Деяния 27

Павел Агля̄скаңат Римымун

1Фестым Италиятысқысюгьилъю аңьяҳпахкун, агля̄тыстыкӣ Павелылъю, иляңилъю анусимиңлъяӷат умӣлўа̄ӷмун Юлийюмун. Юлийюлъю пилъюўаҳтыкулъҳӣт а̄тқылӷӣт: «Умӣлыхпига̄м Пилъюўаҳтыңи». 2Та̄ўа аңьяҳпак Адрамитымың пи, аӷуляқсяқлъыхӣна̄ҳтыкақ нынун Асиям ысныңанилңуӷнун. Таўавык ӯхлъюта аӷуляқукут. Аристархым малихтӣлъю Фессалоникаӷмӣм. (Фессалоника Македониямылңуқ). 3Уна̄миңани ка̄тукут Сидонымун. Юлийюм пинитуңўа̄қ пика̄ Павел, ля̄лиҳтыстақлъюку илякумта̄ӷанун Сидоными, сямың аклъюкыхка̄ның тӯнақлъюку писқылъюку. 4Сидонымың аӷуляқукут ануқа айгумун ынка̄м иглыҳтукут уқӣнылъҳакун қӣҳқам Кипрым. 5Иглыӷа̄кут ысныңакун Киликиямлъю, Памфилиямлъю та̄хкын нагныҳтукут Мирымун Ликиямылңуӷмун. 6Тама̄нтыфтуқ аңьяҳпак Александриямың пи, ынка̄м Умӣлўа̄ӷым Юлийюм лӣгиклъюку Италиянъақутаңа ӯхтыстӣлъю.

7Нунма̄сқуҳақ иглыҳтукут қафсиныгьяхлъяк аӷнық, иўырңа пияқлъӣӷңа̄мта ка̄тукут Книдымун. Ануқлъӣтым иглыӷапагниңӣтыстилъю та̄гавык, иглыҳтукут уқӣнылъҳакун қӣҳқам Критым, наӷуҳлъюку Салмон. 8Ысныңӣҳа̄кун иглыҳтукут пияқлъӣӷңа̄мта, ка̄тукут каңиӷамун а̄тқылӷӣмун, Уқитаӷвик Каңиӷақ, та̄на қантаӷанлыңуқ Ласеямың.

9Тама̄нтыҳлъяхтукут қынўат якуӷнаҳта̄ та̄клъюку иглыӷамун, сӣңынлъю Аӷнық наӷуҳлъыҳӣ священнигыт аҳқыша̄ӷвигат сыӷлыҳқылъҳитнун Иудеит. Ынка̄м Павелым кылыңася̄ӷӣ аңьяҳпагым умӣлўа̄ӷи. 10Пикӣ: «Укуҳси югни, сюмымни хўа̄ ынңа̄талъ якуӷнӣӷнақукут иглыӷалъымнъи. Ифлъя̄лъықаҳпутлъю аңьяҳпахпут уситӯма̄н, ынтақун талўа туқуляӷа̄лъықукут». 11Иўырңа Умӣлўа̄ӷым Юлийюм нагаткақыхкык аңьяҳпагымлъю умӣлга, аңьяҳпалыклъю ю̄к авылӷаӷлюку Павел. 12Алъюлъютыңлъю аңьяҳпагым юги иглыҳсюкат қаюҳлъяк та̄на каңиӷақ якуӷналӷӣ аңьяҳпагмун уксюҳфигулюни. Ка̄нъақналютың Финикымун пикат уксюҳсяҳқа̄лютың тама̄ни. Финикым каңиӷа̄ қӣҳқамылңуқ Критыми, северозападымунлъю, югозападымунлъю аюқылӷӣ.

Ануқлъилъыҳлъяк

13Икыхкымың ануқатаӷа̄ҳсян аңьяҳпагым юги пикат: «Та̄ната ануқа утақакаҳпут». Ынка̄м уйӷӣта сяюглюку тылянаңа̄кут Критым ысныңӣҳа̄кун. 14Иўырңа ануқлъиҳлъяхтуқ накаӷьямың ынка̄м қӣҳқамың атҳаҳтыҳлъяга̄. 15Аңьяҳпак аўатмун тыңсягу қӯтмун тагляӷнақуткысяӷлюта ӣлъқаюхтукут ынка̄м упӯпың тыңтыстукут. 16Қӣҳқасқуҳа̄м Клавдам ӯҳқаңанун лъӣӷусилъю уқитыӷра̄хтукут. Таўани қамуқсяқыфут аңьяҳаҳпут пияқлъӣӷуткыӷңа̄мтыху қа̄каҳпут. 17Та̄хкын аңьяҳпак аюгиҳсяӷа̄т асиҳлъюку тапҳаӷмың. Алиңлютың қына̄ҳлъюҳқӯнъаюкамың Сиртыми тылянаңат ифкаҳқуӷлюки тыңтыстукут. 18Уна̄миңани паниның ыслъя алмысиқыҳлъягьягу, аңьяҳпагым усиңан иляңи мыӷмун атыҳқуӷӣт. 19Аўакаӷа̄ни ыслъя алмысиқсягу аңьяҳпагым сянқутңи атыҳқуӷӣт. 20Қафсиныхлъяк аӷнық сиқинңунани, иӷалықыта̄ңунани пӣқ ыслъям сыӷлыҳлъягым аңталяңаның. Ынка̄м талўа ӣлъқаюхтукут, исигимақун туқуляӷа̄нъақылӷӣкут.

21Югыт ныӷыхпынатың мулю̄ҳлъягьята Павелым ныкывлюни пикӣ: «Укуҳси югни, нагаткақсяқуфсиңа кынъаянӷилңӯкут Критымың ынка̄м аҳся̄н сыӷлылӣӷнаянӷитуси, сяӷьяңӣнъаянӷитуси. 22Иўырңа ӣлъқаюхпынаси, налиҳӣнаҳси туқуна̄нӷитуқ иўырңақун аңьяҳпагӣлъықукут. 23Унук Кияӷныӷым яқулган такукақа̄ңа. Та̄ната Кияӷнық манигуӷақыхкыхка, лъңан пика̄ңа. 24Яқулгым пӣңа: “Павел, алиңыхпынаң, ка̄лъықутын Римымун, ныкывылъықутын сивуңакун Умӣлыхпига̄м. Юӷа̄ткыхкақутыхпының аңьяҳпагмытылгутытын қамахлъюки Кияӷныӷым югулилъықӣ”. 25Ынка̄м қуятык, ухпықӣңа Кияӷныҳқун таўатытңўа̄ӷысқылъюку уңипа̄тылъымтун. 26Иўырңақун аңьяҳпагӣлъықукут қӣҳқами».

27Қуля стамат сӣпнықлъюку унук Кылъӣми Адриатическими тыңтӣлъю. Та̄кўани унугым қука̄ни юля̄ӷыт пика̄т қӯтмун туӷўа̄ҳсюгнинъилюта. 28Тапҳақ уқихкутиӷлюку мыӷмун атыҳсяқмыхтыху югинақ я̄гнық ӯсқаҳтуткафтуқ. Тазиңапиҳқа̄ӷьямта тапҳақ атыҳлъя̄таӷьяқмыхтыху акимигақ я̄гнық ӯсқаҳтуткалӣмалӷӣ. 29Юля̄ӷыт алиңыхкат аңьяҳпак қалмысинъаюкан ынка̄м стаманың уйӷиӷа̄т киңуңакун. Та̄хкын юӷаҳтут аҳшахкӣӷысқылъюку. 30Аңьяҳпагым юля̄ӷи анагнақыхкат сивуяга аңьяҳпагым уйӷӣтылиӷнақысиӷўа̄ӷуткылъюку, аңьяҳақ мыӷмун атыҳтыка̄т. 31Иўырңа Павелым пикӣ умӣлўа̄қлъю, пилъюўаҳтытлъю: «Укут югыт аӷуляқыхката каютыпагӣлъықукут ынка̄м лъпыси туқуляӷа̄лъықуси». 32Ынка̄м пилъюўаҳтыт аңьяҳақ кыпутка̄т.

33Аҳтаӷаӷнақақа̄лъю Павелым қамахлъюки ныӷысқуӷўа̄қӣ, пикӣ: «Қуля стамат сӣпнықлъюку аӷнық ныӷылъқунӷитуси қаюҳлъяк ынңа̄талъ кылыңарӯлӷӣси. 34Тама̄кын апалъюқлъюку ныӷысқуӷўа̄ӷнақамси икнақуҳтысқылъюси. Налиҳӣнаҳси туқуна̄нӷитуқ талўа ақниҳна̄нӷитуқ». 35Ныпӣӷьями нықыкшаңлъямың тугулъюни игамсиқаюгвиклъюку Кияӷнық мануңитни икулъюни ныӷыхкақ. 36Югыт илютуҳсяӷьистың лъңитлъю қамахлъютың ныӷӯткат. 37Қырңаҳлъягымта аңьяҳпагмылңуӷни 276ңӯфтукут. 38Қамахлъютың ныӷӯнъыӷмың апыӷӣӷьямың аңьяҳпак уқыңылъиналюку пшеница мыӷмун атыҳқуӷа̄т.

Аңьяҳпагӣтылъық

39Аҳсягу қӯтмың ысҳа̄тут, та̄ўаңинақ лӣсюқынӷита̄т натуңутаңа. Иўырңа каңиӷалгуфтуқ ысналыгмың ынка̄м та̄хун тамлягнақсюхтут. 40Кыпӯлъюки уйӷӣтыт униткӣт мыӷмылъюки, пытугутӣклъю ақӯтак наӷиҳқуқӣт. Та̄хкын сяюглюки тыля̄наңат сивуягмылңӯт тыңтыстут тыспикавык ыснамун. 41Иўырңа аңьяҳпагым сивуяга аҳқитаӷисян киңуңа қагиҳлъягыт кагимта̄т.

42Пилъюўаҳтыт пияӷӣт анусимиңлъяӷат туқуқуӷналюки лю̄рақ қӯтмун пугимлютың навык анагнаюката. 43Иўырңа умӣлўа̄ӷым туқутысюгумаңитка̄ Павел ынка̄м ӣнӷуткӣ. Йыӷлыги қылъқӣ пугимақаюха̄т қӯтмун таглӣсқылъюки. 44Тама̄кут пугимылъхилңӯт аңьяҳпагым икылъҳа̄кун тугулюки тагляӷнақысқыхкӣ қӯтмун. Таўатын қамахлъюта яйўа̄сың ӯхлъыӷа̄тукут қӯтмун.

Currently Selected:

Деяния 27: ess2

Highlight

Compare

Copy