К Римлянам 8
8
Кияҳтылъық Таӷныӷагныкун
1Ынка̄ңам киналъю алңунак Христос Иисусымун илятка̄ката Кияӷныӷым нанқихна̄нӷитӣ аӷью̄ӷьяҳқа̄люки. 2Қаюҳлъяк Лӣлиҳтӯся̄н Таӷныӷам уңувалъылитилӷӣм Христос Иисусыкун итымуткақа̄ңа лӣлиҳтӯся̄ның сыӷлыҳқылъҳымлъю туқулъҳымлъю. 3Моисейем Лӣлиҳтӯсӣ таўатын пипагниңитут қаюҳлъяк югусимта пиюкылъҳита кая̄лыҳқыхкақӣ Лӣлиҳтӯсят. Иўырңа Кияӷныӷым пикақа̄ Лӣлиҳтӯсят пипагниңитка̄т. Каяхтыкақа̄ лъми катам Иӷныни нунамун сыӷлыҳқумалӷӣтун юхтун аюқлъюку. Тӯныхкақа̄ Иӷныни аҳқутңулюку сыӷлыҳқылъымнъун. Таўатын нанқихтыкақа̄ сыӷлыҳқылъық югусимылъюку, 4хўаңкунъун қа̄ткысяқлъыгуҳтысқылъюки Лӣлиҳтӯсят ылъқуӷутңалӷӣт қылӷусӣ. Хўаңкуңӯт кияҳлъыҳӣт малиҳқутақлъюта Таӷныӷам пиюкылъҳанун, нака̄н югусимта пиюкылъҳитнун. 5Тама̄кут кияҳлъыҳӣт малиҳқутақлъютың югусимың пиюкылъҳитнун, сюмыҳтаӷа̄ткыңъинаӷақӣт пиюкылъытың. Иўырңа тама̄кут кияҳлъыҳӣт малиҳқутақлъютың Таӷныӷагнун, сюмыҳтаӷа̄ткыңъинаӷақӣт Таӷныӷам пиюкылъҳи. 6Умьюгапут малиҳқутақыхката югусимта пиюкылъҳанун, туқулъықукут. Иўырңа умьюгапут малиҳқутақыхката Таӷныӷагнун, Кияӷныӷым уңувалъылилъықӣлъю, ныкыхмылъылилъықӣлъю. 7Умьюгапут малиҳқутақынӷата югусимта пиюкылъҳанун, аңуягўа̄қукут Кияӷныӷмун қаюҳлъяк қа̄ткигалъкыпут Лӣлиҳтӯсӣ. Ипа қа̄ткыпагниңитапут Кияӷныӷым Лӣлиҳтӯсӣ. 8Тама̄кут малиҳқутақңалӷӣт югусимың пиюкылъҳанун ыфқуҳтыпагниңита̄т Кияӷнық.
9Иўырңа лъпыси иглықатақңунӷитӣси югусиҳпыси пиюкылъҳан. Иглықатақңўӣси Кияӷныӷым Таӷныӷахкынка, қаюҳлъяк ипа кияҳтыңъулӷӣ илюхпысини. Христосым Таӷныӷакык кияҳтыңъунӷилъкайык илюңани югым, пикынӷита̄ Христосым. 10Югусиси туқунақңӯт апалъюқлъюки сыӷлыҳқылъыси. Иўырңа Христос кияҳтыңукан илюхпысини, та̄ўа Таӷныӷам уңувалъылилъықӣси, қаюҳлъяк Христосым налъҳусяҳтыстыкақӣси Кияӷныӷым ылъқуӷутңалъҳанун. 11Кияӷныӷым Таӷныӷакык уңуваҳтикак Иисусымың, кияҳтыңӯқ илюхпысини. Катам Кияӷныӷым уңуваҳтыстылъҳатун Христос Иисус, уңуваҳтыслъықӣ югусиси Таӷныӷагмикун кияҳлъыҳӣгныкун илюхпысини.
12Ынка̄ңам ухпықа̄лгутымни, кияҳсяҳқа̄гукут Кияӷныӷым Таӷныӷахкынка кияҳтысқысюлъҳатун, нака̄н югусимта кияҳтысқысюлъҳатун. 13Кияҳтыңъукуфси малиҳқутақлъюси югусиҳпыси пиюкылъҳанун, туқулъықуси. Иўырңа Таӷныӷагныкун туқускуфсики югусиҳпыси сыӷлыҳқыңʼңалӷӣт пӣқыхкаңит, та̄ўа кияҳлъықуси. 14Қаюҳлъяк тама̄кут маӷьяҳқуқӣ Кияӷныӷым Таӷныӷахкынка Кияӷныӷым авақутақӣ. 15Таӷныӷам алъхыҳтыкаҳпыси Кияӷныӷмың қыпҳаҳтыля̄ӷуҳтыснықихна̄нӷитӣси алиңылъыӷмун. Йыӷлыги Таӷныӷам Кияӷныӷмун авақутақыстӣси. Ынка̄м лъңакун туқлъюӷаӷаҳпут Кияӷнық: «Авва! Ата̄й!» 16Кияӷныӷым Таӷныӷакык лъмыгның илятка̄гук таӷныӷамнъун уңипа̄нъалюта Кияӷныӷмун авақутақнилюта. 17Кияӷныӷым авақутақутаңаның, Кияӷныӷым пагитистыкӣлъю, Христосымлъю пагитистылгуткӣлъю. Ниӷуҳқылъыңылъықукут Христосытун икфиқыхкумта Христосым икфиқылъҳатун.
Кияӷныӷым Таӷныӷахкынка Каюсиӷӣлъю
18Сюмымни икфиқылъыпут уңувалъымнъи иңлютыпагниңитут ниӷуҳқылъыӷмун Кияӷныӷым алӣҳсяҳқа̄нун хўаңкунъун. 19Улима̄қ қамахлъюни утақӣңӯқ қылянылъылиӷлюни Кияӷныӷмун алӣҳтысқылъюки кинкуңутаңи авақутӣ. 20Кияӷныӷым нанқихтыкақа̄ улима̄қ аӷью̄ӷьяҳқа̄люку ынка̄м атӯнаниҳтыста̄. Улима̄қ нанқихтысюнӷитка̄гуқ, иўырңа Кияӷныӷым таўатын пиюкыхкақа̄. Нақамлъю паниның сиӷималъылгӯқ 21қаюҳлъяк ата̄сими аӷныӷми Кияӷныӷым итымулъықа̄ улима̄қ аӷулъыӷмың. Та̄хкын улима̄қ илялъықуқ итымңалъыҳлъягитнун Кияӷныӷым авақутӣтнун. 22Лӣсимакаҳпут хўавымун кынляңа ӣңунаӷми улима̄қ ңилъыхтыңъӯқ ақниҳқылъҳатун иӷниюлӷӣм. 23Иўырңа улима̄ҳӣна̄нӷитуқ ңилъыхлъыҳӣ, хўаңкуталъю ңилъыхтыңъӯкут. Хўаңкуңӯкут Аглыӷналӷӣгның Таӷныӷагның пилыгни Кияӷныӷым тунусяқсюххуа̄ӷа хўаңкунъун. Ңилъыхтыңъӯкутлъю илюмтыхун утақӣмалюта Кияӷныӷмун алъюҳқисқылъюта авақута̄люта лъңанун, итымутысқылъюкилъю югусипут сыӷлыҳқылъыӷмың. 24Та̄хун сиӷималъыҳқун югулика̄гукут. Иўырңа алъхыҳсимакумтыху сиӷимакыхкаҳпут, та̄ўа сиӷималъҳунӷитуқ. Югыт сиӷимаңигатут сямың алъхыҳтыңъўа̄қамыхның. 25Иўырңа сиӷимамакумта сямың алъхыҳтыкақынӷилъкымнъың, утақалъықаҳпут қыляныҳпына̄мта.
26Таўатыҳпигақ Таӷныӷам каюсиӷақӣлъю кая̄тылъымнъи, қаюҳлъяк налъюкылӷӣкут натын юӷалъыҳқақсяқымтыстун. Иўырңа Таӷныӷам лъңаның катам юӷа̄тақӣлъю Кияӷныӷмун ңилъыхтылъыҳлъяхкун акузитңуна̄н. 27Кияӷныӷым лӣсимакӣ югыт сюмыҳтаӷалъҳит. Лӣсимакӣлъю сюмыҳтаӷалъҳи Таӷныӷам, қаюҳлъяк Таӷныӷам юӷа̄ткақӣ юги Кияӷныӷым пиюкылъҳатун аюқлъюки.
28Лӣсимакаҳпут Кияӷныӷым сяңўа̄т қамахлъюки қыпҳаҳтыстақӣ қырңӣта пиниҳқылъыҳқӣтнун пиниқистыми. Лъңаңут туқлъюқӣ ухпықылъыӷмитун. 29Тама̄куңӯт Кияӷныӷым накмикыкыстақӣ. А̄фтыкақӣлъю Иӷныӷмитун лъӣӷысқылъюки. Таўатын пика̄гуқ Иӷныни алъхыӷьюхўа̄ӷумасқылъюку аңлыгутылӷутаңаның. 30Ынка̄м Кияӷныӷым а̄фтыкани туқлъюқақӣ. Тама̄кутлъю туқлъюқани налъҳусяқақӣ ылъқуӷутңалъыӷминун. Тама̄кутлъю налъҳусяқани ылъқуӷутңалъыӷминун қӯлвақақӣ.
Кияӷныӷым Пиниқылъҳа Христос Иисусыкун
31Сямыңʼңам пинақыстыху уна? Кияӷнық хўаңкунъун аюқңукан, китумңам тыңвимун пилъықӣлъю? 32Иӷлыкумаңита̄ лъми катам Иӷныни; итупилъ тӯныхкақа̄ аҳқутңулюку тамаҳамнъун! Кияӷныӷым тӯнумакаңилъю Иӷныӷминың, та̄ўа лъңакун иӷлыхпынани тӯнылъықӣлъю сямың тамаҳа̄ның. 33Китумңам анахунъилъықаки Кияӷныӷым накмикыхкӣ югыт? Кияӷныӷым лъңаның катам анахутылъҳинъикақӣ! 34Кинаңам пилъықа̄ Кияӷныӷым юги нанқихсяҳқа̄нилюки аӷью̄ӷьяҳқа̄лютың? Христос Иисусым пилъықагӯ? Нака̄, қаюҳлъяк лъңаңӯқ туқуматкикақ хўаңкунъун, уңуваҳтыка̄гуқлъю туқулъыӷмың. Ма̄тын юӷа̄ткақӣлъю ақумлюни аӷынқигныӷани Кияӷныӷым. 35Ся̄мңам иқитыслъықинкут пиниқылъҳаның Христосым? Сыӷлылӣлъҳым, пияқлъӣлъҳым, амьюқыта̄ткылъҳым, паныӷниқылъҳым, аклъюмалъҳым, якуӷна̄м, налиӷмың туқутылъҳым? 36Игақңа̄қ Акузитни Игақыхкани хўатын:
«Лъпык апалъюқлъютын аҳутаңа тамаҳа̄н югыт туқусюгақӣлъю.
Сюмыҳтаӷалъыӷмыхни пынъӣӷыстун аюқнӣқӣлъю туқусяҳқат».
37Иўырңа тама̄кут қамахлъюки кая̄лъқыңъўа̄қақапут Христосыкун пиниқистымтыхун. 38Лӣсимакңўа̄ӷақа ся̄м алңунак иқитысна̄нӷитӣлъю Кияӷныӷым пиниқылъҳаның: талўа туқулъҳым, уңувалъҳым, яқулгыт, налиӷмың туӷныӷа̄т. Талўа сяңўа̄ сяӷңа̄н аӷныӷми налиӷмың сивуми агани, налиӷмың аҳтуӷьяҳқа̄нӷилъҳыт. 39Талўа сяңўа̄т қулымнъи налиӷмың асимнъи. Улима̄ӷми иқитыстияҳқақшахӣтуқ хўаңкунъың Кияӷныӷым пиниқылъҳаның Христос Иисусыкун Атанымтыхун.
Currently Selected:
К Римлянам 8: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
К Римлянам 8
8
Кияҳтылъық Таӷныӷагныкун
1Ынка̄ңам киналъю алңунак Христос Иисусымун илятка̄ката Кияӷныӷым нанқихна̄нӷитӣ аӷью̄ӷьяҳқа̄люки. 2Қаюҳлъяк Лӣлиҳтӯся̄н Таӷныӷам уңувалъылитилӷӣм Христос Иисусыкун итымуткақа̄ңа лӣлиҳтӯся̄ның сыӷлыҳқылъҳымлъю туқулъҳымлъю. 3Моисейем Лӣлиҳтӯсӣ таўатын пипагниңитут қаюҳлъяк югусимта пиюкылъҳита кая̄лыҳқыхкақӣ Лӣлиҳтӯсят. Иўырңа Кияӷныӷым пикақа̄ Лӣлиҳтӯсят пипагниңитка̄т. Каяхтыкақа̄ лъми катам Иӷныни нунамун сыӷлыҳқумалӷӣтун юхтун аюқлъюку. Тӯныхкақа̄ Иӷныни аҳқутңулюку сыӷлыҳқылъымнъун. Таўатын нанқихтыкақа̄ сыӷлыҳқылъық югусимылъюку, 4хўаңкунъун қа̄ткысяқлъыгуҳтысқылъюки Лӣлиҳтӯсят ылъқуӷутңалӷӣт қылӷусӣ. Хўаңкуңӯт кияҳлъыҳӣт малиҳқутақлъюта Таӷныӷам пиюкылъҳанун, нака̄н югусимта пиюкылъҳитнун. 5Тама̄кут кияҳлъыҳӣт малиҳқутақлъютың югусимың пиюкылъҳитнун, сюмыҳтаӷа̄ткыңъинаӷақӣт пиюкылъытың. Иўырңа тама̄кут кияҳлъыҳӣт малиҳқутақлъютың Таӷныӷагнун, сюмыҳтаӷа̄ткыңъинаӷақӣт Таӷныӷам пиюкылъҳи. 6Умьюгапут малиҳқутақыхката югусимта пиюкылъҳанун, туқулъықукут. Иўырңа умьюгапут малиҳқутақыхката Таӷныӷагнун, Кияӷныӷым уңувалъылилъықӣлъю, ныкыхмылъылилъықӣлъю. 7Умьюгапут малиҳқутақынӷата югусимта пиюкылъҳанун, аңуягўа̄қукут Кияӷныӷмун қаюҳлъяк қа̄ткигалъкыпут Лӣлиҳтӯсӣ. Ипа қа̄ткыпагниңитапут Кияӷныӷым Лӣлиҳтӯсӣ. 8Тама̄кут малиҳқутақңалӷӣт югусимың пиюкылъҳанун ыфқуҳтыпагниңита̄т Кияӷнық.
9Иўырңа лъпыси иглықатақңунӷитӣси югусиҳпыси пиюкылъҳан. Иглықатақңўӣси Кияӷныӷым Таӷныӷахкынка, қаюҳлъяк ипа кияҳтыңъулӷӣ илюхпысини. Христосым Таӷныӷакык кияҳтыңъунӷилъкайык илюңани югым, пикынӷита̄ Христосым. 10Югусиси туқунақңӯт апалъюқлъюки сыӷлыҳқылъыси. Иўырңа Христос кияҳтыңукан илюхпысини, та̄ўа Таӷныӷам уңувалъылилъықӣси, қаюҳлъяк Христосым налъҳусяҳтыстыкақӣси Кияӷныӷым ылъқуӷутңалъҳанун. 11Кияӷныӷым Таӷныӷакык уңуваҳтикак Иисусымың, кияҳтыңӯқ илюхпысини. Катам Кияӷныӷым уңуваҳтыстылъҳатун Христос Иисус, уңуваҳтыслъықӣ югусиси Таӷныӷагмикун кияҳлъыҳӣгныкун илюхпысини.
12Ынка̄ңам ухпықа̄лгутымни, кияҳсяҳқа̄гукут Кияӷныӷым Таӷныӷахкынка кияҳтысқысюлъҳатун, нака̄н югусимта кияҳтысқысюлъҳатун. 13Кияҳтыңъукуфси малиҳқутақлъюси югусиҳпыси пиюкылъҳанун, туқулъықуси. Иўырңа Таӷныӷагныкун туқускуфсики югусиҳпыси сыӷлыҳқыңʼңалӷӣт пӣқыхкаңит, та̄ўа кияҳлъықуси. 14Қаюҳлъяк тама̄кут маӷьяҳқуқӣ Кияӷныӷым Таӷныӷахкынка Кияӷныӷым авақутақӣ. 15Таӷныӷам алъхыҳтыкаҳпыси Кияӷныӷмың қыпҳаҳтыля̄ӷуҳтыснықихна̄нӷитӣси алиңылъыӷмун. Йыӷлыги Таӷныӷам Кияӷныӷмун авақутақыстӣси. Ынка̄м лъңакун туқлъюӷаӷаҳпут Кияӷнық: «Авва! Ата̄й!» 16Кияӷныӷым Таӷныӷакык лъмыгның илятка̄гук таӷныӷамнъун уңипа̄нъалюта Кияӷныӷмун авақутақнилюта. 17Кияӷныӷым авақутақутаңаның, Кияӷныӷым пагитистыкӣлъю, Христосымлъю пагитистылгуткӣлъю. Ниӷуҳқылъыңылъықукут Христосытун икфиқыхкумта Христосым икфиқылъҳатун.
Кияӷныӷым Таӷныӷахкынка Каюсиӷӣлъю
18Сюмымни икфиқылъыпут уңувалъымнъи иңлютыпагниңитут ниӷуҳқылъыӷмун Кияӷныӷым алӣҳсяҳқа̄нун хўаңкунъун. 19Улима̄қ қамахлъюни утақӣңӯқ қылянылъылиӷлюни Кияӷныӷмун алӣҳтысқылъюки кинкуңутаңи авақутӣ. 20Кияӷныӷым нанқихтыкақа̄ улима̄қ аӷью̄ӷьяҳқа̄люку ынка̄м атӯнаниҳтыста̄. Улима̄қ нанқихтысюнӷитка̄гуқ, иўырңа Кияӷныӷым таўатын пиюкыхкақа̄. Нақамлъю паниның сиӷималъылгӯқ 21қаюҳлъяк ата̄сими аӷныӷми Кияӷныӷым итымулъықа̄ улима̄қ аӷулъыӷмың. Та̄хкын улима̄қ илялъықуқ итымңалъыҳлъягитнун Кияӷныӷым авақутӣтнун. 22Лӣсимакаҳпут хўавымун кынляңа ӣңунаӷми улима̄қ ңилъыхтыңъӯқ ақниҳқылъҳатун иӷниюлӷӣм. 23Иўырңа улима̄ҳӣна̄нӷитуқ ңилъыхлъыҳӣ, хўаңкуталъю ңилъыхтыңъӯкут. Хўаңкуңӯкут Аглыӷналӷӣгның Таӷныӷагның пилыгни Кияӷныӷым тунусяқсюххуа̄ӷа хўаңкунъун. Ңилъыхтыңъӯкутлъю илюмтыхун утақӣмалюта Кияӷныӷмун алъюҳқисқылъюта авақута̄люта лъңанун, итымутысқылъюкилъю югусипут сыӷлыҳқылъыӷмың. 24Та̄хун сиӷималъыҳқун югулика̄гукут. Иўырңа алъхыҳсимакумтыху сиӷимакыхкаҳпут, та̄ўа сиӷималъҳунӷитуқ. Югыт сиӷимаңигатут сямың алъхыҳтыңъўа̄қамыхның. 25Иўырңа сиӷимамакумта сямың алъхыҳтыкақынӷилъкымнъың, утақалъықаҳпут қыляныҳпына̄мта.
26Таўатыҳпигақ Таӷныӷам каюсиӷақӣлъю кая̄тылъымнъи, қаюҳлъяк налъюкылӷӣкут натын юӷалъыҳқақсяқымтыстун. Иўырңа Таӷныӷам лъңаның катам юӷа̄тақӣлъю Кияӷныӷмун ңилъыхтылъыҳлъяхкун акузитңуна̄н. 27Кияӷныӷым лӣсимакӣ югыт сюмыҳтаӷалъҳит. Лӣсимакӣлъю сюмыҳтаӷалъҳи Таӷныӷам, қаюҳлъяк Таӷныӷам юӷа̄ткақӣ юги Кияӷныӷым пиюкылъҳатун аюқлъюки.
28Лӣсимакаҳпут Кияӷныӷым сяңўа̄т қамахлъюки қыпҳаҳтыстақӣ қырңӣта пиниҳқылъыҳқӣтнун пиниқистыми. Лъңаңут туқлъюқӣ ухпықылъыӷмитун. 29Тама̄куңӯт Кияӷныӷым накмикыкыстақӣ. А̄фтыкақӣлъю Иӷныӷмитун лъӣӷысқылъюки. Таўатын пика̄гуқ Иӷныни алъхыӷьюхўа̄ӷумасқылъюку аңлыгутылӷутаңаның. 30Ынка̄м Кияӷныӷым а̄фтыкани туқлъюқақӣ. Тама̄кутлъю туқлъюқани налъҳусяқақӣ ылъқуӷутңалъыӷминун. Тама̄кутлъю налъҳусяқани ылъқуӷутңалъыӷминун қӯлвақақӣ.
Кияӷныӷым Пиниқылъҳа Христос Иисусыкун
31Сямыңʼңам пинақыстыху уна? Кияӷнық хўаңкунъун аюқңукан, китумңам тыңвимун пилъықӣлъю? 32Иӷлыкумаңита̄ лъми катам Иӷныни; итупилъ тӯныхкақа̄ аҳқутңулюку тамаҳамнъун! Кияӷныӷым тӯнумакаңилъю Иӷныӷминың, та̄ўа лъңакун иӷлыхпынани тӯнылъықӣлъю сямың тамаҳа̄ның. 33Китумңам анахунъилъықаки Кияӷныӷым накмикыхкӣ югыт? Кияӷныӷым лъңаның катам анахутылъҳинъикақӣ! 34Кинаңам пилъықа̄ Кияӷныӷым юги нанқихсяҳқа̄нилюки аӷью̄ӷьяҳқа̄лютың? Христос Иисусым пилъықагӯ? Нака̄, қаюҳлъяк лъңаңӯқ туқуматкикақ хўаңкунъун, уңуваҳтыка̄гуқлъю туқулъыӷмың. Ма̄тын юӷа̄ткақӣлъю ақумлюни аӷынқигныӷани Кияӷныӷым. 35Ся̄мңам иқитыслъықинкут пиниқылъҳаның Христосым? Сыӷлылӣлъҳым, пияқлъӣлъҳым, амьюқыта̄ткылъҳым, паныӷниқылъҳым, аклъюмалъҳым, якуӷна̄м, налиӷмың туқутылъҳым? 36Игақңа̄қ Акузитни Игақыхкани хўатын:
«Лъпык апалъюқлъютын аҳутаңа тамаҳа̄н югыт туқусюгақӣлъю.
Сюмыҳтаӷалъыӷмыхни пынъӣӷыстун аюқнӣқӣлъю туқусяҳқат».
37Иўырңа тама̄кут қамахлъюки кая̄лъқыңъўа̄қақапут Христосыкун пиниқистымтыхун. 38Лӣсимакңўа̄ӷақа ся̄м алңунак иқитысна̄нӷитӣлъю Кияӷныӷым пиниқылъҳаның: талўа туқулъҳым, уңувалъҳым, яқулгыт, налиӷмың туӷныӷа̄т. Талўа сяңўа̄ сяӷңа̄н аӷныӷми налиӷмың сивуми агани, налиӷмың аҳтуӷьяҳқа̄нӷилъҳыт. 39Талўа сяңўа̄т қулымнъи налиӷмың асимнъи. Улима̄ӷми иқитыстияҳқақшахӣтуқ хўаңкунъың Кияӷныӷым пиниқылъҳаның Христос Иисусыкун Атанымтыхун.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.