Откровение 15

Моисейемлъю, Пынъӣӷаҳа̄млъю Иляга̄тңат

1Та̄хкын қилягами алӣҳтуқ сяңўа̄ сяӷӣӷанапихлъыҳӣ лӣсимакусиҳқаҳпут пияҳқамун. Та̄ўа ма̄ӷраӷвинлык яқулгыт, тагитилӷӣт ма̄ӷраӷвинлыгның сыӷлылӣлъыҳлъягның. Та̄кут сыӷлылӣлъыҳлъягыт та̄қнӣткыфтӣ Кияӷныӷым сякша̄лъыҳлъяган.

2Та̄хкын ысҳаӷақа кылъӣсюгнилңуқ мыӷра̄кыхтақ сиқинўа̄ӷыстун, акумңалӷӣ кыныӷмың. Ысҳаӷанкалъю кая̄лъқӣкат тыӷикусялъю̄гмың, наңаӷныӷаның, а̄тҳанлъю числоңаның. Ныкывӷатңуфтут ся̄ӷўаӷни кылъӣм, гуслилиҳтӯлъютың Кияӷныӷым тӯныхкӣтның лъңитнун. 3Илягаӷақыфтут иляга̄таңаның Моисейем, (Кияӷныӷым қыпҳаҳтыңа), иляга̄таңаныңлъю Пынъӣӷаҳа̄м:

«Ка̄й, Атанық Кияӷнық Аҳтуӷьяҳқаҳа̄нӷитыҳлъяк,

қыпҳалъыҳтын сыӷлыҳлъягӯт, алъя̄ҳлъюхўаҳлъягӯт!

Ка̄й, умӣлгат нунам югита,

лъпык сялъыҳтын ылъқуӷутңа̄тлъю, ипаңӯтлъю!

4Атанық, қамахтыңъўа̄ӷлютың югыт аликылъықа̄тын,

қӯлваҳлъықа̄тлъю а̄тҳын!

Лъңина̄гутын аглыӷналӷӣ!

Қамахтыңъўа̄ӷлютың нунатат манигуӷьяҳтуҳлъықа̄тын,

қаюҳлъяк лӣсимакыхкаңат нанқихтилъыҳтын ылъқуӷутңалӷӣт!»

Киңулӣт Ма̄ӷраӷвинлык Сыӷлылӣлъыҳлъягыт

5Та̄м киңуңаның ысҳаӷақа қилягми қылъпыҳтыкаңат Храм. (Аглыӷналъыҳпига̄гуқ На, лъңан югита лӣсимакусиқа̄т Кияӷнық таўанъилюку.) 6Та̄хкын ма̄ӷраӷвинлык яқулгыт а̄нлыӷа̄тут Храмымың кылъқылъютың ма̄ӷраӷвинлыгның сыӷлылӣлъыҳлъягның. Тамаҳаӷмың аткуя̄ӷулъютың қатыӷракыхтамың ниӷулӷӣмың, сякимагмыхтыхун золотамың тафсилютың. 7Та̄хкын ата̄сим уңувалӷӣм стаманың та̄куның, золотамың сягнылиқуӷӣ ма̄ӷраӷвинлык яқулгыт. Та̄кут сягныӷыт имиӷңа̄т сякша̄лъыҳлъя̄ганың Кияӷныӷым, кияҳлъыҳӣ қӯнпырухлъяк кынлыңуна̄н. 8Храмым илюңа агыпсюҳқа̄га̄ Кияӷныӷым ниӷуҳқылъҳаныңлъю, аҳтуӷьяҳқа̄нӷилъҳаныңлъю. Кина алңунак итыӷна̄нӷитуқ Храмымун кынляңа ма̄ӷраӷвинлык сыӷлылӣлъыҳлъягыт кынлытҳӯтылъҳитнун, тагиткӣт ма̄ӷраӷвинлык яқулгыт.

Currently Selected:

Откровение 15: ess2

Highlight

Compare

Copy