К Римлянам 16

Павелым Сю̄мқыхкаңи Ухпықа̄лгутыни

1Уңипа̄сюгамси ухпықа̄лгутымнъың, Фивамың. Пинилӷӣңӯқ диаконисса ухпықанун қырңуӷуткаюгнун юӷаӷвигани Кенхреям. 2Упуӷанъакыси Кияӷныӷым югита пӣқылъҳистун қаюҳлъяк Атанӷым пика̄. Каюткысюнӷиси каюсиӷақлъюку қаюҳлъяк каютыҳлъягӯқ углялӷӣнун югнун, хўаңамнунлъю талўа.

3Уңипа̄таҳнакыхси Прискиллалъю, Акилалъю сю̄мқақахкаңуқ. Қыпҳалгуткахка Христос Иисусымун. 4Талўа туқутылъыҳқаҳтынь пикаткыхпына̄н пақнӣҳсяҳқақа̄гныңа. Тама̄кын апалъюқлъюку игамсиқаюхлъягӯңа лъкыхкының. Қамахлъютыңлъю ухпықат язычнигыт юӷаӷвигитнилңӯт игамсиқаюгӯт. 5Уңипа̄таҳнакыси ухпықат қырңуӷуткаюгның мыңтыӷахкыни сю̄мқақанкаңуқ.

Уңипа̄таҳнакыси пиниқыхкақа Епенет сю̄мқақақаңуқ. Асиями лъңа ухпыӷьюха̄қа̄гуқ Христосыкун. 6Уңипа̄таҳнакыси Мария сю̄мқақақаңуқ; қывӯлъюни қыпҳа̄ткақӣси. 7Уңипа̄таҳнакыхси Андроникалъю, Юниюлъю Иудейялгутыхка, анусимиңлъяӷалгуткыхкақахкалъю, сю̄мқақахкаңуқ. Апостолыңӯк югыт лӣсимакңўа̄қыхкыт; сивумни ухпықа̄ҳтыка̄гук.

8Уңипа̄таҳнакыси Амплий, пиниқыхкақа Атаныҳқун, сю̄мқақақаңуқ. 9Уңипа̄таҳнакыси Урбан, қыпҳалгутфут Христосымун, пиниқыхкақалъю Стахия, сю̄мқақахкаңуқ. 10Уңипа̄таҳнакыси Апеллесалъю сю̄мқақақаңуқ. Нанӷӣҳсяӷалъыңақңами ипапиҳқыхкақа̄ ата̄сиӷмитылъыни Христосымун. Уңипа̄таҳнакыси ныңлъюгутаңи Аристовулым сю̄мқақанкаңуқ. 11Уңипа̄таҳнакыси Иродион, Иудейялгутка, сю̄мқақақаңуқ. Уңипа̄таҳнакысилъю ухпықат ныңлъюгутаңанилңӯт Наркиссым сю̄мқақанкаңуқ.

12Уңипа̄таҳнакыхси Трифеналъю, Трифосалъю сю̄мқақахкаңуқ. Та̄кук аӷнак қыпҳаҳтыңӯк Атаныӷмун. Уңипа̄таҳнакысилъю пиниқыхкақа Персида, сю̄мқақақаңуқ; қывулъюни қыпҳақа̄гуқ Атаныӷмун. 13Уңипа̄таҳнакыхси Руфылъю на̄кулъҳӣк, сю̄мқақахкаңуқ. Руф Атанӷым накмикыхкақа̄, на̄ңанлъю иӷнықылӷӣстун пӣқа̄ңа. 14Уңипа̄таҳнакыси Асинкритылъю, Флегонтылъю, Ермийелъю, Патробалъю, Ермылъю, қамахлъюкилъю ухпықа̄лгутыт лъңитнилңӯт, сю̄мқақанкаңуқ. 15Уңипа̄таҳнакыхси Филологылъю, Юлиюлъю, Нирейямлъю наякулъҳӣк, Олимпанлъю, қамахлъюкилъю Кияӷныӷым юги лъңитнилңӯт, сю̄мқақанкаңуқ.

16Қуякутақитык на̄ӷутмың Кияӷныӷым пиниқылъҳакун. Қамахлъютың ухпықат Христосым юӷаӷвиганилңӯт, лӣсимакысюгӣси сю̄мқақӣсиңуқ.

Павелым Киңулӣт Апыҳтӯсӣ

17Ухпықа̄лгутымни, қылӷамси кылыңасқылъюси тама̄куның а̄фқӯтыстикаюгның, тунутыстилӷӣның югыт ухпықилъҳитның, кипулъхина̄лӷӣның апыҳтӯсяның лӣткаҳпысиның. Иқитңатык тама̄куның. 18Югыт таўатын пикаюгыт қыпҳа̄тңунӷита̄т Христос Атаныҳпут. Та̄ўаңинаҳақ лъмың катам ыфқуқыхкаҳӣнатың пӣқӣт. Апыҳтуӷиныӷмыхни акузитыҳлъюхўа̄т атуқақӣт, усюқӯҳтақӣтлъю югыт пӯҳналюки пӯҳсюгумалӷӣт.

19Қамахлъютың югыт нагақӯма̄т қа̄ткутңалъыҳси Атаныӷмун, ынка̄м тама̄кын апалъюқлъюку қуякыҳлъяўа̄мси. Пыҳқинӷусюгамси сямун пинилӷӣмун, иўырңа анахутылъңунаси сыӷлыӷмун.

20Кияӷныӷым ныкыхмылъылитилӷӣм қантаӷақун кагимлъықа̄ Туӷныӷақ итыгаҳпыси асиңани.

Атаныҳпут Иисус Христос наңлъыхтаӷли лъпысинун.

21Қыпҳалгутма Тимофейем, Иудейялгутмалъю Луцийямлъю, Иасонымлъю, Сосипатрымлъю сю̄мқақӣсиңуқ.

22Тертийяңӯңа, ига̄тақақа Павел посланияңаның. Хўаңалъю сю̄мқақамси Атаныҳқун.

23-24Хўаңа Павел, Гаийемытақуңа. Мыңтыӷа̄ни қамахлъютың ухпықат қырңуӷуткаюгӯт. Лъңанлъю, ухпықатлъю сю̄мқақӣсиңуқ.

Ныҳлъямта манимың афлъыңакистыңан, Ерастым, ухпықа̄лгутымталъю Квартым сю̄мқақӣсиңуқ.

Усюқилъық Юӷалъыҳқун

25Усюқылътыху Кияӷнық! Лъңан айыпсюгиҳсяӷьяқлъыгўӣ ухпықилъыси Пинилӷӣтхун Уңипатхун Иисус Христосымың аюқылӷӣмың уңипақумаңинаӷақыхкымнун югнун. Та̄наңӯқ аксяқыхкақ уңипақ Кияӷныӷым қайвиҳсимаңитка̄ има пӣнлиӷьюха̄лъҳаның нунам. 26Иўырңа ма̄тын, пӣнлыӷилңӯм Кияӷныӷым қайвиҳсимӣ Пинилӷӣт Уңипат игақулъҳитхун ӯкналиқистыт. Қылӷусимӣ Пинилӷӣт Уңипат лӣтысқылъюки югнун нунатаҳа̄ни тамаҳа̄ни. Таўатын пика̄гуқ лъңитнун ухпықысқылъюнилъю, қа̄ткысқылъюнилъю.

27Лъңина̄гуқ Кияӷнық, пыҳқинылӷӣ сямун тамаҳа̄нун. Югыт усюқлъитху қӯнпырухлъяк Иисус Христосыкун! Аминь.

Currently Selected:

К Римлянам 16: ess2

Highlight

Compare

Copy