1е Коринфянам 3

Кияӷныӷым Қыпҳаҳтыңи

1Ухпықа̄лгутымни, лъпысинитақңама алыҳқуҳпагниңиткақамси алыҳқуӷўақылъымтун ухпықаҳлъягыт. Йыӷлыги алыҳқуқақамси ухпылъыси аңлилъҳилңуӷыстун аюқлъюки. Ухпықылъыҳси Христосыкун таӷнуҳаҳаӷыстун аюқут. 2,3Кукшагнаңуна̄н апыҳтуқақамси. Катам таўатын мамаҳаӷмың мыӷыслъыҳӣстун пикақамси. Нықыпигмың ныӷыстыпагниңиткақамси қаюҳлъяк нықыпихтуҳпагниңилңӯси сялин. Паниның ма̄тын нықыпихтуҳпагниңитақуси, қаюҳлъяк ухпықа̄нӷилңуӷыстун аюқуси сялин. Лӣгикыстыңъўа̄ҳси ухпылъыҳпыси аңлинӷитылъҳа ақиналъыҳпысигунлъю, аӷиватылъыҳпысигунлъю. Ухпықа̄нӷилңуӷыстун кияҳтыңъӯси. 4Налиҳси пиныӷмини: «Хўаңа Павелым малихся̄ҳтыка̄ңа», илясилъю пиныӷмыхни: «Хўаңа Аполлосым малихся̄ҳтыка̄ңа», ухпықа̄нӷилңуӷыстун пӣқуси.

5Кинаңа̄ўа Аполлос? Кинаңузиңа хўаңа? Қыпҳаҳтыкӣнкуң Кияӷныӷым, каюсӣткақамси ухпықысқылъюку Христос. Қыпҳақалыстаҳӣна̄гукуң Атаныӷым қылӷутка̄ның. 6Лъпыси Кияӷныӷым пӣтысиӷаӷвикӣси. Пӣтысиӷаӷақуңа, Аполлосым мыҳқақа̄, иўырңа Кияӷныӷым нагустақа̄. 7Ынка̄ңам кина алңунак пӣтысӣӷалӷӣлъю, мыҳқилӷӣлъю укавантуқ. Кияӷныҳӣнақ а̄ңыҳлъяхтуқ нагустикаюгӯқ. 8Пӣтысиӷаҳталъю, мыҳқисталъю таўатылъкутук. Кияӷныӷым акилыҳтуӷьяҳқақа̄к қыпҳалъҳыхкынкун. 9Қыпҳалгуткутукуң Кияӷныӷмун; лъпыси Кияӷныӷым пӣтысиӷаӷвикӣси.

Кияӷныӷым мыңтыӷақӣси. 10,11Кияӷныӷым наңлъыхталъық тагивақа̄ атуқлъюку пӣнлиқақақа қыпҳақақ лъпысини. Пыҳқинылӷӣстун тунымиқақақа мыңтыӷақ улимаяҳқақ. Иисус Христосыңина̄гуқ тунымақ, алъя ся̄ӷўакун тунымаҳқӣтуқ. Иляңита улимавикңўа̄т қа̄йңакун. Қамахлъюни пира̄мсилюни улимали. 12Иляңита атуҳлъықа̄т золото, серебро, аңляминалӷи уйӷақ, иляңита унаҳсиқ, палиқақ выга̄қ, уңагақлъю тунымакун та̄хун. 13Сяңўа̄ атуқыхкаҳпут ысҳаӷьяҳқақаҳпут ата̄сикаҳта̄мта қамахтыңъўа̄ӷлюта аӷныӷми таўани Христосым нанқихтилъыҳқа̄ни. Кынӷым ысҳаҳтысяҳқақа̄ қыпҳақаҳпут натытуляңа. 14Сяңўа̄ югым атуқыхка̄ куманӷилъкуни, акилыҳтӯсяңьяҳқа̄гуқ. 15Иўырңа иляңан югым қыпҳақа̄ ифлъяяҳқа̄гуқ кумақуни, акилыҳтӯсяңна̄нӷитуқлъю. Нақамынрақ лъңа югулилъыңьяҳқа̄гуқ, катам таўатын кыныӷмың а̄нылӷӣстун.

16Лӣсимакңўа̄ӷаҳси Кияӷныӷым Храмкӣси. Аглыӷналӷӣк Таӷныӷакык кияҳтыңӯқ илюхпысини! 17Китум алңунак на̄фқыхкагу Кияӷныӷым Храмыңа, Кияӷныӷым на̄фқысяҳқақа̄ лъңа, қаюҳлъяк Кияӷныӷым Храмыңа аглыӷналӷӣңӯқ. Лъпыси Храмкӣси.

18Кина алңунак пӯҳтыфқа̄ми лъңаның пили. Налиҳси сюмыҳтаӷа̄ңукуми лӣтыпахлъяка̄нилюни нунам пыҳқинылъҳаның, йықай малихлъигу Христос, ухпықа̄нӷилңӯт тымңиңуниӷңа̄тху. Таўатын пикуни ынңа̄талъ пыҳқинӷуҳтыпӣхлъықа̄. 19Кияӷныӷми нунам пыҳқинылъҳа тымңиңӯқ. Акузитни Игақыхкани игақңа̄қ: «Пыҳқинӷыт югыт нунами хўани Кияӷныӷым пипагниңӣтыстақӣ лъңита катам пыҳқинылъҳитхун». 20Игақыхка̄гуқлъю: «Атанӷым лӣсимака̄ пыҳқинӷым югым сюмыҳтаӷалъҳа сясӣнӷитуқ».

21Ынка̄ңам китум алңунак қука̄югуткысяҳқақынӷитӣ сяңўа̄т югыт пӣқыхкаңит. Сяңўа̄ қамахлъюку Кияӷныӷым пиниҳқусиҳқа̄ҳтыстыкақа̄ лъпысинун, 22талўа Павел, Аполлос, Петырлъю. Нуналъю уна, уңувалъықлъю, туқулъықлъю, сяңўа̄лъю алңунак кияҳта̄лъыӷмылңуқ ма̄тын, сяңўа̄лъю алңунак ка̄сяҳқақ, қамахтыңъўа̄ӷлюки лъпыси пикаси. 23Ынка̄м лъпыси Христосым пикӣси, Христос Кияӷныӷым пика̄.

Currently Selected:

1е Коринфянам 3: ess2

Highlight

Compare

Copy