Romans 2

Kiyaghneghem Nanqigtillgha

1Tamaaken apalluqluku nanqigtikuvek yugneng anagniilqavigituten. Nanqiggneghpeki, elpeneng nanqigtaquten aghyuughyaghqaaluten qayughllak elpeklu ellngistun piiqelghiiten. 2Kiyaghneq nanqigtiiquq yugneng seghlepestaatun pilghiineng, liisimakaghputlu nanqigtillghi elqughutngaat. 3Iwernga nanqigtaqaten anaggullghiit, naqamllu elpek katam piiqaten tamaakut ataasit anaggutellghet. Enkaam sumeghpenii anagyaghqaaniluku piziguu Kiyaghneghem nanqigtillgha? 4Liigikenghisiguu nangllegtaghtulanga Kiyaghneghem? Aghyuughaghsigalkangaten tawaninginaq qayughllak nuqetutaqegkangaten. Sumeghpenii‑i taakut satngunghitaat? Liisimakenghisiguu Kiyaghneghem nangllekaqegkangaten qayughllak avuteghqesqesukangaten? 5Iwernga elpek aleghquneghlluguuten, pineghlluguuten; tamaaken apalluqluku avuteghqesugigatuten. Enkaangaam elpek katam ulimangwaan aghyuullengelleghqan seghleghataghaaluku Nanqigtillghem Aghneghani. Tawani Aghneghmi Kiyaghneghem aliighlleqaak sakraallenillu, elqughutngalghiillu nanqigtilleni. 6Nanqiglleqii tamaghhiita yuget apeghiighutellghistun. 7Ilangi yuget pinitun pimanginaghaqut qayughllak Kiyaghneghmeng allgeghsukangit usuqelleq, quulvalleq, yugusiqlu tuquyaghqaanghilnguq. Enkaam Kiyaghneghem kenlengilngughmeng unguvallelilleqii. 8Iwernga ilangi yuget ellnginaayugneghuut. Ugpeqsugigataat ipapilleq seghlepestaatun pinaluteng. Enkaam Kiyaghneghem sakrituteghllagluki, aghyuughllaglleqii. 9Qamagtengngwaaghluni nunamelnguq yuuk, Jews‑a nalighmeng Gentile‑a, seghlepestaatun pikaq, Kiyaghneghem aghyuughlleqaa seghleliighmengllu ikfiqelleghmengllu. 10Iwernga qamagtengngwaaghluni yuuk, Jews‑a nalighmeng Gentile‑a, pinitun pikaq, Kiyaghneghem usuqelleqaa, quulvaghlleqaa, nekeggmellelilleqaallu. 11Taniillngunaki Kiyaghneghem nanqiglleqii qamagtengngwaaghluki yuget.

12Gentile‑et allgeghtellghitiit Liilightuusat Kiyaghneghem tuunegkii Moses‑mun. Enkaam seghleghqelghiit nallukluki Liilightuusat, tuqukata Kiyaghneghem nanqiggnaanghitii Liilightuusatgun. Jews‑et Liilightuusalguut, enkaam seghleghqegkata Kiyaghneghem nanqiglleqii Liilightuusatgun. 13Tamaakut nagataghesnalghiit Liilightuusaminun, Kiyaghneghem nallghusiigatii elqughutngalleghminun. Iwernga qaatkullghiit Liilightuusaminun nallghughqaqii elqughutngalleghminun. 14Gentile‑et allgeghtellghitiit Kiyaghneghem Liilightuusii. Iwernga qaatkenneghmegteki taakut Liilightuusat, qaatkutellghita Liilightuusalgestun ayuqestiit ilumegteggun, allgeghtekaqenghiteghngaaghmegteki. 15Qaatkutellghita yugnun liigikestiit ilumegteggun liisimakiit Liilightuusat qelghusiit. Sumeghtaghallghitallu liisimakestiit Liilightuusat ilungitnitulangi, qayughllak sumeghtaghallghita ilangakun anaggunniiqiit nalighmeng ilangakun itagnaghniiqiit. 16Nanqigtillghem Aghneghani, Kiyaghneghem nanqiglleqii yuget aksaqegkiit Christ Jesus‑kun. Aapghaqaqa taana ungipaqnemki Pinilghiit Ungipat.

Jews‑etlu Liilightuusatlu

17Maatenꞌngam latayuganka Jews‑et. Jew‑ngukuvek, neghyukaten Liilightuusat Kiyaghneghem tuunegkaqii yugpenun. Qukaayugtutenllu Kiyaghneghmun pikniluten. 18Liilightuusatgun liisimakan sangwaa Kiyaghneghem sasqesullgha elpenun, natenllu nakmiksaghqaatanga sangwaa elqughutngalghii. 19Enkaam sumeghpeni maghyaghqughtenguniiquten ayaakanun, nighuguniiqutenllu mamlegmelngughnun. 20Sumeghpeni nallghusaghtenguniiquten nalluuqanun, apeghtughistenguniiqutengllu taghnughhaghnun. Liilightuusalgutegpeneng, sumeghpeni liisimakniluku sangwaa tamaghhaan piiqan, qamagllukullu ipapilleq. 21Apeghtughaqaten ilaten, sangan elpeneng apeghtiigasin? Ungipaqiiquten, “Teglegpenang,” elpaa‑ak, teglekiigasiin? 22Piiquten, “Gelgaghniighpenang,” elpaak, gelgaghniiqiigasiin? Ugumikepigtaten kiyaghnengllaqat, elpaak, tugunniiqiigasiin temple‑ngitneng? 23Qukaayugtaquten qayughllak Kiyaghneghem Liilightuusani tuunegkaqii yugpenun. Iwernga qaatkenghinneghpeki Liilightuusat quulviigatan Kiyaghneq. 24Akuzitni Igaqegkani igaqngaaq, “Apalluqlusi elpesi Jews‑eni, Gentile‑et sanguughtaqaat Kiyaghneghem aatgha.”

25Qaatkengngukufki Kiyaghneghem Liilightuusii circumcise‑ellghen pinightuq. Iwernga qaatkenghilkufki Liilightuusat circumcise‑ellghilngughestun ayuquten. Enkaam quyastellengnaanghituten Kiyaghneghem akequsaaneng. 26Gentile‑a circumcise‑ellghilnguq qaatkullghii qelghusiitnun Liilightuusat, Kiyaghneghem tuguklighlleqaa nikimqun circumcise‑ekaaluku. 27Elpesi Jews‑eni Liilightuusalguusi igaqngalghiineng, circumcise‑ekaagusillu, taawanginaq qaatkigatasi Liilightuusat. Iwernga Gentile‑et circumcise‑ellghilnguut, qaatkaqiit Liilightuusat. Enkaam qaatkutellghitgun Kiyaghneghem nanqiglleqiisi aghyuughyaghqaalusi. 28Circumcise‑enginaghluku yugem yugusii Jew‑pigughtesnaanghitaa. Circumcise‑ellepiik pingigatuq yugusim qaaynginaakun. 29Itupill, yuuk Jew‑piiguuq Jew‑ngukumi ilumikun. Ighsaqghwa circumcise‑ekaaguq Agleghnalghiignekun Taghneghagnekun, nakaan igaqegkatgun Liilightuusatgun. Enkaam Kiyaghneghmeng usuqellengellequq, nakaan yugneng.

Currently Selected:

Romans 2: ess

Highlight

Copy