2е Тимофею 4

1Христос Иисус тагикуми иглыӷутиналюни Атаныҳпагулъыӷмини, нанқихлъықӣ уңувалӷӣтлъю туқукатлъю. Ынка̄м нагасиманӷыхкыни Кияӷныӷылъю, Христос Иисусылъю, қылӷамкын 2уңипақики Пинилӷӣт Уңипат. Сягиқлъютын уңипақики югнун нагасюгуӷңа̄та налиӷмың нагасюгунӷитыӷңа̄та. Ныкыхмылъютын апыҳтуӷилъыҳпыгун ухпыҳтыснақики, иныҳтики анахутылъҳитның, кайымикилъю. 3Пилъыҳқақ тагиңӯқ югыт нагасюгнаниҳлъықут ипапигнун апыҳтӯсянун. Иваӷилъықут пиюкыхкамыхның апыҳтуӷистылӷутның нагатыпигыснаӷналюки нагақуӷьюкыхкаҳӣнатың. 4Нагасюгнаниҳлъықут ипапилъыӷмун, нагасюгьягулъықут тымңинун уңипаӷанун. 5Иўырңа лъпык ӣўлың ныкыхмылъютын, нагныӷутигу сяңўа̄ пияҳқан икфиқңуӷңа̄ҳпык, уңипақикыста̄ Пинилӷӣның Уңипаның. Лъпык қыпҳаҳтыкыхкаңатын Кияӷныӷым, апыӷӣҳу қамахлъюку қыпҳақақ лъпынун писқыхка̄.

6Хўаңа аҳқуткысяҳқа̄ҳсима̄ңа Кияӷныӷмун, туқулъыҳқақа ка̄сяҳтӯма̄қ. 7Пилъюўа̄ма̄қа пинилӷӣ пилъюўалъық, апыӷӣӷақа килга̄қулъқа, ата̄сӣӷмысимаңинақа̄гуңа Атаныӷмун. 8Ынка̄м та̄ўа Кияӷныӷым утақӣтңўа̄ хўаңамнун қаҳпаңа ылъқуӷутңалъҳым. Атанӷым ылъқуҳлъюку нанқихтистым акилыҳтуҳлъықа̄ңа Нанқихтилъҳым Аӷныӷани. Хўаңаңина̄хпынаңа иўырңа акилыҳтуҳлъықӣ қамахлъюки тама̄кут қылянылӷӣт тагилъыҳқа̄ның.

Павелым Та̄қнӣтңи

9Пинақылъҳа̄хкын қамахлъюкык тагирахкӣӷи хўаңамнун. 10Димасым пиниқсялӣсима̄ нунам кияҳта̄лъҳа ынка̄м унисима̄ңа, аӷуляқума̄қ Фессалоникамун. Крискента Галатиясима̄қ ынка̄м Тит Далматиямун пима̄қ. 11Лукаңинаҳақ хўаңамнитуқ. Марка ақфалюку кылъқынъакын қаюҳлъяк каюткыпихтақа қыпҳалъымни. 12Тихик Ефесымун каяхсима̄қа. 13Троадамылъюңа униткақахка қа̄слъихка Карпынкуни. Тагинақыхкувык тагитаҳнакыхкын. Тагитаҳнакытынлъю ӣмгат иганка, кияң та̄кут амӣрамың улима̄ӷыт.

14Александрым сӣлюмың сяңлъяҳтым ынңа̄талъ сыӷлытун пикақа̄ңа. Атанӷым аӷью̄ӷна̄ӷа̄ таўатын пилъҳаның. 15Лъпыклъю кылыңаклъюку таўатын пинаюкаңатын қаюҳлъяк уңипаҳпут угумикыпихта̄.

16Нанқихтистымун агля̄сюхўа̄ӷақңатңа китум алңунак мысиӷа̄сяҳтулъҳита̄ңа, йыӷлыги униқаӷа̄ткақа̄тңа. Юӷа̄ткақанка Кияӷныӷмун акинақыфқӣта писқылъюки таўатын пилъҳитның. 17Иўырңа Атанық хўаңамнитка̄гуқ. Икнақусиқақа̄ңалъю уңипақысқылъюки ӣңунӣта Пинилӷӣт Уңипат қамахлъюки язычнигыт нагақӣсқылъюки. Ынка̄м Кияӷныӷым югуликақа̄ңа туқутылъыҳқамың. 18Атанӷым югулияҳқақа̄ңа тамаҳа̄ның сыӷлыӷым сюӷугалъҳаның, ынка̄м пақнанаңуна̄н агля̄лъықа̄ңа қилягмылңуӷмун Атаныҳпагулъыӷминун. Лъңанун усюқилъық қӯнпырухлъяк кынлыңуна̄н. Аминь.

19Уңипа̄таҳнакытын Прискиллалъю, Акилалъю, Онисифорылъю ныңлъюгуткулъҳӣт сю̄мқақанкаңуқ. 20Ераста уныхтыка̄гуқ Коринфыми; қинуюгутаңаның Трофим униткақақа Милитыми. 21Уксюӷвагилган тагинақыҳлъяги.

Еввулымлъю, Пудымлъю, Линымлъю, Клавдиямлъю, иляңиталъю ухпықа̄лгутыт уңипа̄тысқӣси сю̄мқақӣсиңуқ. 22Атанық таӷныӷаҳпынилъи, қуяслъисилъю.

Currently Selected:

2е Тимофею 4: ess2

Highlight

Compare

Copy