1 Corintio 16

Ũpẽarã Jerusalenepema pae erreara jɨrɨp'edada

1Mãɨ awara mãrapa chi Jerusalenepema ũpẽarã pae erreara jɨrɨp'euta k'orea mɨa jararuma. Mɨa ũpẽarã Galacia tuadepemarã́ jarada jĩra oot'ɨ. 2Tomiocha mãracha erreara jitautadepema awara bɨdak'ari yaat'ɨ. Mãɨ mɨ cherude mãrapa jɨrɨp'edaiwẽa p'anɨma. 3Mɨ cherude chi ũpẽarã mãrapa jɨrɨ atadada mɨa mãɨrã ome Jerusalenea erreara tea peeipɨ. Ũpẽarã Jerusalenepemarãpa ãchi pia p'anɨane adamẽrá mɨa, ãchi ome k'art'a tea peeipɨ. 4Maamina mãramá mɨ sida wãi pia bɨpɨra, ãchi ome wãipɨ.

Pablo Corinto p'uurudea wãi k'ɨ̃risiada

5Mɨ naa Macedonia tuadea wãi bɨma. Maapae mãramá wãipɨ. 6Mɨ mãra ome tãaraaipɨra, beeipɨ. Mãra ome nãɨ ewari ewãra nɨbɨde beeipɨra, beeipɨ. Maapae mãrapa mɨ p'ue k'aripadaipɨ mɨ wãrumá pia wãmẽrá. 7Ara nãɨena p'ue tãaraa baiwẽ pẽra mɨa mãra ak'ɨde wãiwẽma. Maamina Tachi Chiparipa k'ɨ̃riaipɨra, mãramá wãrune tãaraa bade wãipɨ. 8Nãma Ép'eso p'uurude beeipɨ Pentecosté arapaapataɨ ewari parudea.#16:8 Judiorãpa ãchi Egitodepa wãnana k'ɨ̃risia ewari oodak'ari cincuenta ewari bɨde ãchi ne uu ĩjũanepa naa chaudada k'orea arapá oopataɨ ewari oopachidama. Mãɨ arapaapataɨ ewari «Pentecosté» apachidama. Levítico 23:15-16. 9Nãma chi mɨ unuemaa minachia p'anɨmina p'ue Tachi Ak'õre pedea pia jaratea baipɨ mãɨnepa chok'araɨrãpa ĩjãautama.

10Ũpẽa Timoteo mãramá cheipɨra, ichi mãra t'ãena pia bayade at'ɨ wap'eapiemaapa. Tachi Chiparipa k'ɨ̃ria bɨt'a ichia pia oo bɨma mɨa oo bɨ jĩra. 11Mãɨ k'orea ichi unuemaapirãt'ɨ, mãɨpari k'aripat'ɨ mɨ ak'ɨde cherude ne k'ɨ̃risiawẽa chemẽrá. Mɨa mãɨnepa waapẽarã ũpẽarã ichi chei nɨ p'anɨma.

12Tachi ũpẽa Apoloa mɨa chichupuria idisima waapẽarã ũpẽarã ome mãra ak'ɨde wãnamẽrá. Maamina ara nãɨena ichi wã k'ɨ̃riawẽa bɨma. P'ue wãrune wãipɨ.

Pablopa nãɨ k'art'ade k'aadea bɨda

13Jĩrak'aua p'anat'ɨ. Jesucristode minachia ĩjãa p'anat'ɨ. Ichidepa p'erawẽa p'anat'ɨ mãɨnepa chaarea p'anat'ɨ. 14Nejõma mãrapa oouta k'ɨ̃rianepa oot'ɨ.

15Ũpẽarã, mãrapa k'awa p'anɨma Acaya tuade Estep'anapa mãɨnepa ichi ẽpẽrarã naa Jesude ĩjãanana mãɨnepa ãchia k'ɨ̃risia p'anɨ jõma ũpẽarã k'aripadai k'orea. 16Mɨa mãrá chichupuria idiruma ãchi mãɨnepa jõma ãchi jĩra berã ũrinamẽrá. Jõma Tachi Ak'õre oo bɨt'a oopataɨrã ũrit'ɨ mãɨnepa chi ũpẽarã k'aripa berã ũrit'ɨ.

17Ũpẽa Estép'ana, P'ortunato mãɨnepa Ak'aik'o mɨmá chedada pẽra arapá bɨma. Ãchia mãra pari mɨ k'aripa p'anɨma. 18Ãchia mɨ sõ arapaapisidama mãra sõ arapaapidada jĩra. Ãchi k'orea mãɨnepa ũpẽarã ãchi jĩra p'anɨ k'orea pia k'ɨ̃risiat'ɨ.

19Ũpẽarã Asia tuadepemarãpa k'ɨ̃ria p'anɨma mãra pia p'ananait'a. Ũpẽa Aquilapa, ũpẽawẽra Priscilapa mãɨnepa ũpẽarã ãchi tede ará nɨbeepataɨ Tachi Chipari k'orea k'ɨ̃ria p'anɨma mãra pia p'ananait'a. 20Ũpẽarã jõmãɨrãpa k'ɨ̃ria p'anɨma mãra pia p'ananai. Piarã k'ɨ̃ria p'anɨnepa jõma ũpẽarã́ pia p'anapade a jarat'ɨ.#16:20 Piarã k'ɨ̃ria p'anɨnepa. Griego pedeade nãɨya bɨ bɨma: uitarra sõt'ɨ.

21Mɨ Pablopɨ. Nãɨ pedea ara mɨchi juapa bɨruma.

22Parituapa Tachi Chipari Jesucristo k'ɨ̃riawẽpɨra, Tachi Ak'õrepa mãɨ ẽpẽra nepɨra paraayade aipɨ. ¡Chese, Tachi Chipari!

23Mɨa k'ɨ̃ria bɨma Tachi Chipari Jesucristopa ichi sõpiadepa mãra k'aripa bai. 24Jesucristodepa mɨa mãra piarã k'ɨ̃ria bɨma.#16:24 Griego pedeade chi eda waapẽarã k'art'ade k'aadea bɨ bɨma: mãɨya beese.

Currently Selected:

1 Corintio 16: tdc

Highlight

Copy

Compare