Откровение 12

Аӷна̄қлъю, Драконылъю

1Та̄хкын қилягами сяңўа̄ сяӷӣӷанапихлъыҳӣ алӣҳтуқ лӣгикусиҳқаҳпут пияҳқамун: Аӷнақ пилюгуглюни сиқиныӷмың, итыгӣ танқикун ныкыхлъютың, на̄сқумикун қаҳпалюни қуля ма̄лӷук сӣпнықлъюку иӷалықыта̄ӷның. 2Қумилгуфтуқ, иӷниюгым ақниҳқылъюку лъӣӷа̄, а̄нақылъҳан таӷнуҳа̄м араҳқа̄.

3Та̄хкын қилягами сяңўа̄ иляңа сяӷӣӷанапихлъыҳӣ алӣҳтуқ лӣгикусиҳқаҳпут апыӷӣӷнақылӷӣмун: Та̄ўа кавилңуқ драконыҳлъяк, ма̄ӷраӷвинлык на̄сқулык, қуля сиӷунылык, ынка̄м қамахлъютың на̄сқўа қаҳпалгутутыфтут. 4Папыгминың сяқипхутӣ нунамун пиңаюҳқылъҳи қилягам иӷалықыта̄ӷи. Та̄хкын дракон ныкывыхкақ мануңакун аӷнам ныӷналюку таӷнуҳа̄ иӷнӣӷыснақагу. 5Аӷнақ иӷныңуқ, иглыӷусяҳқӣ қамахтыңъўа̄ӷлюки нунам юги сявикынӷаӷмың анагуталиӷлюни. Иўырңа аӷнам таӷнуҳа̄ акуқаӷлюку агля̄та̄т Кияӷныӷмун, умӣлгусихкынунлъю ақумутагнун. 6Аӷнақ қимахтуқ килга̄нун. Тама̄ни Кияӷныӷым ята̄ҳқуткақыхкаңа ныкаҳқамың, афлъыңаксяҳқақыхкаңат 1,260 аӷныӷыт.

7Та̄хкын қилягми пилъюгутут. Михаилымлъю яқулъкулъҳӣт пилъюўаӷа̄т дракон. Драконымлъю яқулъкулъҳӣт пилъюўаӷӣт Михаилылъю яқулъкулъҳӣт, 8иўырңа Михаилым кая̄лъқа̄ дракон. Ынка̄м дракон яқулъкулъҳӣт қилягмысяҳқа̄наниҳтут. 9Қилягмың милю̄та̄т драконыҳлъяк. (Ныӷиҳталюк нымыӷьяқ а̄тҳа Туӷныӷақ, налиӷмың Туӷныӷақ, пӯҳқуҳтыңа нунам юган.) Милю̄та̄т нунамун яқулыхтӯма̄н.

10Та̄хкын нагақуӷақа ма игляхтулюни қилягмың пилӷӣ:

«Хўа̄ ка̄сима̄т Кияӷныӷым югулиӷилъҳа,

аҳтуӷьяҳқа̄нӷилъҳа, атаныҳпагулъҳалъю,

Христосыңанлъю аҳтуӷьяҳқа̄нӷилъҳа.

Сялин Туӷныӷақ милю̄тылъҳилъюку қилягмың,

аӷныҳтӯма̄н унухтӯма̄н анахутңанӣқӣ ухпықа̄лгутыпут Кияӷныӷмун.

11Ухпықа̄лгутымта кая̄лъқума̄т а̄ўакун Пынъӣӷаҳа̄м,

уңипақылъыӷмыхтыхунлъю Кияӷныӷым ипапиҳқылъҳа.

Талўа туқуяӷңа̄ӷмың аюқут Христос апалъюқлъюку.

12Ынка̄м қамахлъюси кияҳлъыҳӣни қилягми, қуятыҳлъяхтык!

Иўырңа сыӷлыӷўа̄ӷунақңӯси нунамылңуӷнилъю, кылъӣнилңуӷнилъю!

Туӷныӷа̄м укигвикумӣси,

сякшитыҳлъягӯқ қаюҳлъяк лӣсимака̄ пилъыҳқӣӷусяҳтуҳтуқ».

13Драконым лӣгиксямигу нунамун милю̄тылъыни, малиҳқаӷа̄ аӷнақ иӷныңыхкақ. 14Иўырңа аӷнақ тӯныхка̄т қаўа̄хпагрухлъягым яқухкының тыңа̄сқылъюку килга̄нун. Тама̄ни пақнӣлъықуқ нымыӷьямың, афлъыңакылъықа̄тлъю пиңают аюмиқулъҳыт, аӷвинлык танқит илялъюки. 15Та̄хкын нымыӷьям уӷью̄та̄ мық кӣўыстун аюқылӷӣ аӷнақ ма̄қутысқылъюку. 16Иўырңа нунам каюсӣта̄ аӷнақ. Нунам агитаӷулъюку тӯфта̄ мыҳлъяк драконым уӷью̄тка̄. 17Та̄хкын драконым угумиягутыҳлъяглюку аӷнақ, ынка̄м пилъюўаӷьяҳтуӷӣ қамахлъюки иляңи киңунӷи. Тама̄куңӯт қа̄ткутңалӷӣт Кияӷныӷым қылӷусӣтнун, ата̄сӣӷмылңӯтлъю ипалъыӷмун апыҳтӯсяқыхка̄нун Иисусым. 18Та̄хкын дракон ныкывуқ кылъӣм ысна̄кун.

Currently Selected:

Откровение 12: ess2

Highlight

Compare

Copy