1 Corintio 7

K'ima atadai k'orea bɨda

1Naapae, mãrapa k'art'ade ididada mɨa p'anooruma. Nãɨya bɨsidama: «Piarã pia bɨma ɨmɨk'ĩrapa wẽra ataiwẽa bɨt'a».#7:1 Pia bɨma ɨmɨk'ĩrapa wẽra ataiwẽa bɨ. Griego pedeade nãɨya bɨ bɨma: ɨmɨk'ĩrapa wẽra ooiwẽa bɨma. 2Maamina mãra t'ãena mãɨya minachia nemietá oopata pẽra ɨmɨk'ĩracha ãchi k'ima uru bai bɨma, mãɨnepa wẽerã pida ãchicha ãchi k'ima uru bai bɨma. 3Chi ɨmɨk'ĩrapa ichi k'ak'ua wãak'ai pia bɨwẽma chi wẽrá; chi wẽra pida ichi k'ak'ua wãak'ai pia bɨwẽma chi k'imá. 4Wẽra ara ichi k'ak'ua chi chipariwẽma, mãɨpari chi k'imat'u chi chiparipɨ. Ara mãɨ jĩra ɨmɨk'ĩra ara ichi k'ak'ua chi chipariwẽma, mãɨpari ichi k'imat'u chi chiparipɨ. 5Mãra k'ak'ua mãra k'imá wãak'arãt'ɨ. Tachi Ak'õrea ɨt'aa chiidi k'ɨ̃ria p'anɨpɨra pedea aba bɨde bɨt'ɨ, mãɨ ewaride ará k'ãinawẽa p'aneenai k'orea. Maamina tãaraa mãɨya p'aneenaiwẽa p'anɨma. Mãɨya bak'ari mãicha ará k'ãinai p'anɨma, mãra p'ue choadawẽa p'aneeutade, tiorea tachi nemietá oopidaemaapa. 6Mɨa jararuma: mãrapa mãɨya oo k'ɨ̃ria p'anɨpɨra, pia bɨma. Maamina mɨa mãɨya oopade a bɨwẽma. 7Mɨmá chi tuurã mɨ jĩra tuu p'aneenai p'anɨpɨra, mãɨya pia bɨma. Maamina Tachi Ak'õrepa tachicha sãmaasã́ bai teasima. Tachi Ak'õrepa waapẽarã́ tea bɨma p'ue tuu p'ananamẽrá. Mãɨnepa waapẽarã́ tea bɨma k'ima atadamẽrá.

8Mɨa jararuma chi tuu berã́ mãɨnepa p'ẽtãarã́: pia bɨma mɨ jĩra k'ima nea p'ananait'a. 9Maamina mãra k'ak'uapa k'ɨ̃ria bɨ p'ue choadaepɨra, k'ima atadai p'anɨma. Mãra k'ak'uapa k'ɨ̃ria bɨ k'orea minachia k'ɨ̃risia bai k'aepẽra pia bɨma k'ima atadait'u.

10Mɨa nãɨ jararuma chi k'ima pará berã́. Nãɨ pedea mõrewẽma, mãɨpari Tachi Chiparidepɨ.#Luca 16:18. Chi wẽrapa ichi k'ima amaaiwẽa bɨma. 11Maamina ichi k'ima amaaipɨra, ɨmɨk'ĩra awaraɨ ataiwẽa bɨma. Mãɨpari tuu bai bɨma mãɨyawẽpɨra chi k'ima ome mãicha pedeai bɨma. Ara mãɨ jĩra chi ɨmɨk'ĩrapa ichi k'ima amaaiwẽa bɨma.

12Waapẽarã ũpẽarã́ mɨa nãɨ jararuma (Tachi Chipari Jesupa mɨá nãɨ jarateapiwẽma): ũpẽa aba bɨpa chi k'ima Jesude ĩjãawẽa bɨ uru bɨpɨra, mãɨnepa mãɨ wẽra ichi ome ba k'ɨ̃ria bɨpɨra, mãɨ ũpẽapa ichi amaaiwẽa bɨma. 13Ũpẽawẽrapa chi k'ima Jesude ĩjãawẽa bɨ uru bɨpɨra, mãɨnepa mãɨ ɨmɨk'ĩrapa ichi amaa k'ɨ̃riawẽa bɨpɨra, mãɨ ũpẽawẽrapa ichi amaaiwẽa bɨma. 14Mãɨ Jesude ĩjãawẽa bɨ ɨmɨk'ĩra Tachi Ak'õre pae beesima, ichi k'imapa ĩjãa bɨ pẽra. Ara mãɨ jĩra chi Jesude ĩjãawẽa bɨ wẽra Tachi Ak'õre pae beesima ichi k'imapa ĩjãa bɨ pẽra. Mãɨyawẽpara mãra warrarã Tachi Ak'õre pae p'ananaiwẽ pasima. Chi ak'õre mãɨnepa chi nae Tachi Ak'õre pae p'anɨ pẽra ãchi sida Tachi Ak'õre pae p'anɨma. 15Maamina chi Jesude ĩjãawẽa bɨpa ichi k'imak'aapema ãyá wã k'ɨ̃ria bɨpɨra, mãɨya wãrãapadade adai pia bɨwẽma. Mãɨya chi ĩjãa bɨ, chi ãyá wãna k'ima ome beeiwẽa bɨma. Tachi Ak'õrepa tachi t'ɨ̃sima ne k'ɨ̃risiawẽa p'ananamẽrá. 16Ũpẽawẽra, pɨa atua bɨma Tachi Ak'õrepa pɨ k'ima pɨ k'orea nemietaadepema k'aripait'a. Ũpẽa, pɨa pida atua bɨma Tachi Ak'õrepa pɨ k'ima pɨ k'orea nemietaadepema k'aripait'a.

17-18Tachi Ak'õrepa tachi t'ɨ̃side ara tachi p'anana jĩra p'ananai p'anɨma. K'ak'ua tauchaa basira ara mãɨya bai bɨma. K'ak'ua tauchaawẽa basira ara mãɨya bai bɨma. Tachicha p'ananai p'anɨma Tachi Chiparipa bɨda jĩra. Mɨa ẽpẽrarã Tachi Ak'õrenepemarã becha mãɨya jaratea bɨma. 19K'ak'ua tauchaa bai atepe pia bɨwẽma. K'ak'ua tauchaawẽa bai sida atepe pia bɨwẽma. Tachi Ak'õrepa oopi bɨ pedea oo bai pia bɨma. 20Tachi Ak'õrepa pɨchi t'ɨ̃side ara tachi p'anana jĩra p'ananai p'anɨma. 21Tachi Ak'õrepa pɨ t'ɨ̃side chi chipari pae pari mimiaparí basira, minachia k'ɨ̃risia pará beerãse. Maamina pɨchi chiparipa ichi juadepema ãyá wãpisira, mãɨya oose. 22Chi Tachi Ak'õrepa t'ɨ̃na chipari pae pari mimiaparí, Tachi Chiparipa nemietaadepema k'aripasima, ichi pae ne oo bamẽrá. Mãɨne chi Tachi Ak'õrepa t'ɨ̃na ara ichi chipari pae pari mimiapariwẽt'a, naapae Cristo pae pari mimiaparipɨ. 23Cristopa ne p'aadadepa mãra atasima. Mãɨ k'orea waapẽarã pae pari mimiapataɨrã p'anarãt'ɨ. 24Ũpẽarã, Tachi Ak'õrepa tachi t'ɨ̃side ara tachi p'anana jĩra p'ananai p'anɨma ichi ome.

25Mãɨ awara chi k'ima waidi atadak'á bee k'orea mɨa jararuma. Tachi Chipari Jesucristopa mɨá mãɨ k'orea jarateapiwẽ pẽra mɨa k'ɨ̃risia bɨt'a jararuma. Mãrapa k'awa p'anɨma Tachi Chiparipa mɨ k'ĩra chupuriada pẽra mɨa piarã jaraparima. 26Nãɨya jararuma: mɨmá nãɨ ewaride minachia mĩa p'anɨ pẽra tachi ɨmɨk'ĩra tuu berã ara mãɨya p'ananai p'anɨma. 27Maamina k'ima uru bɨpɨra, pɨ k'ima amaai k'ɨ̃risiarãse. K'ima nea bɨpɨra, k'ima atai k'ɨ̃risiarãse. 28Maamina k'ima ataipɨra nemietaawẽma. Wẽrapa k'ima ataipɨra nemietaawẽma. Maamina chi k'ima ataru nãɨ ĩjũane minachia mĩa baipɨ. Mãra mãɨya minachia mĩa p'ananait'a mɨa k'ɨ̃riawẽa bɨma.

29Ũpẽarã, mɨa nãɨ jara k'ɨ̃ria bɨma: nãɨ ewari jõpodoruma. Mãɨ k'orea naapae chi ũpẽarã k'ima uru berãpa Tachi Ak'õre ode wã p'anɨt'a itu bɨdaiwẽa p'anɨma ãchi k'ima ome p'ananai k'orea. Mãɨpari chi k'ima nea bɨ jĩra p'ananai p'anɨma. 30Ara mãɨ jĩra chi ũpẽarã sõp'ua berã sõp'uawẽa bɨ jĩra p'ananai p'anɨma. Chi arapá berã arapaawẽa bɨ jĩra p'ananai p'anɨma. Chi ne atadapa ichia atada ewaricha uru bai k'ɨ̃risia baiwẽa bɨma. 31Chi nãɨ ĩjũane tachia unu p'anɨ ãarea jõpodo pẽra chi ne pará bepa chi nenea bɨ jĩra k'ɨ̃risia p'ananai p'anɨma.

32Mɨa k'ɨ̃ria bɨma mãrapa nãɨ ĩjũa k'orea minachia k'ɨ̃risiapidaemaapa. Chi ɨmɨk'ĩra k'ima nea bɨpa pia k'ɨ̃risia baparima Tachi Chiparipa k'ɨ̃ria bɨ ooi k'orea. Tachi Chiparia arapaapii k'ɨ̃ria bɨma. 33Maamina chi ɨmɨk'ĩra k'ima uru bɨpa nãɨ ĩjũane ichi k'ima pia uru bai minachia k'ɨ̃risia baparima. Ichi k'ima arapaapii k'ɨ̃ria bɨma. 34Mãɨya chi k'ima pará bɨpa k'ɨ̃risia ume uru baparima.#7:34 K'ɨ̃risia ume uru baparima. Griego pedeade chi eda waapẽarã k'art'ade mãɨ newẽma. Ara mãɨ jĩra chi wẽra k'ima uru bɨpa nãɨ ĩjũane ichi k'ima pia uru bai minachia k'ɨ̃risia baparima. Ichi k'ima arapaapii k'ɨ̃ria bɨma. Maamina chi wẽra k'ima nea bɨpa Tachi Chipari k'orea minachia k'ɨ̃risia baparima. Nãɨ k'ak'uade mãɨnepa jaorede Ichi pae pia ba k'ɨ̃ria bɨma.

35Mãɨ mɨa jarawẽa bɨma mãrapa k'ɨ̃ria p'anɨ jĩra p'anapidaemaapa mãɨpari pia p'ananamẽrá. Mɨa k'ɨ̃ria bɨma mãra k'ĩra jĩp'a p'ananait'a mãɨnepa jõma mãra sõnepa Tachi Chiparipa k'ɨ̃ria bɨ oodait'a.

36Ɨmɨk'ĩra abaɨpa chi ãwẽra pada ome pedeak'ari atai k'orea, mãɨne atai naena p'ue choawẽa k'ɨ̃risiaipɨra mãɨnepa isapea ata k'ɨ̃riaipɨra, atai pia bɨma. Mãɨ nemietaawẽma. 37Maamina chi atadai k'orea pedeak'ari, ichi sõne mãɨ wẽra ataiwẽane a k'ɨ̃risiaipɨra, mãɨnepa ichi k'ak'uapa k'ɨ̃ria bɨ p'ue choaipɨra, mãɨ wẽra atai pia bɨwẽma. 38Piarã chi k'ima atarupa pia oo bɨma. Maamina mɨmá chi k'ima ataiwẽa bɨpa atepe piipará oo bɨma.#7:38 Versos 36-38 ichiaba nãɨya bɨ bɨma: 36 Maamina ũpẽa abaɨpa ichi k'au ãwẽra pada k'ima teawẽa bɨdepa piawẽa oo bɨ k'ɨ̃risia bɨpɨra, ichimá pia bɨpɨra, k'ima teai bɨma. Mãɨ nemietaawẽma. 37 Maamina ũpẽapa ichi k'au teaiwẽ sõnepa k'ɨ̃risia bɨpɨra, mãɨnepa chi ẽpẽra awaraɨpa jara bɨ k'orea mãɨya oowẽa bɨpɨra, pia bɨma ichi k'au teaiwẽt'a. 38 Piarã chi ichi k'au tearupa pia oo bɨma. Maamina mɨmá chi ichi k'au teawẽpa atepe piipará oo bɨma.

39Chi wẽra k'ima pará bɨ chi k'ima chok'ae bɨmisa ichi ome bai bɨma. Maamina chi k'ima piuipɨra, ɨmɨk'ĩra awaraɨ ata k'ɨ̃riaipɨra, p'ue ataipɨ. Maamina Tachi Chiparide ĩjãa bɨt'a atai bɨma. 40Mɨmá mãɨ wẽrapa k'ima ataiwẽpɨra arapá beeipɨ. Ichiaba mɨa k'ɨ̃risia bɨma Tachi Ak'õre Jaorepa mãɨya k'ɨ̃risiapi bɨt'a.

Currently Selected:

1 Corintio 7: tdc

Highlight

Copy

Compare