1е Коринфянам 1

1Укут посланият Павелымың пиңӯт, Кияӷныӷым накмикыхка̄ның Иисус Христосымун апостолыңулюки. Ухпықа̄лгутфут Сосфен хўаңамнитуқ. 2Письмоӷақуңа Кияӷныӷым ухпыҳтыңитнун Коринфымылңуӷнун, Кияӷныӷым а̄фтыка̄нун юкналюси Христос Иисусыкун. Накмикыхкақӣсилъю пылюңитысқылъюси малигулъюси юлӷутыҳлъягнун тамаңанилңуӷнун, юӷақаюгнун Атанымнъун Иисус Христосымун, қамахтыңъўа̄ӷлюта Атанқаҳпут. 3Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Қуястылъҳыт Христосыкун

4Игамсиқаюгвикақақа Кияӷнық қаюҳлъяк наңлъыкыхкақӣси Христос Иисусыкун. 5Ынка̄м лъңакун аклъюңиӷика̄гуси лӣгикылъыӷмыңлъю, акузилъыӷмыңлъю. Ынка̄м ма̄тын лӣгикатаӷаҳлъықаҳси Христос, акузиткатаӷаҳлъықаҳсилъю Атанық. 6Алъяңуҳтыкамлъю кияҳта̄лъыҳпыси ипапиҳқа̄ уңипақыхкаҳпут Христос. 7Аглыӷналӷӣгның Таӷныӷагның тунусялгӯси сямың тамаҳа̄ның, утақӣңулюси Атанымта Иисус Христосым тагинқихтылъыҳқа̄ның. 8Кияӷныӷым ухпылъыси икнақуҳся̄маңинаӷна̄ӷӣ кынляңа киңулиҳпигаӷмун аӷныӷмун. Инқун анахутылъҳитысқылъюси Атаныҳпут Иисус Христос нанқихтикан югның. 9Ата̄сӣӷмылңӯм Кияӷныӷым накмикыхкақӣси илятысқылъюси Иӷныӷминун Иисус Христосымун Атанымнъун.

Коринфыӷмӣт Ухпықӣт А̄ҳтӣра̄ӷулъҳӣт

10Ухпықа̄лгутымни, Атанымта Иисус Христосым а̄тҳакун пӣмси та̄қысқылъюси а̄ҳтӣра̄ӷунъыӷмың. А̄фқӯтыхпынаси. Сюмыҳтаӷалъысилъю, сянақылъысилъю ата̄сӣҳнақлъюки. 11Ухпықа̄лгутымни, иляңита Хлоям ныңлъюгутаңан уңипа̄ткақа̄тңа а̄ҳтӣра̄ӷутақнилюси. 12Илясиңуқ пӣқут: «Хўаңа Павелым малихся̄ҳтыка̄ңа». Иляси: «Хўаңа Аполлосым». Иляси: «Хўаңа Петырым». Паниның илясиңуқ пӣқут: «Хўаңа Христосым малихся̄ҳтыка̄ңа». 13Ынка̄ңам қафсинаҳқаҳси Иисус Христос. Павелым қақура̄ткыхкақисӣ? Крестиӷумастык Павелым а̄тҳакун?

14Игамсиқаюгвикақақа Кияӷнық крестиӷымаңилъкыхка налиҳӣнаҳси иўырңақун Криспалъю, Гаийялъю. 15Ынка̄ңам кина алңунак пина̄нӷитуқ крестиӷыманилюни атымкун. 16(Атхўай крестиӷикақанкалъю Стефановым ныңлъюгутаңа̄. Иўырңа нықамикынӷитақа китумун алъя алңунак крестиӷиматка).

Христосым Аҳтуӷьяҳқа̄нӷилъҳалъю, Кияӷныӷымлъю Пыҳқинылъҳа

17Христосым крестиӷилӣсқумаңита̄ңа, иўырңа каяхтыкақа̄ңа уңипақисқылъюңа Пинилӷӣның Уңипаның. Уңипақиңигатуңа атуқлъюки югым пыҳқинылъҳи, лю̄рақ аҳтуӷьяҳқа̄нӷилъҳӣтыснаюкамкун қақӯра̄ Христосым. 18Уңипақ Христосым туқулъҳа қақӯракун тымңиңӯқ ифлъянақылӷӣнун. Иўырңа югулилъыңылӷӣни хўаңкута лӣсимакаҳпут Кияӷныӷым аҳтуӷьяҳқа̄нӷилъқа̄. 19Акузитни Игақыхкани игақңа̄қ:

«Пыҳқинӷыт пыҳқинылъҳат атӯнаниҳтыслъықақа.

Лӣткаҳлъягытлъю лӣтылъҳат сясӣнаниҳтыслъықақа».

20Ынка̄м сянақанңам нунам пыҳқинылӷӣңи? Сянақанңам апыҳтуӷистыңи Лӣлиҳтӯсят? Сянақанңам а̄ҳтӣра̄ҳтыт? Қамахтыңъўа̄ӷлюни лӣтылъыҳлъялъҳат сясӣнӷитуқ қаюҳлъяк Кияӷныӷым тымңитхўаңлъяқақа̄ пыҳқинылъҳа нунам.

21Пыҳқинылъыӷмикун Кияӷнық пика̄гуқ нунам юганун налъюкылъықнилюни пыҳқинылъҳитхун. Ынка̄м Кияӷныӷым накмикӣ югулиналюки қамахлъюки ухпылӷӣт Христосымың уңипақыхкамнъың. Ухпықа̄нӷилңӯт сюмыҳтаӷа̄ткақа̄т та̄на уңипақыхкаҳпут тымңиңунилюку. 22Иудеит ысҳа̄сюгақут алъя̄ҳлъюхўаҳтилъыӷның ухпықналюку Кияӷныӷым уңипа̄; язычнигыт пыҳқинылъыңьюгақут ухпықналюку уңипақ ипаңутаңа. 23Иўырңа паниның уңипақнақңўа̄ҳпут Христосымун туқуткыхкақнилюки қақӯракун. Уна уңипақ Иудеяни пияқнапихтуқ ухпықсяҳқа̄люни, язычнигни тымңӣңӯт. 24Иўырңа хўаңкунъун Кияӷныӷым накмикыхка̄нун Иудеяңуӷңа̄мта, язычнигыңуӷңа̄мта таўатынъыӷитуқ. Христосым туқулъҳан қақӯракун лӣтыстыкақӣлъю Кияӷныӷым аҳтуӷьяҳқа̄нӷилъҳаныңлъю, пыҳқинылъҳаныңлъю. 25Кияӷныӷым тымңитхўалъҳа пыҳқинӷатаӷаҳтуқ югым пыҳқинылъҳаның. Кияӷныӷым кая̄тылъҳа икнақатаӷаҳтуқ югым икнақылъҳаның. 26Ухпықа̄лгутымни, нықамиклъюку натыся̄ӷыстык Кияӷныӷым туқлъюӷақңиси. Қафсинкӯраҳаӷни пыҳқинӷуяҳтуси нунам юган сюмыҳтаӷа̄ткылъҳитни. Қафсинкӯраҳаӷни аҳтӣгасяҳтуси иглыӷутистыт, налиӷмың аклъюңилңуӷның, ныңлъюгутның пиңуяҳтуси. 27Иўырңа Кияӷныӷым накмикыхкақӣ тама̄кут налъю̄қат нунами кайңуся̄кналюки пыҳқинылӷӣт, Кияӷныӷым накмикыхкақӣ кая̄лңӯт нунами кайңуся̄кналюки тама̄кут икнақылӷӣт. 28Кияӷныӷым накмикыхкақӣ укаванлыңӯтлъю, аситңина̄қӣтлъю нунами. Тама̄куңӯт Кияӷныӷым накмикыхкӣ, югнун лӣгикысқылъюки сюмыҳтаӷа̄ткыхкӣт а̄ңўа̄ӷулюки иўырңа Кияӷныӷми а̄ңўа̄ӷунӷитут. 29Ынка̄ңам кина алңунак а̄ңа̄юхна̄нӷитуқ ныкывыхкуни сивуңани Кияӷныӷым. 30Кияӷныӷӯқ тӯнистыси уңувалъыӷмың Христос Иисусыкун. Кияӷныӷым Христос Иисусымун тӯныстӣлъю пыҳқинылъыӷмың, ылъқуӷутыстӣлъюлъю Кияӷныӷми, аглыӷнаҳтыстӣлъюлъю, итымутыстӣлъюлъю сыӷлыҳқылъымнъың. 31Ынка̄ңам атуқылътыху, Акузитни Игақыхкани игақңалӷӣ:

«Кина алңунак а̄ңа̄юхсюкуни,

а̄ңа̄югуткылъики Атанӷым апыӷӣқӣ лъңанун».

Currently Selected:

1е Коринфянам 1: ess2

Highlight

Compare

Copy