Hecho 22

1Pablopa jarasima: «Ũpẽarã mãɨnepa chõarã, ũrit'ɨ. Ara mɨ k'orea jararuma».

2Ichi hebreo pedeade pedea bɨ ũrisida pẽra ãchi k'ĩup'ea tuaneesidama. Mãɨne Pablopa jarasima:

3«Mɨ judiopɨ. Cilicia tuade Tarso p'uurude t'õsima. Maamina mɨ nãma Jerusalene warisima. Jarateaparí Gamalielpa mɨá ãarea tachi chõarãenapemarã Moisepa bɨdat'a minachia jarateasima.#Hecho 5:34-39. Mɨa Tachi Ak'õrene minachia ĩjãa bapachima mãrapa ĩjãapata jĩra. 4Mãɨpa mɨa chi O Chiwidide ĩjãapataɨrã ẽp'ẽ bapachima, ãchi mĩapii k'orea. Ɨmɨk'ĩrarã mãɨnepa wẽrarã chi jɨ̃a nɨbɨpataɨ tede eda jɨ̃a nɨbɨpisima. Mãɨnepa chi eda waapẽarã peapisima. 5Mãɨ chi p'aare minachia k'awa bɨpa mãɨnepa ãarea judiorã chi mãɨrã chaarearã k'awa p'anɨma. Ãchia mɨá k'art'a teasidama judiorã Damasco p'uurudepemarãpa mɨa chi O Chiwidide ĩjãapataɨrã jitai bɨt'a mãɨ k'awadamẽrá. Mãɨne mɨ Damasco p'uurudea wãsima ãchi nãma Jerusalenea enemeek'ari chi chaarearãpa ɨtɨadamẽrá.

6»Maamina Damasco p'uuru k'ait'a pamaa bɨde, ɨmat'ip'a mɨ ik'idá pajãnepa ichik'á urua jũra jẽrat'ĩusima. 7Mɨ jeeda baeside pedea ũrisima. Mãɨ pedeapa mɨá jarasima: “Saulo, Saulo, ¿k'ãre k'orea mɨ ẽp'ẽ bɨma?” 8Mɨa idisima: “Mɨ chipari, ¿pɨ k'aima?” Ichia p'anoosima: “Mɨ Jesú Nazaredepemapɨ, chi pɨa ẽp'ẽ bɨpɨ”. 9Chi mɨ ome nipadapa mãɨ jẽrat'ĩu unusidaɨde p'erasidama, maamina chi mɨ ome pedea bɨt'a ũrinaé pasima.#22:9 P'erasidama. Minachia k'art'a griego pedeade mãɨ pedea newẽma. 10Mãɨne mɨa idisima: “Mɨ Chipari, ¿pɨa k'ãre k'ɨ̃ria bɨma mɨa ooit'a?” Tachi Chiparipa p'anoosima: “P'irabarik'ari Damasco p'uurudea wãse. Jãma jaraipɨ k'ãre ooi bɨt'a”. 11Mãɨ jẽrat'ĩusipa mɨ tau p'ãriopisima. Mãɨpuru chi mɨ ome p'ananarãpa mɨ juade jitadak'ari Damasco p'uurudea ateewãsidama.

12»Mãma ẽpẽra Anania apataɨ basima. Mãɨ Ananiapa Tachi Ak'õre wap'ea bɨ pẽra Moisepa bɨda minachia ĩjãa basima. Ãarea judiorã Damasco p'uurudepemarãpa ichi k'orea pia pedeapachidama. 13Mãɨ Ananiapa mɨ ak'ɨde wãk'ari jarasima: “Ũpẽa Saulo, pɨ tau p'ãrio bada pia beese”. Ara mãɨne mɨ tau pia beek'ari ichi unusima. 14Maapae Ananiapa jarasima: “Tachi Ak'õre tachi chõarãenapema ome badapa pɨ jɨrɨ atasima ichia k'ɨ̃ria bɨt'a k'awamẽrá, chi Jĩp'a Bɨt'a unumẽrá mãɨnepa ichia pedearut'a ũrimẽrá. 15Ãarea pɨa ununa mãɨnepa ũrina ãareaɨrã́ jaraipɨ. 16¡Waa nɨrãse! P'irabarik'ari porochoase. Ichiá ɨt'aa chiidise. Pɨa nemietá ooda ichia ãarea k'ɨ̃risia atuaipɨ”.

17-18»Mãɨya nak'ari mɨ jĩitea Jerusalenea chesima. Ewariaba Tachi Ak'õre te minachia bɨdea wãk'ari ichiá ɨt'aa chiidi basima. Mãɨne mɨa k'ãmok'araa jĩra Tachi Chipari unusima. Ichia mɨá jarasima: “Jerusalenepa isapea ãyá wãse. Pɨa mɨ k'orea jara bɨt'a chi nãmapemarãpa ĩjãanaiwẽma”. 19Mɨa nãɨya p'anoosima: “Maamina, mɨ Chipari, ãchia minachia k'awa p'anɨma naena mɨ judiorã ará pedeapataɨ techa wãk'ari chi pɨde ĩjãapataɨrã jitak'ari p'epachima mãɨnepa chi jɨ̃a nɨbɨpataɨ tede eda jɨ̃a nɨbɨpipachima. 20Chi pɨ k'orea pedea bɨ Esteban peasidaɨde mɨ sida arí basima. Ichi peautat'a mɨa pia unusima. Mãɨ awara ãchi neet'á ɨ̃rɨ jɨ̃pataɨ mɨa ak'ɨ basima”. 21Maamina Tachi Chiparipa mɨá jarasima: “Wãse. Mɨa pɨ t'ɨmɨa judiorãwẽmá peeipɨ”».

Romanepemarãpa Pablo p'edada

22Pablopa jara bɨt'a judiorãpa k'ĩup'ea ũri tuanasidama. Maamina Tachi Chiparipa ichi judiorãwẽmá peeyade aside jĩk'ua jara tuaneesidama:

«¡Jãɨ ẽpẽra chok'ae bai pia bɨwẽma! ¡Peat'ɨ!»

23Mãɨya bia p'anɨne chi ãchi neet'á ɨ̃rɨ jɨ̃pataɨ wẽanak'ari yooro jora ɨt'aa bat'a tuaneesidama. 24Mãɨpuru papaká berã chi atepe chaarea bɨpa jarasima Pablo papaká berã tuanapataɨ tede eda ateewãnak'ari p'epidamẽrá. Mãɨya oopisima Pablopa jaramẽrá k'ãre k'orea judiorã ichi ome k'ĩruu p'anɨt'a. 25Maamina ichi p'edai k'orea jɨ̃utade Pablopa chi papaká berã chi mãɨrã chaarea arí bɨa jarasima:

—¿Mãrapa romanepemarã aba p'ue p'edai p'anɨk'ãra ichi nepɨra ak'ɨdai naena?#22:25 Chi romanepema leyde bɨ basima romanepema ẽpẽra p'ue p'edaiwẽt'a, jok'aedaiwẽt'a wa peadaiwẽt'a, ichi nepɨra ak'ɨdai naena.

26Mãɨ ũriside papaká berã chi atepe chaarea bɨmá wãk'ari jarasima:

—¿Pɨa k'awa bɨk'ãra k'ãre oorut'a? Jãɨ ẽpẽra romanepemapɨ.

27Maapae papaká berã chi atepe chaarea bɨ Pablomá wãk'ari idisima:

—¿Piarã pɨ romanepemak'ãra?

Pablopa p'anoosima:

—Ãjã, mɨ romanepemapɨ.

28Chi papaká berã atepe chaarea bɨpa jarasima:

—Mɨa erreara minachia teasima Romanepema pai k'orea.

Pablopa jarasima:

—Mɨ t'õnaenapema romanepemapɨ.

29Ara mãɨne chi Pabloa ne ididai k'orea p'ananapa itu bɨsidama. Chi papaká berãpa chi atepe chaarea bɨpa Pablo romanepema k'awaside minachia ne wap'easima ichi k'ãnenapa jɨ̃pida pẽra.

Pablo judio chi chaarearã berã k'ĩrari bada

30Norema papaká berã chi atepe chaarea bɨpa wapida k'awa k'ɨ̃ria basima judiorãpa mãɨ k'ãre k'orea Pablo nepɨra pará bɨade a jara p'anasit'a. Mãɨpuru ichi k'ãnenapa jɨ̃ bada ẽrasima.#22:30 K'ãnenapa jɨ̃ bada. Griego pedeade chi eda waapẽarã k'art'ade mãɨ newẽma. Maapae ichia p'aarerã chi mãɨrã chaarearã mãɨnepa ãarea judiorã chaarearã ará p'anapisima. Mãɨne Pablo ateewãk'ari ãchi k'ĩrari bɨsima.

Currently Selected:

Hecho 22: tdc

Highlight

Copy

Compare