К Филиппийцам 3

Югулисиҳпигақ

1Ухпықа̄лгутымни, на̄ңнӣткун уңипа̄сюўамси: «Қуяма̄қитык Атаныҳқун!»

Қинуягусигатуңа уңипа̄нъықихнымси посланиятхун игақыхкамның сивунӷани, ынка̄м илялъықуқ пақнӣтылъыҳпысинун. 2Кылыңалюси сыӷлытун пикаюгның, тама̄куның қикминың, югӯт сягиқутилӷӣт кыпфикысқылъюки югусӣт. 3Хўаңкутаңӯкут ухпықани обрезанияпӣўа̄қани қаюҳлъяк манигуӷақаҳпут Кияӷнық Таӷныӷахкынкун, усюқақаҳпутлъю Христос Иисус. Ныӷьюңигатукутлъю Кияӷныӷмун пилӣтысқылъюта хўаңкута катам сялъымтыхун. 4Кина алңунак Кияӷныӷым пилӣсяҳқақсяқагу лъңан катам сялъҳакун, хўаңа пияҳқа̄яҳтуңа. Югыт таўатын пияҳқа̄яқата хўаңа ўатақа̄ӷақ пинаяҳтуңа укут апалъюқлъюки: 5Обрезаниякақа̄тңа пиңаюның иңлюлык аӷнық атуӷьямкун киңуңаның алъхылъыӷма. Израилыӷмӣның пиңӯңа, рамкыңаның Вениаминым. Еврейпӣгӯңа, аңаюқахкалъю Еврейеңӯк. Малиҳқутақңаҳлъяхтуңа Иудеит Лӣлиҳтӯсӣтнун, тама̄кын апалъюқлъюку Фарисейеңуҳтуңа. 6Сягиқыпихлъюңа амьюқыта̄ткыхкақанка ухпықат. Қа̄ткыңъўа̄қақанка Иудеит Лӣлиҳтӯсӣт рыпалъ анахутылъыӷмун авутңитка̄гуңа. 7Иўырңа тама̄кут алъхыҳтыкақникақсяқынка ифлъяма̄нка апалъюқлъюку Христос. 8Ипа сяңўа̄т қамахлъюки ифлъяма̄нка апалъюқлъюку мыгнунаҳтулңа лӣтңўа̄лъымның Христос Иисусым, Атанқа. Лъңа апалъюқлъюку сяңўа̄т қамахлъюки ыхсима̄нка. Ысҳаӷанка малъястун аюқлъюки алъхыҳтыпигналюку Христос, 9илятңўа̄ҳтуңалъю лъңанун. Ухпықнанӣма̄қа хўаңамның пиниӷнақылъық қа̄ткутылъымкун Кияӷныӷым Лӣлиҳтӯся̄мнъун. Йыӷлыги лӣсимакақа Кияӷныӷым пиниҳтыстақа̄ңа қаюҳлъяк ухпықыхкыхка Христос. Уна пинилъық Кияӷныӷмың аюқуқ, югыт алъхыҳтақа̄т ухпықилъыӷмыхтыхун Христосымың. 10Пиюкылъыҳлъякақа, лӣнъалюку Христос, нанӷӣӷналюкулъю аҳтуӷьяҳқа̄нӷилъҳа уңуваҳтылъҳан; илянъалюңалъю икфиқылъҳанун, лъңатунлъю лъӣӷьяҳқа̄люңа туқулъҳани. 11Таўатын пикума, Кияӷнық сиӷимакақа хўаңалъю уңуваҳтысқылъюңа туқулъыӷмың.

Кытанқустыстун Аюқуңа Кынлымун Ка̄сюхўа̄ӷьюхлъяк

12Хўатын пиңунӷитуңа: «Христосытун лъӣӷума̄ңа налиӷмың Христосытун кияҳтақуңа қӯнпың». Иўырңа пинақылъҳақа қамахлъюку атуқңўа̄қа Христосым пиюкылъҳатун лъӣӷналюңа атуқналюкулъю писқысюлъҳа хўаңамнун. 13Ухпықа̄лгутымни, сюмыҳтаӷӣгатуңа кая̄лъқылӷахтӯманилюку. Иўырңа ата̄сиқ пӣқақа, пуйгулюку сяңўа̄ тунутымнилңуқ сивутмӣӷнақуткақуңа ка̄нъалюку сяңўа̄ сивумнилңуқ. 14Ынка̄м таклъяӷрукытун килга̄қуңӯңа кая̄лъқӣсиқналюку акилыҳтӯсяқ, Кияӷныӷым туқлъю̄тка̄нун памавык Христос Иисусыкун. 15Таўатын сюмыҳтаӷанӷилъкуфси, Кияӷныӷым лӣгикысна̄ӷӣ сюмыҳтаӷалъыси анахутңалӷӣт. 16Уна мыгнунапихтуқ, нагныӷутылътыки кияҳта̄лъыпут малихлъюку ипапиҳқылъық лӣткаҳпут.

17Ухпықа̄лгутымни, успутақлъюңа малихтыңъа. Ысҳапаглюки иляңилъю кияҳлъыҳӣт хўаңамтун. 18Сивунӷани угляӷңа̄н уңипа̄та̄тақақамси, ма̄тын уңипа̄нъақлъя̄таӷамси қунитӯмаӷма. Угля̄пихтут кияҳлъыҳӣт аңуягулютың Христосым туқулъҳаның қақӯракун. 19Сю̄мқақӣт югусимың пиюкылъҳит кияң, Кияӷнық авылӷаӷлюку. Кайңуюгусиҳқақсяқытың а̄ңа̄югусиқақӣт. Сюмыҳтаӷа̄ткақа̄т нунамылңуҳӣнақ кияҳта̄лъыҳтың ынка̄м на̄фқылъыңьяҳқа̄гут геенами. 20Иўырңа ухпықани хўаңкута қилягмӣңӯкут. Ынка̄м утақаңўа̄ҳпут югулиӷиста, Атанық Иисус Христос, укигьяҳқақ хўаңкунъун қилягмың памакын. 21Тагикуми алъяңуҳсяҳқақӣ кая̄лңӯт, туқумун аюқылӷӣт югусипут. Уңуваҳтыкатун югусимитун лъӣҳсяҳқақӣ аҳтуӷьяҳқа̄нӷилъыӷмикун. Та̄хун ата̄сикун аҳтуӷьяҳқа̄нӷилъыҳқун иглыӷусяҳқа̄ҳлъықа̄ сяңўа̄ қамахтыңъўа̄ӷлюку.

Currently Selected:

К Филиппийцам 3: ess2

Highlight

Copy