Romans 4

Usputaallgha Abraham‑em

1Samengꞌngam pilleqesta Abraham‑emeng, sivunemnneng whangkuta Jews‑eni? Sameng liitkaawa? 2Kiyaghneghem nallghusaqaqngukagu elqughutngalleghminun sallghakun, sameng qukaayugusighqalgunayaghtuq. Iwernga Kiyaghneghmun qukaayugutkepagningitii salleni. 3Akuzitni Igaqegkani igaqngaaq whaten, “Abraham‑em ugpeqegkaqaa Kiyaghneq enkaam ugpeqillgha apalluqluku Kiyaghneghem tugukliqaqaa elqughutngalghiinguluku.”

4Yuuk qepghalleghmineng akileghtuusangegkayuguuq. Akileghtuusaa tunusaanghituq qayughllak ellngan allgeghtekaqaa qepghaalluku. 5Kiyaghneghem nallghusaghnaanghitaa yuuk elqughutngalleghminun qepghaatillghakun ellminun. Itupill yugem neghyuksaghqaqaa Kiyaghneq nallghusaghikayuk seghleghqesteneng elqughutngalleghminun ugpeqillghitgun. 6Umiilgem David‑em igaqegkaqaa taana ataasiq. Pikaaguq yuget quyastepikaaniluki Kiyaghneghem nallghusaghaqngaki elqughutngalleghminun avelghaghluki qepghaatillghit Kiyaghneghmun.

7“Quyastekaagut tamaakut seghleghqellghit Kiyaghneghem seghevutkii, anaggutellghit saapegkii!

8Quyastekaaguq yuuk seghleghqellghi Atanghem sumeghmiknaniqangi.”

9Taana quyastelleq David‑em akuzitkegkaa, circumcise‑ekaghhiinaghnun pingwaa? Nakaa! Circumcise‑ellghilngughnunllu pinguuq. Akuzitni Igaqegkani igaqngaaq, “Abraham‑em ugpeqegkaqaa Kiyaghneq, enkaam ugpeqillgha apalluqluku Kiyaghneghem tugukliqaqaa elqughutngaluku.” 10Qavngaq Kiyaghneghem tugukliqaqagu? Sivungani circumcise‑ellghaan nalighmeng kingunganeng? Sivungani circumcise‑ellghan, nakaan kingunganeng. 11Tagtalmi taakwani Abraham circumcise‑ekaaguq. Circumcise‑ellgha nalluniilkutaaguq ipapighqusiiluni Kiyaghneghem nallghusaqaqegkanga elqughutngalleghminun ugpeqillghakun. Salin circumcise‑ellghilluku Kiyaghneghem tugukliqaqaa elqughutngaluku. Tamaaken apalluqluku Abraham atanguuq tamaghhaanun ugpeqilghiinun circumcise‑ellghiteghngaata, enkaam Kiyaghneghem tugukliimii elqughutngaluki. 12Abraham‑llu atakaat circumcise‑ekat. Taana ipanguuq taawanginaghhaq ugpeqillelgukuyeng Abraham‑etun, salin circumcise‑ellghilluku.

Kiyaghneghem Akequsaa Tamaghhaanun Ayuquq Ugpeqillelegnun

13Kiyaghneghem akeqegkaqii Abraham‑enkut kingunqullghiit iingunaghhaan nuna ellngitnun pagilleqniluku. Akequsaqellghitaa taana Abraham‑emun qayughllak qaatkegkangi Liilightuusat. Itupill Kiyaghneghem akeqegkaqaa qayughllak ugpeqegkanga enkaam Kiyaghneghem tugukliqaqaa elqughutngaluku. 14Kiyaghneghem akequsaa tuunyaghqaayaqan qaatkullghiinun Liilightuusanun, taawa ugpeqilleq satngunghituq. Kiyaghneghemllu akequsaa satngunghituq. 15Kiyaghneq sakritaquq yuget qaatkunneghinneghata Liilightuusanun tuunegkaanun Moses‑mun. Iwernga Liilightuusiisaqan taawa yuget qaatkunneghitusiinnayaghtut.

16Tamaaken apalluqluku ugpeqilleghmegteggun yuget allgeghtaat Kiyaghneghem akequsaa akingilnguuluku tunusaq. Enkaam qamaglluteng Abraham‑em kingunghita allgeghtepestaaghlleqaat Kiyaghneghem akequsaa. Taana akequsaq Jews‑nginaghhaghnun ayuqenghituq Liilightuusalegnun. Iwernga ugpeqilghiinunllu ayuquq Abraham‑em ugpeqillghatun. Enkaam Abraham qamaglluta atakaghput ugpeqilghiini. 17Akuzitni Igaqegkani igaqngaaq, “Atangughtestamken uglapiglleghhiinun nunat yugitnun.” Kiyaghneghem tawaten akeqegkaqaa Abraham qayughllak ugpeqegkanga Kiyaghneq. Kiyaghneghuuq tuqukaneng unguvaghtikayuk, qelghilleghmikunllu ulimatkayuk sameng sangilngughmeng.

18Abraham‑em avaqutilleghqaa sighimaniitkaaguq. Iwernga ugpeqegkaqaa Kiyaghneq, sighimakumanginaqaqaallu. Enkaam atangughtekaaguq uglaapiglleghhiinun nunat yugitnun. Whaten Kiyaghneghem pikaqaa, “Kinguneghten kestepagningisaghqaagut.” 19Abraham‑em nulighha, Sarah, qumingepagningitkaalghii. Ellnga Abraham 100 ayumiqulleghtutkalighyaghtughluni, tuqumun tughaaghulghii. Iwernga tamaakut suumqeghngaaghmiki, ugpeqillgha Kiyaghneghmun ukavaamangilnguq. 20Ugpeqinaniimangituq talwa aygughikumangitaa Kiyaghneghem akequsaa. Iwernga ugpeqiighataghaqaq, usuqegkaallu Kiyaghneq. 21Abraham‑em ipapighqutkengngwaaqaqaa Kiyaghneghmun piyaghqaqniluku akequsaqegkani. 22Akuzitni Igaqegkani igaqngaaq, “Kiyaghneghem tuguqliqaqaa elqughutngaluku,” apalluqluku ugpeqillgha. 23Taakut akuzitet, “Kiyaghneghem tuguqliqaqaa elqughutngaluku,” igaqegkaagut nakaan Abraham‑nginaghmun, 24iwernga igaqegkaagut whangkunnunllu. Kiyaghneghem tuguklighlleqiinkut elqughutngaluta qayughllak ugpeqegkefut ellnga. Ellnganguuq Jesus‑meng Atanemnneng unguvaghtestikaq. 25Kiyaghneghem tuunegkaqaa Jesus tuqumatkesqelluki seghleghqelleput, unguvaghtekaqaallu nallghusaghnaluta elqughutngalleghminun.

Currently Selected:

Romans 4: ess

Highlight

Copy