P'ilipense 1

Pablopa nãɨ k'art'ade naa bɨda

1Mɨ Pablopɨ. Timoteo mɨ ome bɨma. Tai Jesucristo pae pari mimiapataɨrãpɨ. Mɨa nãɨ k'art'a ũpẽarã P'ilipo p'uurudepemarã pae bɨruma: ũpẽarã ak'ɨpataɨrã, ũpẽarã k'aripapataɨrã mãɨnepa jõma ẽpẽrarã Tachi Ak'õrenepemarã Jesucristo ome berã pae.#1:1 Ũpẽarã ak'ɨpataɨrã. K'ãp'ũra pedeade pastores wa ancianos apatama. Ũpẽarã k'aripapataɨrã. K'ãp'ũra pedeade diáconos apatama. 2Taipa k'ɨ̃ria p'anɨma Tachi Pajãnepema Ak'õrepa mãɨnepa Tachi Chipari Jesucristopa ãchi sõpiadepa mãra k'aripa p'ananait'a ne k'ɨ̃risiawẽa p'ananamẽrá.

Pablopa ũpẽarã k'orea Tachi Ak'õrea ɨt'aa chiidida

3Mɨa mãra k'ɨ̃risiarucha Tachi Ak'õrea sõpia bɨade aparima. 4Tachi Ak'õrea ɨt'aa chiidirucha mɨa mãra k'orea arapá ɨt'aa chiidiparima, 5mãrapa ichi pedea ĩjãasida ewaridepa, chi pedea pia Cristo k'orea mɨ k'aripa jaratea p'anɨ pẽra. 6Mɨa nãɨ piarã k'awa bɨma: Tachi Ak'õrepa mãra sõne pia ooda, pia oopodoipɨ aba Jesucristo cherudea. Mãɨne ichia mãra jõma pia ua baipɨ. 7Pia bɨma mɨa jõma mãra k'orea mãɨya k'ɨ̃risia bait'a, mãra minachia k'ɨ̃ria bɨ pẽra. Mɨ eda jɨ̃a nɨbɨde wa chi pedea pia Cristo k'orea piarã k'awapii bɨde, Tachi Ak'õrepa ichi sõpiadepa mãra mãɨnepa mɨ sida k'aripa bɨma ichi pedea jaratea p'ananamẽrá. 8Tachi Ak'õrepa k'awa bɨma mɨa Jesucristo minachia k'ɨ̃ria bɨdepa jõma mãra sida minachia k'ɨ̃ria bɨt'a.

9Mɨa Tachi Ak'õrea ɨt'aa chiidi bɨma mãra minachia chi k'ɨ̃ria p'ananamẽrá, ichi pia k'awadamẽrá mãɨnepa sãmaasã́ nipadai p'anɨ k'awadamẽrá. 10Mãɨya mãrapa minachia k'awadaipɨ k'ãre pia bɨt'a mãɨnepa Cristo cherude ichi k'ĩrari nemietá newẽa p'ananait'a mãɨnepa mãra k'orea waapẽarãpa k'achia pedeadawẽa p'ananaipɨ. 11Mɨa ɨt'aa chiidi bɨma mãra Jesucristodepa ne ãareaɨne jĩp'a p'ananamẽrá. Mãɨya ẽpẽrarãpa Tachi Ak'õre chi atepe bɨade adaipɨ mãɨnepa ichiá pia pedeadaipɨ.

Ne ãareaɨne Pablo Cristo k'orea bɨma

12Ũpẽarã, mɨa mãrá k'awapii k'ɨ̃ria bɨma chi mɨ eda jɨ̃a nɨbɨdaadamina chi pedea pia Cristo k'orea atepe jaratea bɨt'a. 13Romanepema chi minachia k'awa bɨ chi te ak'ɨpataɨ papaká berãpa mãɨnepa waapẽarãpa k'awa p'anɨma mɨ Cristo k'orea eda jɨ̃a nɨbɨt'a. 14Mãɨ k'orea chok'ará ũpẽarãpa Tachi Chiparidepa Tachi Ak'õre pedea ne wap'eawẽa jara p'anɨma.

15Piarã chi eda waapẽarã mɨ ome piawẽa p'anɨma. Ãchia Cristo k'orea jara p'anɨma mɨ k'aepẽra atepe k'awa p'anɨane adai k'orea. Maamina waapẽarãpa k'ɨ̃risia piadepa jara p'anɨma. 16-17Mãɨrãpa k'ɨ̃rianepa mãɨya oopatama. K'awa p'anɨma Tachi Ak'õrepa mɨ nãma bɨsit'a, chi pedea pia Cristo k'orea piarã k'awapimẽrá. Maamina waapẽarãpa Cristo k'orea jara p'anɨma minachia k'awa berã jĩra k'ɨ̃risia p'anɨ pẽra. K'ɨ̃risia piadepa mãɨya oodak'ama, mãɨpari k'ɨ̃risia p'anɨma mɨ nãma eda jɨ̃a nɨbɨde atepe sõp'uapidait'a. 18Maamina ¿mãɨ sak'aima? K'ɨ̃risia piadepa wa k'ɨ̃risia piawẽanepa jara p'anɨpɨra, Cristo k'orea jara p'anɨma. Mãɨ k'orea mɨ arapá bɨma.

Mãɨnepa arapá baipɨ 19mɨa k'awa bɨ pẽra mɨ nãmapema awara wãit'a, mãrapa Tachi Ak'õrea ɨt'aa chiidi p'anɨ pẽra mãɨnepa Jesucristopa teada Jaorepa k'aripa bɨ pẽra. 20Cristo k'orea mɨ mi ãpia pida p'eraiwẽa bɨma, mãɨpari ichi k'orea pedeai k'orea p'eraiwẽa bɨma. Mãɨya mɨa jõmãɨrã́ Cristo chi atepe bɨt'a k'awapiipɨ, ewaricha oo bapari jĩra. Chok'ae beeipɨra wa piuipɨra, mɨa k'ɨ̃ria bɨma jõmãɨrãpa mɨnepa k'awadait'a Cristo chi atepe bɨt'a. 21Mɨmá, chok'ae bɨde abapuru Cristode bai bɨma, maamina piurude atepe pia baipɨ. 22Mɨ chok'ae bɨde Cristo k'orea p'ue jaratea baipɨ. Mãɨ k'orea mɨa atua bɨma sãmaasã́ k'ɨ̃ria bɨt'a, chok'ae bai wa piui. 23Mãɨ jarait'a chaarea bɨma, umenepemarã chi sãɨ atepe pia bɨt'a. Mɨmá pia bɨma piuit'a, Cristo ome bai k'orea. 24Maamina mãra k'orea pia bɨma mɨ chok'ae bait'a. 25Mãɨpuru k'awa bɨma mãra k'aripai k'orea mɨ mãicha chok'ae bait'a mãɨnepa mãicha mãra ome ará bait'a. Mãɨya mãrapa Cristode pia ĩjãa p'anɨnepa arapá p'ananaipɨ. 26Jesucristopa mɨ mãramá mãicha ateerude mãra ichi k'orea pia arapaadak'ari pia jaradaipɨ.

27Jĩp'a nipat'ɨ chi pedea pia Cristo k'orea jara bɨ jĩra. Mãɨyara mɨa mãra ak'ɨde wãipɨra, wa mãra ome bɨwẽne mãra k'orea ũriipɨra, k'awaipɨ mãrapa abarik'a k'ɨ̃risiadepa ará minachia ĩjãa p'anɨt'a mãɨnepa ará minachia mimia p'anɨt'a mãɨ pedea pia k'awapidai k'orea. 28Mãra chi nek'ĩramá mi ãpia pida wap'earãt'ɨ. Mãɨpa k'awapiipɨ Tachi Ak'õrepa ãchi k'enaipɨ, maamina mãra k'aripaipɨ. Mãɨ Tachi Ak'õrepa jõma oo bɨma. 29Ichi piadepa mãra t'ɨ̃é pasima abapuru Cristode ĩjãa p'ananamẽrá, mãɨpari t'ɨ̃sima Cristo k'orea minachia mĩanamẽrá. 30Mãrapa unusidama mɨ minachia mĩa bɨde choa badat'a, mãɨnepa idiapae pida ũri p'anɨma mɨ wapida choa bɨt'a.#Hecho 16:11-40. Ara mãɨ jĩra mãra sida minachia choa p'anɨma.

Currently Selected:

P'ilipense 1: tdc

Highlight

Copy

Compare