «Нуйыклъӣм қыпҳа̄лъықа̄ уюқлъиқ». Атанық таўатын пика̄гуқ лӣгикысқылъюку лъңинаӷми накмӣҳтыңунилюни сялъыҳқаминың. Кияӷныӷым накмикыхкақа̄ та̄на иӷнық қаюҳлъяк лъңаңӯқ Кияӷныӷым туқлъюӷьюка̄. Накмикыхкақынӷита̄ қаюҳлъяк та̄м иӷныӷым сяңўа̄ пикақутаңаның. 13Акузитни Игақыхкани игақыхка̄лӷӣ: «Пиниқыхкақақа Иаков, нақам угумикыхкақақа Исав».
14Сямыңʼңам пинақыстыху та̄на? Кияӷнық анахута̄? Йыӷлыгилъю! 15Қаюҳлъяк Моисей хўатын пикақа̄:
«Наңлъыхтаҳлъықуңа китумун алңунак наңлъықсяҳқамнун;
нафуҳтаҳлъықуңа китумун алңунак нафуқсяҳқамнун».
16Ынка̄ңам югыт алъхыҳтыпагниңита̄т Кияӷныӷым наңлъыхталъҳа пиюклъюку налиӷмың сялъыӷмыхтыхун. Кияӷныҳӣна̄гуқ накмӣӷьяҳқақ наңлъыксяҳқаминун. 17Акузитни Игақыхкани игақңа̄қ Кияӷныӷым пикақа̄ Фараон хўатын: «Умӣлгуҳтыстыкақамкын кылгунъалюку аҳтуӷьяҳқа̄нӷилъқа лъпыгун. Ынка̄м югыт нунатаҳа̄ни тамаҳа̄ни уңипақылъықа̄т а̄тқа». 18Ынка̄м Кияӷныӷым наңлъыгьягуткаюга̄ кина алңунак пиюкыхкани, пиныҳлъю̄хтыстақа̄лъю кина алңунак пиюкыхкани.
Кияӷныӷым Угумиюлъҳалъю, Наңлъыхталъҳалъю
19Ынка̄м а̄плъықаҳпыңа хўатын: «Кияӷнық таўатытңукан, сяңанңам нанқихлъықаки килъю алңунак аӷью̄ӷьяҳқа̄люки? Китум алңунак айгӣнаӷьяҳқақынӷита̄ Кияӷныӷым пиюкылъҳа». 20Иўырңа кинаңузин, югми, выӷусна̄скын Кияӷнық? Қикумың улима̄ӷым сягныӷым а̄псигата̄ улимастыни хўатын: «Сяңама хўатылъюңа улимазиңа?» 21Югым қикумың сягныңлъяҳтым пиюкылъыӷмитун атуқсяҳқақа̄ қику. Улимаюкумикык ма̄лӷук ата̄симың қикумың пияҳқақа̄к, а̄лъҳа мыгнуналӷӣмун атӯлюку, иляңа сямун алңунак атӯлюку.
22Кияӷныӷым кылгусюкақа̄ угумиюлъыҳлъяни, лӣсимакысюга̄лъю аҳтуӷьяҳқа̄нӷилъыни. Иўырңа нуқытунъыҳпакақӣ нанқихтыкани на̄фқынъалюки. 23Таўатын пика̄гуқ лӣсимакысқылъюку ниӷуҳқылъыҳлъяни наңлъыкыхкаминун. Ята̄ҳқыкыстақақӣ лъңитнун алъхыҳтысқылъюку ниӷуҳқылъыни. 24Талўа хўаңкуталъю туқлъюқақӣнкут, нака̄н Иудейяңинаӷның иўырңа язычнигныңлъю. 25Осиям ӯкналиқылъҳани Кияӷнық пика̄гуқ хўатын язычнигның:
«Тама̄кут юкынӷилъкынка, атиҳлъықанка: “Югынка”.
Тама̄кут югыт пиниқынӷилъкынка, атиҳлъықанка: “Пиниқыхканка”.
26Таўани Кияӷныӷым уңипа̄тфигитни: “Юкынӷитамси”,
таўанилъю атиҳлъықӣт:
“Авақутӣ уңувалӷӣм Кияӷныӷым”».
27Исаиям акилӷӯткыхкақа̄ Израиль хўатын:
«Қайўа Израилыӷмӣт ысным қына̄взыӷа̄тун угляҳтаткалиӷңа̄та,
таўалъӣма қафсинкӯраҳа̄т югулилъыңьяҳқа̄гут,
28қаюҳлъяк Атанӷым кима̄ўилъңунани нанқихтыңъўа̄ҳлъықӣ нунам юги».
29Сивунӷани Исаиям пинақнилъҳатун аюқуқ:
«Атанӷым аҳтуӷьяҳқаҳа̄нӷилңӯм сӣпусимаңисяқаңилъю киңуныӷмың,
қамахтыңъўа̄ӷлюта на̄фқылъыңнаяҳтукут Содомылъю, Гоморрамлъю ныҳлъягыхкытун».
Израилыӷмӣт Ухпынӷитылъҳат
30Сямыңʼңам пилъықыста? Язычнигыт, лъңитның налъҳусяӷнақуткумаңитут Кияӷныӷмун, иўырңа Кияӷныӷым налъҳусяқақӣ ылъқуӷутңалъыӷминун апалъюқлъюку ухпықилъҳат. 31Израилыӷмӣт малиҳқутақнақуткыхка̄гут Лӣлиҳтӯсянун ылъқуӷутңаналютың Кияӷныӷмун, иўырңа пиля̄тақумаңитут. 32Сяңамың пиля̄тақунӷитат? Қаюҳлъяк налъҳусяӷнақуткылӷӣт лъңитның Кияӷныӷмун сялъыӷмыхтыхун, ныӷьюкыхпына̄н Кияӷныӷмун налъҳусӣсқылъютың ылъқуӷутңалъҳанун. Ынка̄м на̄хтақут «на̄хтусикун уйӷахкун». 33Игақыхка̄лӷӣ Акузитни Игақыхкани хўатын:
«Ӣи, Сиоными ныкыхтақа уйӷак югыт на̄хтысқылъюки,
та̄м уйӷагым иқуслъықӣ.
Иўырңа кина алңунак ухпықуми лъңакун кайңуюгна̄нӷитуқ».
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.