К Римлянам 2
2
Кияӷныӷым Нанқихтилъҳа
1Тама̄кын апалъюқлъюку нанқихтикувык югның анагнӣлъқавигитутын. Нанқихныҳпыки, лъпынун нанқихтақутын аӷью̄ӷьяҳқа̄лютын қаюҳлъяк лъпыклъю лъңистун пӣқылӷӣтын. 2Кияӷнық нанқихтӣқуқ югның сыӷлыпыста̄тун пилӷӣның, лӣсимакаҳпутлъю нанқихтилъҳи ылъқуӷутңа̄т. 3Иўырңа нанқихтақатын анахулъҳӣт, нақамлъю лъпык катам пӣқа̄тын тама̄кут ата̄сит анахутылъҳыт. Ынка̄м сюмыҳпынӣ анагьяҳқа̄нилюку пизигӯ Кияӷныӷым нанқихтилъҳа? 4Лӣгикынӷисигӯ наңлъыхтаҳтуляңа Кияӷныӷым? Аӷью̄ӷаҳсигалъкаңатын таўаниңинақ қаюҳлъяк нуқытутақыхкаңатын. Сюмыҳпынӣи та̄кут сятңунӷита̄т? Лӣсимакынӷисигӯ Кияӷныӷым наңлъыкақыхкаңатын қаюҳлъяк авутыҳқысқысюкаңатын? 5Иўырңа лъпык алыҳқуныҳлъюгӯтын, пиныҳлъюгӯтын; тама̄кын апалъюқлъюку авутыҳқысюгигатутын. Ынка̄ңам лъпык катам улимаңўа̄н аӷью̄лъыңылъыҳқан сыӷлыӷатаӷа̄люку Нанқихтилъҳым Аӷныӷани. Таўани Аӷныӷми Кияӷныӷым алӣҳлъықа̄к сякша̄лъынилъю, ылъқуӷутңалӷӣлъю нанқихтилъыни. 6Нанқихлъықӣ тамаҳӣта югыт апыӷӣӷутылъҳистун. 7Иляңи югыт пинитун пимаңинаӷақут қаюҳлъяк Кияӷныӷмың алъхыҳсюкаңит усюқилъық, қӯлвалъық, югусиқлъю туқуяҳқа̄нӷилңуқ. Ынка̄м Кияӷныӷым кынлыңилңуӷмың уңувалъылилъықӣ. 8Иўырңа иляңи югыт лъңина̄югныӷӯт. Ухпықсюгигата̄т ипапилъық сыӷлыпыста̄тун пиналютың. Ынка̄м Кияӷныӷым сякшитутыҳлъяглюки, аӷью̄ҳлъяхлъықӣ. 9Қамахтыңъўа̄ӷлюни нунамылңуқ ю̄к, Иудея налиӷмың язычник, сыӷлыпыста̄тун пикақ, Кияӷныӷым аӷью̄ҳлъықа̄ сыӷлылӣӷмыңлъю, икфиқылъыӷмыңлъю. 10Иўырңа қамахтыңъўа̄ӷлюни ю̄к, Иудея налиӷмың язычник, пинитун пикақ, Кияӷныӷым усюқылъықа̄, қӯлваҳлъықа̄, ныкыхмылъилилъықа̄лъю. 11Танӣлъңунаки Кияӷныӷым нанқихлъықӣ қамахтыңъўа̄ӷлюки югыт.
12Язычнигыт алъхыҳтылъҳитӣт Лӣлиҳтӯсят Кияӷныӷым тӯныхкӣ Моисейемун. Ынка̄м сыӷлыҳқылӷӣт налъюклъюки Лӣлиҳтӯсят, туқуката Кияӷныӷым нанқихна̄нӷитӣ Лӣлиҳтӯсятхун. Иудеит Лӣлиҳтӯсялгӯт, ынка̄м сыӷлыҳқыхката Кияӷныӷым нанқихлъықӣ Лӣлиҳтӯсятхун. 13Тама̄кут нагатаӷысналӷӣт Лӣлиҳтӯсяминун, Кияӷныӷым налъҳусӣгатӣ ылъқуӷутңалъыӷминун. Иўырңа қа̄ткулъҳӣт Лӣлиҳтӯсяминун налъҳуҳқақӣ ылъқуӷутңалъыӷминун. 14Язычнигыт алъхыҳтылъҳитӣт Кияӷныӷым Лӣлиҳтӯсӣ. Иўырңа қа̄ткынъыӷмыхтыки та̄кут Лӣлиҳтӯсят, қа̄ткутылъҳита Лӣлиҳтӯсялгыстун аюқыстӣт илюмыхтыхун, алъхыҳтыкақынӷитыӷңа̄ӷмыхтыки. 15Қа̄ткутылъҳита югнун лӣгикыстӣт илюмыхтыхун лӣсимакӣт Лӣлиҳтӯсят қылӷусӣт. Сюмыҳтаӷалъҳиталъю лӣсимакыстӣт Лӣлиҳтӯсят илюңитнитуляңи, қаюҳлъяк сюмыҳтаӷалъҳита иляңакун анахунъӣқӣт налиӷмың иляңакун итагнаӷнӣқӣт. 16Нанқихтилъҳым Аӷныӷани, Кияӷныӷым нанқихлъықӣ югыт аксяқыхкӣт Христос Иисусыкун. А̄пҳақақа та̄на уңипақнымки Пинилӷӣт Уңипат.
Иудеитлъю, Лӣлиҳтӯсятлъю
17Ма̄тынңам письмоюганка Иудеит. Иудейяңукувык, ныӷьюкатын Лӣлиҳтӯсят Кияӷныӷым тӯныхкақӣ юхпынун. Қука̄юхтутынлъю Кияӷныӷмун пикнилютын. 18Лӣлиҳтӯсятхун лӣсимакан сяңўа̄ Кияӷныӷым сясқысюлъҳа лъпынун, натынлъю накмиксяҳқа̄таңа сяңўа̄ ылъқуӷутңалӷӣ. 19Ынка̄м сюмыҳпыни маӷьяҳқуҳтыңунӣқутын ая̄канун, ниӷугунӣқутынлъю мамлыгмылңуӷнун. 20Сюмыҳпыни налъҳусяҳтыңунӣқутын налъю̄қанун, апыҳтуӷистыңунӣқутыңлъю таӷнуҳаӷнун. Лӣлиҳтӯсялгутыхпының, сюмыҳпыни лӣсимакнилюку сяңўа̄ тамаҳа̄н пӣқан, қамахлъюкилъю ипапилъық. 21Апыҳтуӷақатын илятың, сяңан лъпынун апыҳтӣгасин? Уңипақӣқутын: «Тыглыхпынаң», лъпыык, тыглыгӣгасӣн? 22Пӣқутын: «Гылгаӷнӣҳпынаң», лъпык, гылгаӷнӣӷӣгасӣн? Угумикыпихтатын кияӷныңлъяқат, лъпык, тугунъӣқӣгасӣн храмыңитның? 23Қука̄юхтақутын қаюҳлъяк Кияӷныӷым Лӣлиҳтӯсяни тӯныхкақӣ юхпынун. Иўырңа қа̄ткынӷинъыҳпыки Лӣлиҳтӯсят қӯлвӣгатан Кияӷнық. 24Акузитни Игақыхкани игақңа̄қ: «Апалъюқлъюси лъпыси Иудеяни, язычнигыт сяңӯҳтақа̄т Кияӷныӷым а̄тҳа».
25Қа̄ткыңъукуфки Кияӷныӷым Лӣлиҳтӯсӣ обрезаниялъҳын пиниҳтуқ. Иўырңа қа̄ткынӷилъкуфки Лӣлиҳтӯсят обрезаниялъҳилңуӷыстун аюқутын. Ынка̄м қуястылъыңна̄нӷитутын Кияӷныӷым акықуся̄ның. 26Язычник обрезаниялъҳилңуқ қа̄ткулъҳӣ қылӷусӣтнун Лӣлиҳтӯсят, Кияӷныӷым тугуклъиҳлъықа̄ никимқун обрезанияка̄люку. 27Лъпыси Иудеяни Лӣлиҳтӯсялгӯси игақңалӷӣның, обрезанияка̄гусилъю, та̄ўаңинақ қа̄ткигатаси Лӣлиҳтӯсят. Иўырңа язычнигыт обрезаниялъҳилңӯт, қа̄ткақӣт Лӣлиҳтӯсят. Ынка̄м қа̄ткутылъҳитхун Кияӷныӷым нанқихлъықӣси аӷью̄ӷьяҳқа̄люси. 28Обрезанияңинаӷлюку югым югусӣ Иудеяпигуҳтысна̄нӷита̄. Обрезаниялъыпӣк пиңигатуқ югусим қа̄йңина̄кун. 29Итупилъ, ю̄к Иудеяпӣгӯқ Иудейяңукуми илюмикун. Иҳсяқҳўа обрезанияка̄гуқ Аглыӷналӷӣгныкун Таӷныӷагныкун, нака̄н игақыхкатхун Лӣлиҳтӯсятхун. Ынка̄м Кияӷныӷмың усюқылъыңылъықуқ, нака̄н югның.
Currently Selected:
К Римлянам 2: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
К Римлянам 2
2
Кияӷныӷым Нанқихтилъҳа
1Тама̄кын апалъюқлъюку нанқихтикувык югның анагнӣлъқавигитутын. Нанқихныҳпыки, лъпынун нанқихтақутын аӷью̄ӷьяҳқа̄лютын қаюҳлъяк лъпыклъю лъңистун пӣқылӷӣтын. 2Кияӷнық нанқихтӣқуқ югның сыӷлыпыста̄тун пилӷӣның, лӣсимакаҳпутлъю нанқихтилъҳи ылъқуӷутңа̄т. 3Иўырңа нанқихтақатын анахулъҳӣт, нақамлъю лъпык катам пӣқа̄тын тама̄кут ата̄сит анахутылъҳыт. Ынка̄м сюмыҳпынӣ анагьяҳқа̄нилюку пизигӯ Кияӷныӷым нанқихтилъҳа? 4Лӣгикынӷисигӯ наңлъыхтаҳтуляңа Кияӷныӷым? Аӷью̄ӷаҳсигалъкаңатын таўаниңинақ қаюҳлъяк нуқытутақыхкаңатын. Сюмыҳпынӣи та̄кут сятңунӷита̄т? Лӣсимакынӷисигӯ Кияӷныӷым наңлъыкақыхкаңатын қаюҳлъяк авутыҳқысқысюкаңатын? 5Иўырңа лъпык алыҳқуныҳлъюгӯтын, пиныҳлъюгӯтын; тама̄кын апалъюқлъюку авутыҳқысюгигатутын. Ынка̄ңам лъпык катам улимаңўа̄н аӷью̄лъыңылъыҳқан сыӷлыӷатаӷа̄люку Нанқихтилъҳым Аӷныӷани. Таўани Аӷныӷми Кияӷныӷым алӣҳлъықа̄к сякша̄лъынилъю, ылъқуӷутңалӷӣлъю нанқихтилъыни. 6Нанқихлъықӣ тамаҳӣта югыт апыӷӣӷутылъҳистун. 7Иляңи югыт пинитун пимаңинаӷақут қаюҳлъяк Кияӷныӷмың алъхыҳсюкаңит усюқилъық, қӯлвалъық, югусиқлъю туқуяҳқа̄нӷилңуқ. Ынка̄м Кияӷныӷым кынлыңилңуӷмың уңувалъылилъықӣ. 8Иўырңа иляңи югыт лъңина̄югныӷӯт. Ухпықсюгигата̄т ипапилъық сыӷлыпыста̄тун пиналютың. Ынка̄м Кияӷныӷым сякшитутыҳлъяглюки, аӷью̄ҳлъяхлъықӣ. 9Қамахтыңъўа̄ӷлюни нунамылңуқ ю̄к, Иудея налиӷмың язычник, сыӷлыпыста̄тун пикақ, Кияӷныӷым аӷью̄ҳлъықа̄ сыӷлылӣӷмыңлъю, икфиқылъыӷмыңлъю. 10Иўырңа қамахтыңъўа̄ӷлюни ю̄к, Иудея налиӷмың язычник, пинитун пикақ, Кияӷныӷым усюқылъықа̄, қӯлваҳлъықа̄, ныкыхмылъилилъықа̄лъю. 11Танӣлъңунаки Кияӷныӷым нанқихлъықӣ қамахтыңъўа̄ӷлюки югыт.
12Язычнигыт алъхыҳтылъҳитӣт Лӣлиҳтӯсят Кияӷныӷым тӯныхкӣ Моисейемун. Ынка̄м сыӷлыҳқылӷӣт налъюклъюки Лӣлиҳтӯсят, туқуката Кияӷныӷым нанқихна̄нӷитӣ Лӣлиҳтӯсятхун. Иудеит Лӣлиҳтӯсялгӯт, ынка̄м сыӷлыҳқыхката Кияӷныӷым нанқихлъықӣ Лӣлиҳтӯсятхун. 13Тама̄кут нагатаӷысналӷӣт Лӣлиҳтӯсяминун, Кияӷныӷым налъҳусӣгатӣ ылъқуӷутңалъыӷминун. Иўырңа қа̄ткулъҳӣт Лӣлиҳтӯсяминун налъҳуҳқақӣ ылъқуӷутңалъыӷминун. 14Язычнигыт алъхыҳтылъҳитӣт Кияӷныӷым Лӣлиҳтӯсӣ. Иўырңа қа̄ткынъыӷмыхтыки та̄кут Лӣлиҳтӯсят, қа̄ткутылъҳита Лӣлиҳтӯсялгыстун аюқыстӣт илюмыхтыхун, алъхыҳтыкақынӷитыӷңа̄ӷмыхтыки. 15Қа̄ткутылъҳита югнун лӣгикыстӣт илюмыхтыхун лӣсимакӣт Лӣлиҳтӯсят қылӷусӣт. Сюмыҳтаӷалъҳиталъю лӣсимакыстӣт Лӣлиҳтӯсят илюңитнитуляңи, қаюҳлъяк сюмыҳтаӷалъҳита иляңакун анахунъӣқӣт налиӷмың иляңакун итагнаӷнӣқӣт. 16Нанқихтилъҳым Аӷныӷани, Кияӷныӷым нанқихлъықӣ югыт аксяқыхкӣт Христос Иисусыкун. А̄пҳақақа та̄на уңипақнымки Пинилӷӣт Уңипат.
Иудеитлъю, Лӣлиҳтӯсятлъю
17Ма̄тынңам письмоюганка Иудеит. Иудейяңукувык, ныӷьюкатын Лӣлиҳтӯсят Кияӷныӷым тӯныхкақӣ юхпынун. Қука̄юхтутынлъю Кияӷныӷмун пикнилютын. 18Лӣлиҳтӯсятхун лӣсимакан сяңўа̄ Кияӷныӷым сясқысюлъҳа лъпынун, натынлъю накмиксяҳқа̄таңа сяңўа̄ ылъқуӷутңалӷӣ. 19Ынка̄м сюмыҳпыни маӷьяҳқуҳтыңунӣқутын ая̄канун, ниӷугунӣқутынлъю мамлыгмылңуӷнун. 20Сюмыҳпыни налъҳусяҳтыңунӣқутын налъю̄қанун, апыҳтуӷистыңунӣқутыңлъю таӷнуҳаӷнун. Лӣлиҳтӯсялгутыхпының, сюмыҳпыни лӣсимакнилюку сяңўа̄ тамаҳа̄н пӣқан, қамахлъюкилъю ипапилъық. 21Апыҳтуӷақатын илятың, сяңан лъпынун апыҳтӣгасин? Уңипақӣқутын: «Тыглыхпынаң», лъпыык, тыглыгӣгасӣн? 22Пӣқутын: «Гылгаӷнӣҳпынаң», лъпык, гылгаӷнӣӷӣгасӣн? Угумикыпихтатын кияӷныңлъяқат, лъпык, тугунъӣқӣгасӣн храмыңитның? 23Қука̄юхтақутын қаюҳлъяк Кияӷныӷым Лӣлиҳтӯсяни тӯныхкақӣ юхпынун. Иўырңа қа̄ткынӷинъыҳпыки Лӣлиҳтӯсят қӯлвӣгатан Кияӷнық. 24Акузитни Игақыхкани игақңа̄қ: «Апалъюқлъюси лъпыси Иудеяни, язычнигыт сяңӯҳтақа̄т Кияӷныӷым а̄тҳа».
25Қа̄ткыңъукуфки Кияӷныӷым Лӣлиҳтӯсӣ обрезаниялъҳын пиниҳтуқ. Иўырңа қа̄ткынӷилъкуфки Лӣлиҳтӯсят обрезаниялъҳилңуӷыстун аюқутын. Ынка̄м қуястылъыңна̄нӷитутын Кияӷныӷым акықуся̄ның. 26Язычник обрезаниялъҳилңуқ қа̄ткулъҳӣ қылӷусӣтнун Лӣлиҳтӯсят, Кияӷныӷым тугуклъиҳлъықа̄ никимқун обрезанияка̄люку. 27Лъпыси Иудеяни Лӣлиҳтӯсялгӯси игақңалӷӣның, обрезанияка̄гусилъю, та̄ўаңинақ қа̄ткигатаси Лӣлиҳтӯсят. Иўырңа язычнигыт обрезаниялъҳилңӯт, қа̄ткақӣт Лӣлиҳтӯсят. Ынка̄м қа̄ткутылъҳитхун Кияӷныӷым нанқихлъықӣси аӷью̄ӷьяҳқа̄люси. 28Обрезанияңинаӷлюку югым югусӣ Иудеяпигуҳтысна̄нӷита̄. Обрезаниялъыпӣк пиңигатуқ югусим қа̄йңина̄кун. 29Итупилъ, ю̄к Иудеяпӣгӯқ Иудейяңукуми илюмикун. Иҳсяқҳўа обрезанияка̄гуқ Аглыӷналӷӣгныкун Таӷныӷагныкун, нака̄н игақыхкатхун Лӣлиҳтӯсятхун. Ынка̄м Кияӷныӷмың усюқылъыңылъықуқ, нака̄н югның.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.