2 Corintio 1
1
Nãɨ k'art'ade Pablopa naa bɨda
1Mɨ Pablopɨ. Tachi Ak'õrepa k'ɨ̃riana pẽra mɨ Jesucristopa peedapɨ. Tachi ũpẽa Timoteo mɨ ome bɨma. Nãɨ k'art'a bɨruma ẽpẽrarã Tachi Ak'õrenepemarã Corinto p'uurudepemarã pae mãɨnepa jõma ichi ẽpẽrarã Acaya tuade be pae. 2Mɨa k'ɨ̃ria bɨma Tachi Pajãnepema Ak'õrepa mãɨnepa Tachi Chipari Jesucristo ãchi sõpiadepa mãra k'aripa p'ananait'a mãɨnepa ne k'ɨ̃risiawẽa bapiit'a.
Pablo mĩana
3Tachi Chipari Jesucristo Pajãnepema Ak'õrea pia pedeadai p'anɨma. Ichi chi tachi k'ĩra chupuriaparí Tachi Ak'õrepɨ mãɨnepa tachi sõpiapiparí Tachi Ak'õrepɨ. 4Ne ãareaɨne minachia mĩa p'anɨne ichia tai sõpiapiparima waapẽarã minachia mĩa be sõpiapidamẽrá ichia tai sõpiapida jĩra.#Isaía 40:1. 5Piarã Cristo k'orea tai minachia mĩapatamina ichidepa ne ãareaɨne sõpiapatama. 6Maamina tai mãɨya minachia mĩa p'anɨma mãra sõpiadamẽrá mãɨnepa nepɨradepema k'aripadamẽrá. Tachi Ak'õrepa tai sõpiapirude mãra sida taidepa sõpiapatama. Mãɨya mãra tai jĩra minachia mĩautade p'ue choadaipɨ. 7Taipa k'awa p'anɨma mãrapa Tachi Ak'õrene piarã minachia ĩjãa p'anɨ. K'awa p'anɨma mãra tai jĩra minachia mĩapatamina Tachi Ak'õrepa mãra tai jĩra sõpiapiparit'a.
8Ũpẽarã, mãɨpuru taipa k'ɨ̃ria p'anɨma mãrapa k'awadai tai Asia tuade piarã minachia mĩa p'anasidaɨt'a. Jãɨya tai nepɨrade p'anana pẽra waa p'ue choadaiwẽ k'ɨ̃risiasidama mãɨnepa p'ue chok'ae p'ananaiwẽ k'ɨ̃risiasidama. 9Piarã tai peadai k'ɨ̃risiasidama. Maamina jõma mãɨyasima ara tai tuaba p'ue k'aripadai k'ɨ̃risiapidaemaapa mãɨpari chi piudada chok'ae p'irabaripiparí Tachi Ak'õrepa k'aripait'a ĩjãanamẽrá. 10Ichia tai peadai pada k'aripasima mãɨnepa mãicha peadai k'ɨ̃risiasidara k'aripaipɨ. Taipa piarã ĩjãa p'anɨma ichia tai peadai pada k'aripa bait'a. 11Mãra pida tai k'orea Tachi Ak'õrea ɨt'aa chiidi p'anɨnepa k'aripa p'anɨma. Chok'araɨrãpa mãɨya ɨt'aa chiidi p'anɨ pẽra chok'araɨrãpa Tachi Ak'õrea sõpia bɨade adaipɨ ichi sõpiadepa tai k'aripa bɨ k'orea.
Pablo Corinto p'uurudea wãi pada
12Nãɨ k'orea arapá p'anɨma: taipa k'awa p'anɨma sõ jĩp'a p'anɨnepa, k'ɨ̃risia piadepa nãɨ ĩjũanepemarã t'ãena mãɨnepa mãra t'ãena pia nipadada. Mãɨ sõ jĩp'a bai mãɨnepa k'ɨ̃risia pia Tachi Ak'õrenepemapɨ. Tai nãɨ ĩjũanepema k'ɨ̃risiadepa mãɨya nipadak'ama, mãɨpari Tachi Ak'õrepa ichi sõpiadepa k'aripa bɨ pẽra mãɨya nipapatama. 13-14Taipa k'art'ade bɨdak'ama chi mãrapa p'ue k'awadaiwẽt'a. Mɨa k'ɨ̃risia bɨma mãrapa ãpia k'awadada pia k'awapododait'a. Mãɨya mãra tai k'orea arapaadaipɨ mãɨnepa Tachi Chipari Jesú cherude tai mãra k'orea arapaadaipɨ.
15Mãra mɨ k'orea piarã arapaadai k'ɨ̃risia bɨ pẽra, naa mɨa k'ɨ̃risia basima bari k'ak'o ume mãra ak'ɨde wãit'a minachia k'aripai k'orea.#1:15 K'aripai k'orea. Griego pedeade chi eda waapẽarã k'art'ade bɨ bɨma: arapaapí k'orea. 16Mɨa k'ɨ̃risia basima Macedonia tuadea wãrune naa mãra ak'ɨde wãit'a. Maapae Macedonianea wãk'ari jĩitea mãra ak'ɨde wãi k'ɨ̃risia basima. Mãɨya Judea tuadea wãrune mãrapa mɨ p'ue k'aripadai k'ɨ̃risia basima. 17Maamina mɨa k'ɨ̃risia bada jĩra oodawẽ pẽra ¿mãramá mɨa awara awará jarasik'ãra? ¿Mãramá mɨa ooyade ada mãicha oowẽane aparik'ãra mɨa oo k'ɨ̃ria bɨ jĩra ooi k'orea? 18Tachi Ak'õre pedea aba bɨma. Ichia k'awa bɨma taipa jaradada piarã pasit'a. Taipa mãramá wãnayane adak'ari ara mãɨne wãnawẽane adaé pasima. Taipa «nãɨ piarãane» adaé pasima, mãɨyá «seaade» adai k'orea. 19Silvanopa, Timoteopa, mɨa pida mãrá Tachi Ak'õre Warra Jesucristo k'orea jaratea p'anasidama. Jesucristopa ooyade ada mãicha oowẽane ak'ama. Ichia ooyade ada jõma ooparima. 20Piarã Tachi Ak'õrepa ooi jarada jõma Cristodepa ooparima. Mãɨ k'orea tachia Tachi Ak'õrea ɨt'aa chiidiutade Cristodepa piarãane apatama.#1:20 Piarãane apatama. Griego pedeade nãɨya bɨ bɨma: amén. Amén pedeapa edaɨde jara bɨma «piarã» mãɨnepa edaɨde jara bɨma «pia bɨma mãɨya bai». Mãɨya ichi k'orea pia jara p'anɨma. 21Tachi Ak'õrepuru tai mãɨnepa mãra Cristo ome minachia ak'ɨ uru bɨma. Ichia tachi jɨrɨ atasima. 22Ichi Jaorepa tachicha tauchaapisima ichidirã k'awadamẽrá. Mãɨnepa tachi sõne bɨsima k'awadamẽrá jõma ichia teai jarada piarã atadaipɨ.
23Mɨa Tachi Ak'õre k'ĩrari jararuma: Corinto p'uurudea wãwẽa bɨma mãra minachia ɨtɨarudepa sõp'uapiemaapa. 24Taipa jara p'anɨ jĩra oopidaiwẽma, mãrapa Cristode minachia ĩjãa p'anɨ pẽra. Abapuru mãra k'aripa k'ɨ̃ria p'anɨma arapá p'ananamẽrá.
Currently Selected:
2 Corintio 1: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
