Откровение 11

Ма̄лӷук Уңипаҳтык

1Та̄хкын китум аявӣлита̄ңа успута̄сиқысқылъюку. Ынка̄м каяхта̄ңа: «Успутаӷьяҳтуҳу Кияӷныӷым Храмыңа, аҳқыфигыклъю, кыснакытынлъю югыт манигӯлъҳӣт таўани. 2Иўырңа успутаҳпына̄н Кияӷныӷым Храмыңан уқҳа ыслъята̄нилңуқ, қаюҳлъяк тӯныхка̄гуқ язычнигнун. Тутма̄сҳақнақңўа̄т Аглыӷналӷӣ Ныҳлъяк югыгмалӷу ма̄лӷук сӣпнықлъюку танқини. 3Уңипаҳтыхка пилюгугңалӷӣк вретищемың, аҳтуӷьяҳқа̄нӷилъылылъықахка ӯкналиқысқылъюкык 1,260 аӷныӷнун».

4Ма̄лӷук уңипаҳтык ма̄лӷугӯк маслинам уқфигык, ма̄лӷугӯклъю кынылӷутам тунымакык ныкывӷалӷӣк сивуңани Атанӷан нунам. 5Ынка̄м китум алңунак ақниҳнақуткыхкумикык, қа̄нӷыхкының кынӷым а̄нлюни туқуқуҳлъықӣ аңуягит. Китумлъю алңунак ақниҳнақуткыхкумикык та̄ўа туқусяҳқа̄ҳлъықуқ. 6Аҳтуӷьяҳқа̄нӷилъылгӯк қиляга ыслъялъюгуӷнанӣсқылъюку ӯкналиқылъҳыхкыгни. Аҳтуӷьяҳқа̄нӷилъылгӯк мыӷыт а̄ўуҳтысқылъюки. Аҳтуӷьяҳқа̄нӷилъылгӯклъю алъя̄ҳӣнаӷның икфиқналӷӣның сыӷлылӣҳлъягның, аўын таўатын пӣқылъықук пиюкылъыӷмыгыстун.

7Апыӷӣқуйык уңипаныӷмың, асилиӷныӷилңуӷмың ля̄ўа̄ӷмың а̄нылъықуқ тыӷикусялъю̄к. Пилъюўаҳлъықа̄к ынка̄м кая̄лъқыхкумикык туқулъықа̄к. 8Кымыхкўа̄ӷик тама̄нлъықук тӯмңани ныҳлъягым, Атанӷита қақӯраӷвигани. Та̄на ныҳлъяк а̄тқыфтуқ Содомымыңлъю, Египетмыңлъю қаюҳлъяк юги Содомыӷмӣстунлъю, Египетыӷмӣстунлъю аюқылӷӣт. 9Югыт нунатаҳа̄ның, рамкының, алъя̄ҳӣнаӷның улюның, нунатаныңлъю тагилъықут ысҳаӷналюкык кымыхкўа̄ӷик. Таўатын пилъықут пиңаюнун аӷныӷнун авылъылиӷлюку, китумунлъю алңунак қуңуҳтыснаниҳлъықахкыт. 10Та̄кук ӯкналиқистык икфиқыстиҳлъяка̄лӷӣк нунам югитнун. Ынка̄м югыт қуяҳлъяхлъықут, тунқӯлъықутлъю тунусямың илямыхнун, апалъюқлъюку туқулъҳыхкынун. 11Иўырңа киңуңитның пиңают аӷныӷыт авылъылиӷлюку Кияӷныӷым аныӷныни итыҳтыстыка̄ ӯкналиқистыгнун. Ынка̄м ныкывьямык, қамахлъютың тама̄кут ысҳаӷлюкык алиңрӯӷутыҳлъякат. 12Та̄хкын ӯкналиқистык нагақуӷа̄к игляхтупихлъыҳӣ ма қилягмың пилӷӣ: «Маюҳтык хўавык!» Аңуягит ысҳапагумалюки маюҳтук қилягмун қиляўа̄ҳқун. 13Таўани пилъыӷми қывӯтыпихлъюни нуна уфсюгутыҳлъяхтуқ; қуляҳқылъҳа ныҳлъягым на̄вуқ. Ынка̄м 7,000 ю̄к туқуқуӷа̄ нунам уфсюгутылъыҳлъяган. Тама̄кут югыт яйўа̄сыкат какава̄та̄тыҳлъяглютың усюқӯҳта̄т Кияӷныӷа қилягым.

14Тӯңлиҳа̄ сыӷлыпыста̄ҳлъягым сыӷлылӣлъҳым алъпахтуқ, иўырңа ысҳаҳтыху пиңая̄ сыӷлыпыста̄ҳлъягым сыӷлылӣлъҳым ка̄сяҳтуңыстаҳтуқ.

Ма̄ӷраӷвинлӣтаңа Қалӷиҳта̄тым

15Та̄хкын ма̄ӷраӷвинлӣтаңита яқулгым қалӷиҳта̄тни қалӷиҳта̄. Игляхтупихлъютың мыт қилягми пӣт: «Атаныҳпагулъҳа нунам атаныҳпагулъқа̄ҳта̄к Атанымталъю, Христосыңанлъю, ынка̄м Лъңа иглыӷутилъықуқ қӯнпырухлъяк кынлыңуна̄н!» 16Та̄хкын югинақ стамат сӣпнықлъюку сӣванлъыӷыт ақумгалӷӣт умӣлгуситхун ақумутамыхтыхун Кияӷныӷым сивуңани, хинатың сыкылъюки манигуӷа̄т Кияӷнық. 17Пика̄т:

«Игамсиқаюгвикамкын,

Атанық Кияӷнық Аҳтуӷьяҳқаҳа̄нӷилңуқ,

кияҳлъыҳӣ ма̄тын, ӣўлыңлъю кияҳлъыҳӣ! Тугума̄н аҳтуӷьяҳқа̄нӷитылъыҳлъягын ынка̄м пӣнлиҳтутын иглыӷутимун.

18Нунам юги сякшитыҳлъяхтут,

иўырңа ма̄тын сякша̄лъыҳқан ка̄туқ.

Туқукат нанқихсяҳқа̄ҳтут.

Акилыҳтуӷьяҳқа̄ҳтатын қыпҳаҳтытын ӯкналиқистыт,

аглыӷналӷӣт юхтын,

қамахлъюкилъю сӣвакилӷӣт лъпынун,

укаванлыңӯтлъю, апыҳсыӷутлъю.

Туқуқулъыҳқан ка̄туқ тама̄кунун туқуқуқаның югның нунами».

19Та̄хкын Кияӷныӷым Храмыңа қилягмылңуқ қылъпатыфтуқ. Таўани Храмыңани ысҳаӷахка Ковчегык Кияӷныӷым Заветылӷутакык. Та̄хкын ниӷўа̄хпахтаҳтук, ыфтуҳтаҳтук, тыңъа̄хтаҳтуклъю калъюгык; нуна уфсюгутыҳлъяхтуқ, кафтыкшагуҳтыҳлъяга̄лъю!

Currently Selected:

Откровение 11: ess2

Highlight

Compare

Copy