1е Коринфянам 4

Христосым Апостолыни

1Сюмыҳтаӷа̄ткитыкут қыпҳаҳтыкнилюта Христосымун. Қыпҳаҳтыңӯкут апыҳтуӷилӷӣт ипапиҳқылъыӷмың Кияӷныӷым апыҳтӯтка̄ның хўаңкунъун. 2Христосым қыпҳаҳтыңи ата̄сӣӷмысяҳқа̄гут. 3Хўаңа, ата̄сӣӷмынъилюңа қыпҳаҳта пикуфсиңа, налиӷмың ата̄сӣӷмынъыӷинъилюңа китум алңунак пикаңаңа, сюмыҳтаӷа̄ткынъа̄нӷитақа. Талўа хўаңамның нанқихсигатуңа. 4Налъюкақа̄ сямың анахусиматка, иўырңа анахутылъҳинъилюңа пинӷитуңа. Атанҳӣна̄м нанқихсяҳқақа̄ңа. 5Ынка̄ңам ўӣн нанқихтыхпына̄н кина алңунак сялъҳаның. Атанӷым тагинқихтыкуми кукыхсяҳқақӣ югыт илюңит алӣҳқылъюки сяңўа̄т ӣӷңаялӷӣт тысқамани. Алӣҳқысяҳқақӣ сяңамың ся̄қутаңи. Та̄хкын усюқсяҳқат тама̄кут усюқылъыңьяҳқа̄гут Кияӷныӷмың.

6Ухпықа̄лгутымни, лъпыси апалъюқлъюси Аполлослъю хўаңкутуң успутақңӯкуң. Успута̄гукуң лъпысинун лӣтысқылъюку уна игақңалӷӣ сямың писӣтаңа: «Қа̄ткақитыки сяңўа̄т игақңалӷӣт Акузитни Игақыхкани». Налиҳӣнаҳпыси а̄ңа̄югуткысяқуна̄н ата̄сиқ ю̄к, а̄лъҳа угумиклъюку. 7Китум пиниӷатаӷаҳтыстиси ухпықа̄лгутыхпысиның? Сяңўа̄ қамахлъюку Кияӷныӷмың пикаҳси. Кияӷныӷым тӯнумакаңиси, а̄ңа̄юхтыхпынаси. Уңипаҳпынаси хўатын: «Сяңўа̄ қамахлъюку хўаңамның пикақақа».

8Алъхыҳтыңъўа̄ӷума̄ҳси аклъюкыхкаҳси қамахлъюку! Аклъюңиӷиңўа̄ӷлюси аюқуси! Хўаңкуңунаси умӣлгуҳсима̄си! Умӣлгулӷӣситуқ, ынка̄м умӣлгутилгусиӷнаяӷамси! 9Сюмыҳтаӷалъымни Кияӷныӷым ныкыхтыкақӣлъю апостолыни укалиҳпига̄люта югның. Анусимиңлъяӷастун аюқукут, туқусяҳқастун. Югыт қамахтыңъўа̄ӷлютың, яқулгытлъю ысҳапагақӣлъю. 10Хўаңкута налъюңуҳтыка̄гукут Христос апалъюқлъюку, иўырңа лъпыси сюмыҳпысини пыҳқиныпигӯси ухпықани. Югыт ўа̄кигатӣлъю, иўырңа сюмыҳпысини лъпыси нагатақӣсилъю, қӯлваӷақӣсилъю, хўаңкута пиңигатӣтинкут. 11Хўавымун кынляңа нықаңисягақукут, мыӷьяҳқӣсягақукут, а̄ткӣсягақукут. Югыт қывуткақӣлъю. Ныңитукут, иглыҳта̄гукут қӯнпың. 12Қыпҳаӷақукутлъю қывӯлъюта маниңналюта кияҳта̄ӷусиҳқамың. Сыӷлықӯлӷӣт хўаңкунъың пинитун алыҳқуӷақапут. Ухпықа̄тымнъың амью̄ткылӷитлъю, акузилӷӣгатукутлъю, акисигатапутлъю. 13Иқлъыңиқулӷилъю пинитун алыҳқуӷақапут таўатын пифқӣта писқылъюки. Хўавымун кынляңа сюмыҳтаӷа̄ткақӣлъю, сякўа̄ӷыстунлъю, сясӣнӷилңуӷыстунлъю. 14Письмонӷитуңа кайңуюхналюси. Иўырңа пиниқыпихлъюси хўаңа катам таӷнуҳақылӷистун лӣлиҳтуӷьюгақамси кияҳта̄лъыҳқаҳпысиның. 15Қайўа апыҳтуӷистытупихсяӷңа̄ҳпыси Христосымың, ататуҳлъянӷитуси. Ухпықсюхўаӷақңафсигу Иисус Христос нагақуӷлюки Пинилӷӣт Уңипат, таўанита атастун лъӣқаңа лъпысинун. 16Ынка̄ңам кияҳтысюпихтамси хўаңамтун. 17Тама̄кын апалъюқлъюку Тимофей каяхтыңъўа̄қа лъпысинун. Иӷнықылӷӣстун аюқақа Атаныҳқун. Ата̄сӣӷмылңуқ ухпықақ пиниқыпихтақа. Нықаңуҳна̄ӷӣси натын хўаңа кияҳтақылъымның Христосымун. Таўатылңуқ кияҳта̄лъық апыҳтӯсяқақақа ухпықанун тамаңанилңуӷнун.

18Иляси а̄ңа̄югныӷуҳтақут, қаюҳлъяк сюмыӷмыхни ля̄лиҳна̄нӷинъилюңа пикақа̄тңа Коринфымун. 19Иўырңа Атанӷым пиюкылъқыхкагу, лъпысинун пияҳтуңыстаҳтуңа. Та̄хкын лӣгикылъықанка а̄ңа̄югныӷыт а̄ңа̄юхтылъыӷмыгыстун пияҳқа̄таңи. 20Кияӷныӷым Атаныҳпагулъҳа акузитытхун аюқынӷитуқ иўырңа аҳтуӷьяҳқа̄нӷилъыҳқун аюқуқ. 21Ка̄скума сясқысюгыстыңъа? Анагуталиӷлюңа̄ аӷью̄ӷлямсӣ, налиӷмың пиниқлъюси, пинитуңўа̄қ пилямсӣ?

Currently Selected:

1е Коринфянам 4: ess2

Highlight

Compare

Copy