К Римлянам 10
10
1Ухпықа̄лгутымни, қамагун илюмкун пиюкыпихтақанка хўаңа катам югынка Иудеит югулилъыңысқылъюки! Ынңа̄талъ Кияӷныӷмун юӷа̄ткақанка! 2Хўатын пӣҳнақанка югынка: Қыпҳа̄сюпихтақа̄т Кияӷнық иўырңа лӣгикигата̄т натын Кияӷнық қыпҳа̄тысюҳқақ лъңитнун. 3Лӣгикылъҳита̄т натын Кияӷныӷым налъҳусяӷақутаңи югыт ылъқуӷутңалъыӷминун. Ынка̄м ылъқуӷутңаңлъяӷнақуткақут қа̄ткылъюки Лӣлиҳтӯсӣ. Таўатын пилъыӷмыхтыхун тугуклъӣгата̄т Кияӷныӷым ылъқуӷутңалъҳа. 4Христос кынлыка̄т Лӣлиҳтӯсят. Ынка̄м тамаҳаӷми ухпықилъылык Кияӷныӷым налъҳусяҳлъықа̄ ылъқуӷутңалъыӷминун.
Югулилъық Тамаҳа̄нун Пиңӯқ
5Моисей игақа̄гуқ Кияӷныӷмың налъҳусяӷилӷӣмың югның ылъқуӷутңалъыӷминун қа̄ткутылъҳитхун Лӣлиҳтӯсянун. Хўатын игақыхкақа̄: «Югым қа̄ткумакаки Лӣлиҳтӯсят, та̄кутхун кияҳлъықуқ». 6Иўырңа налъҳусяқақ Кияӷныӷым ылъқуӷутңалъҳанун ухпықилъыҳқун, қылъқа̄гуқ: «А̄птыхпынаң: “Кина маюҳлъықа қилягмун?”» (укихналюку Христос нунамун). 7Налиӷмың а̄птыхпынаң: «Кина укихлъықа Кынлыңилңуӷмун?» (маю̄нъалюку Христос туқумың.) 8Акузитни Игақыхкани хўатын игақңа̄қ: «Кияӷныӷым уңипа̄ қантаӷантуқ лъпынун. Акузиткылъықан қаныҳпыгун, ухпықылъықанлъю илюхпыгун». (Кияӷныӷым уңипа̄ ухпықилъыӷмың аюқылӷӣ, та̄наңӯқ уңипақыхкыфут.) 9А̄пқувгу қаныҳпының: «Иисус Атанӷунилюку», илюхпыныңлъю ухпықыхкувгу Кияӷныӷмун уңуваҳтысиманилюку туқулъыӷмың, югулилъыңылъықутын. 10Ю̄к ухпыҳтуқ илюмикун, ынка̄м Кияӷныӷым налъҳусяӷа̄ ылъқуӷутңалъыӷминун. А̄пҳа̄лъю қаныӷмикун ухпықыхкани, ынка̄м югулилъыңуқ. 11Акузитни Игақыхкани игақңа̄қ: «Китум алңунак ухпықыхкумигу лъңа кайңуюгна̄нӷитуқ». 12Алъяңуӷутңитут Иудеитлъю, Грегытлъю қаюҳлъяк ата̄сӣгуқ Атанық, Атанқа̄ тамаҳа̄н. Қуястыҳлъягақа̄ тамаҳа̄н туқлъюӷилӷӣ лъңаның. 13Катам Акузитни Игақыхкани игақңалӷӣ: «Тамаҳаӷми туқлъюӷилӷӣ а̄тҳакун Атанӷым югулилъыңьяҳқа̄гуқ».
14Иўырңа натын югыт туқлъюҳлъықатху ухпынӷилъкумың? Натын ухпыҳлъықат, нагақӯнъыӷилъкумың? Натынлъю нагақуҳлъықа̄т уңипақистыңунатың? 15Натын югыт уңипақилъықат лъңаның ўытку каяхтылъыңыхкуйың? Катам Акузитни Игақыхкани игақңалӷӣ: «Пиниӷнаҳаӷмың итыгӣт тама̄кут уңипақилӷӣт Пинилӷӣның Уңипаның!»
16Иўырңа иляңинӣта қа̄ткыхкақӣт Пинилӷӣт Уңипат. Исаия а̄птыка̄гуқ: «Атанық, китум ухпықыхкақагу уңипаҳпут?» 17Кина алңунак ухпықилъылгуна̄нӷитуқ нагатыхпынани уңипа̄мың Христосымың аюқылӷӣмың.
18Иўырңа пӣқсиңа̄ Израилыӷмӣт нагақӯнъыӷинъилюки уңипа̄мың? А̄а, нагақупыста̄қа̄гут. Акузитни Игақыхкани игақңалӷӣ:
«Мыңит аӷуляқума̄т тамаҳа̄нун нунам;
акузитаңитлъю кынлыңитнун нунам».
19Алъя а̄пқуӷа̄лъылгӯңа: Израилыӷмӣт лӣгикынӷитаткӣи Израилыӷмӣңунӷилңӯт лъңитлъю Кияӷныӷым юкаткӣ? А̄а, лӣгикумӣт. Сивуклъюку Кияӷныӷым Моисей хўатын писта̄:
«Лъпысинун ақинакыснақанка Израилыӷмӣңунӷилңӯт.
Израилыӷмӣңунӷилңуҳтыхун лӣгикигалңуҳтыхун угумиюхтыснақамси».
20Та̄хкын Исаия тытухпынани а̄пҳика̄гуқ хўатын Кияӷныӷым пилъҳаның:
«Тама̄кут иваӷимаңилңӯт хўаңамның, на̄лъкыхкақа̄тңа.
Тама̄кунун а̄птинӷилңуӷнун хўаңамның, лӣтыстыка̄гуңа».
21Иўырңа Израилымың Кияӷнық хўатынлъю пика̄гуқ:
«Аӷнылъқусиҳлъяк ныңугутанка ӣхынка қа̄ткусигалңуӷнунлъю,
кипулъхина̄лӷӣнунлъю хўаңамның».
Currently Selected:
К Римлянам 10: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
