2 Corintio 2

1Mãɨ k'orea mɨa k'ɨ̃risiasima mãra ak'ɨde wãiwẽt'a. Mãicha mãra ɨtɨai bɨdepa sõp'uapii k'ɨ̃riaé pasima. 2Mɨa mãra sõp'uapiipɨra ¿k'aipa mɨ arapaapiima? ¿Mãra sõp'ua berãpa mɨ arapaapidaik'ãra? 3Mãɨ k'orea mãra ak'ɨde wãi k'aepẽra k'art'a tea peesima. Mãɨya mɨ wãrune mãrapa mɨ sõp'uapidaiwẽma. Mãrapa mɨ arapaapidai p'anɨma. Mɨa k'awa bɨma mãrapa mãɨya oodai pẽra mɨ ome ará arapá p'ananait'a. 4Piarã mãɨ k'art'a bɨsima mãra ɨtɨai k'orea. Maamina mãɨya bɨé pasima mãra sõp'uadamẽrá, mãɨpari k'awadamẽrá mɨa mãra piarã k'ɨ̃ria bɨt'a. Mãɨ k'orea mɨa sõp'uadepa, minachia k'ɨ̃risia bɨdepa, mãɨnepa jẽa bɨdepa mãɨ k'art'a bɨ basima.

Abaɨpa nemietá ooda Pablopa k'ɨ̃risia atuada

5Piarã abaɨpa nemietá oo bɨ k'orea mɨ sõp'uapisima. Maamina mɨ́awapuru sõp'uapié pasima, mãɨpari perá jõma mãra sida sõp'uapisima. («Perá jõma mãra» mɨa jara bɨma, ichia ooda atepe nemietá bɨade aiwẽ pẽra). 6Perá jõma mãranepemarãpa mãɨ ẽpẽra nemietá ooda k'orea ɨtɨasidama. Ara mãɨpa arí bɨma. 7Maawẽapuru naapae ichia ooda k'ɨ̃risia atuadai p'anɨma mãɨnepa sõpiapidai p'anɨma minachia sõp'ua bɨpa piawẽa beepiemaapa. 8Mãɨ k'orea mɨa mãrá chichupuria idiruma mãrapa ichi k'ɨ̃ria p'anɨt'a mãicha k'awapidamẽrá. 9Mɨa naena mãɨ k'orea bɨsima mãrapa piarã jõma mɨa jarada oodai k'awai k'orea. 10Abaɨpa nemietá ooda mãrapa k'ɨ̃risia atuasidara mɨa pida k'ɨ̃risia atuaipɨ. Nemietá mɨa k'ɨ̃risia atuai bɨ piarã pasira, mãɨ nemietá Cristo k'ĩrari jõma k'ɨ̃risia atuasima mãra pia tuananamẽrá. 11Mãɨya mɨa mãɨ k'ɨ̃risia atuasima tiorea tachi seapiemaapa. Ichia sãmaasã́ oopari tachia minachia k'awa p'anɨma.

Cristodepa tachia nejõma p'ue p'anɨ

12Mɨ Troa p'uurudea wãsima chi pedea pia Cristo k'orea jarateai k'orea. Mãma Tachi Chiparipa eda wãpataɨ ewaru jĩra oosima ẽpẽrarãpa ũri k'ɨ̃rianamẽrá. 13Maamina mɨ ũpẽa Tito unué pẽra sõne ne k'ɨ̃risiawẽa baé pasima. Mãɨ k'orea ũpẽarã ome ará nɨbeek'ari mɨ wãyane asima. Ara mãɨne Macedonia tuadea Tito jɨrɨde wãsima.

14-15Tachi Ak'õrea sõpia bɨade adai p'anɨma. Jesucristopa jõma p'uek'ari tai jõmãɨrã k'ĩrari p'uurujãnea ateewãruma#2:14-15 Jõmãɨrã k'ĩrari p'uurujãnea ateewãruma. Ak'ɨse chi ek'ari bɨda Colosense 2:15. mãɨnepa taidepa tuacha ichi k'orea k'awapi bɨma. Cristo k'orea jaratea p'anɨne Tachi Ak'õre k'ĩrari tai k'era jĩra p'iumá p'anɨma. Mãɨnepa tachia ichi k'orea k'awadait'a k'era jĩra bɨma. Mãɨ k'era chi k'aripai p'anɨ ẽpẽrarãpa mãɨnepa chi atuadai p'anɨ ẽpẽrarãpa ɨ̃patama. 16Chi atuadai p'anɨrãmá, mãɨ k'era ẽpẽra piuda mik'ia jĩra bɨma, Jesude ĩjãanawẽa p'anɨnepa piudai pẽra. Maamina chi k'aripai p'anɨrãmá, mãɨ k'era minachia p'iumá bɨma, ewaricha chok'ae p'ananai pẽra. Mãɨya, ¿k'aipa ara ichi jua chaareadepa Tachi Ak'õre pedea p'ue jarateaima? 17Taipa erreara atadai k'orea Tachi Ak'õre pedea jaratea nipadawẽma chok'araɨrãpa oopata jĩra. Mãɨpari Cristo ome p'anɨ pẽra Tachi Ak'õrepa tai peesima. Mãɨne ichi k'ĩrari k'ɨ̃risia piadepa jarateapatama.

Currently Selected:

2 Corintio 2: tdc

Highlight

Copy

Compare