Откровение 16

Сягныӷыт Имақылӷӣт Кияӷныӷым Сякшитылъыҳлъяганың

1Та̄хкын Храмымың нагақуӷақа игляхтулӷӣ ма, уңипа̄скаңи ма̄ӷраӷвинлык яқулгыт: «Кӯвьяҳтуҳтыки нунамун ма̄ӷраӷвинлык сягныӷыт Кияӷныӷым сякша̄лъыҳлъяги!»

2Ынка̄м сивулӣм яқулгым сягныни кӯвьяҳтуӷа̄ нунамун. Та̄хкын сыӷлыпыста̄ҳлъягыт ақниӷнапихлъыҳӣт пупигыт пӣтқӯтут налъюнӣлъыңыхканун тыӷикусялъю̄гмың. Тама̄куңӯт манигӯткат наңаӷныӷанун.

3Тӯңлиҳа̄н яқулгым сягныни кӯва̄ кылъӣнун. Та̄хкын кылъӣ а̄ўатун туқукам югым лъӣӷлюни, ынка̄м қамахлъютың уңувалӷӣт кылъӣни туқуляӷа̄тут.

4Пиңайӣтаңита яқулгым сягныни кӯва̄ кӣгўнунлъю, сыңъунунлъю мыӷнун ынка̄м а̄ўуҳқӯтут. 5Нагақуӷақа иглыӷутилӷӣ мыӷның яқулык пилӷӣ:

«Ка̄й, Аглыӷналӷӣ Кияӷнық,

лъпыңӯқ ма̄тын кияҳлъыҳӣ,

лъпыңӯқ қӯнпың кияҳлъыҳӣ!

Нанқихтилъыҳтынлъю, аӷью̄ӷилъыҳтынлъю ылъқуӷутңа̄т.

6Югыт туқуқуқақӣт юхтын, ӯкналиқистытынлъю,

ынка̄м мыӷьяҳқалитатын а̄ўмың.

Таўатын аӷью̄ӷьяҳқа̄лютың лъмыхның алъхыҳтыкақа̄т!»

7Та̄хкын нагақуӷақа аҳқыфигыгның ма пилӷӣ:

«А̄а Атанық, Кияӷнық Аҳтуӷьяҳқа̄нӷилңуқ!

Ипаңӯтлъю, ылъқуӷутңа̄тлъю нанқихтилъыҳқаҳтын!»

8Ыстамӣтаңита яқулгым сяӷныни кӯва̄ сиқиныҳқун ынка̄м Кияӷныӷым сиқинӷым кынӷанун паныҳтыстӣ югыт. 9Сиқинӷым угуқнаҳлъяган паныҳтыстӣ югыт. Ынка̄м сяңӯҳтыҳлъяга̄т а̄тҳа Кияӷныӷым, иглыӷутистыңутаңаның тама̄вык сыӷлылӣлъыҳлъягнун. Авутыҳқынӷитутлъю, усюқынӷита̄тлъю Кияӷныӷым а̄ңылъыҳлъяга.

10Талъимӣтаңита яқулгым сягныни кӯва̄ тыӷикусялъю̄гым умӣлгусӣн ақумутахкынкун, ынка̄м атаныҳпагулъҳа мамлыҳқўа̄га̄. Югыт икфиқым улютың амқыҳқуӷӣт. 11Сяңӯҳтыҳлъяга̄т Кияӷныӷа қилягым апалъюқлъюку ақниҳқылъыӷмыхныңлъю, пупихта̄лъыӷмыхныңлъю. Авутыҳқынӷитутлъю сыӷлытун пилъыӷмыхның.

12Аӷвинлӣтаңита яқулгым сягныни кӯва̄ кӣўлъягыгнун Евфратыгнун. Кӣўык патыҳтук ята̄ҳқунъалюки тӯмкаҳқамың умӣлгыт тагилӷӣт асиваӷмың. 13Та̄хкын ысҳаӷанка пиңают нукыхналӷӣт туӷныӷа̄т ўамынгусюгнилңӯт. А̄нут қа̄нӷитның драконым, тыӷикусялъю̄гым, ӯкналиқистысиӷўа̄ӷымлъю. 14Та̄кут туӷныӷа̄т алъя̄ҳлъюхўаҳтикаюгуфтут. Аӷуляқут умӣлгитнун нунатаҳа̄н тамаҳа̄н қырңуҳналюки пилъюўамун аӷныҳлъягани Кияӷныӷым Аҳтуӷьяҳқаҳа̄нӷилңӯм.

15Атанық пӣқ: «Нагатаҳтык! Тагиңӯңа тыглыгнӣҳтытун! Қуянаҳтуқ тыҳумалӷӣ, а̄ткани пӣфтыңъўа̄ӷлюки аюқыхкаңи. Ынка̄м иглыҳна̄нӷитуқ амсикаӷми, кайңусяӷа̄нъа̄нӷитуқлъю тысқагани югыт ысҳақумыхтыху!»

16Та̄хкын туӷныӷа̄т қырңуҳтӣт умӣлгыт Армагеддонымун. Таўатын Еврейлъимистун атилъҳа аюқуқ.

17Та̄хкын ма̄ӷраӷвинлӣтаңита яқулгым сягныни кӯва̄ ыслъямун. Храмыми умӣлгусигның ақумутаҳлъягыгның игляхтупихлъюни ма пӣқ: «Апыӷӣҳтуқ!» 18Та̄ўа ниӷўа̄хпахтаҳтуқ, тыңъа̄хтаҳтуқ, калъитуқ, нуналъю уфсюгутыҳлъяхтуқ. Та̄на нунам уфсюгутылъыҳлъяга сыӷлылъыҳпига̄гуқ Кияӷныӷым юңлъяӷьюхалъҳаның. 19Ныҳлъяк пылъыҳтуқ пиңаюҳқылъюни. Нунатлъю ныҳлъягит қамахтыңъўа̄ӷлютың на̄вӯтут. Кияӷныӷым нықамикӣ Вавилоныҳлъягым сыӷлыҳқылъҳи. Ынка̄м мыӷыста̄ вино қаю̄симылңуқ сякшитылъыҳлъягминың имақылӷӣ. 20Қамахлъютың қӣҳқат авӣӷуқӯтут, қамахлъютыңлъю на̄йӷат ка̄вӯтут. 21Кафтыкшагрухлъягыт ю̄к талъимат уқихтуткавзилӷӣт қилягамың ифкақӯтут югнун. Ынка̄м тама̄кут югыт сяңӯҳтыҳлъяга̄т Кияӷнық апалъюқлъюки кафтыкшагрухлъягыт. Та̄на сыӷлылӣлъыҳлъяк сыӷлыпигулӷӣ.

Currently Selected:

Откровение 16: ess2

Highlight

Compare

Copy