Revelation 17

Aghnaqlu Teghikusalluuklu

1Taagken yaqulget maaghraghvinlegneng sagnelget, taakuneng ataasim takulunga piinga, “Tagi, kelguviknaqamken aghyuulleghqaaneng apeghseghuum aghnam yugusimineng akikikayugem, aqumgalghii meghllagteggun. 2Nunam umiilgi seghleghqaqut atuqaqluku aghnaq. Seghleghet atuqistillghi wine‑etun ayuqut, enkaam nunam yugi suumaqut meneghmegteggu wine‑nga.”

3Taagken yaqulgem Taghneghagnekun aglaataanga kilgaanun. Tawani esghaghaqa aghnaq aqumgalghii kavirrakegtakun teghikusalluugkun. Teghikusalluuk igaqughvikngaftuq uzimun sanguughtusineng ateghneng Kiyaghneghmun. Maaghraghvinlek naasqulguftuq, quulnguftutlu sighunghi. 4Aghnaq pilugugngaftuq esneyaaghmengllu kavirrakegtamengllu, enkaam ullngaqluni gold‑meng, akitughllagmeng uyghagmeng, pearl‑mengllu. Tugumiiqeftaa gold‑a qayuusiq esleqngalghii seghleghnalghiineng kiyaghtaalleghneng, nukeggnalghiinengllu sex‑kun seghleghqellghaneng. 5Qawaani igaqngaftuq ateq qayvighsimangilnguq whaten pisiq,

Apeghseghuq Babylon,

naakaat yugusimeggneng akikikayuget aghnat,

seghleghnallghanengllu nunam.

6Esghaghaqa aghnaq suumelghii aawitneng Kiyaghneghem yugita, aawitnengllu tuququqat qayughllak ataasiighmelnguut Jesus‑mun.

Esghaghluku aghnaq saghiighayugllagtunga. 7Iwernga yaqulgem piinga, “Sangavek saghiighayugsin? Ungipaannaqamken qayvighsimangilngughmeng sameng pisiitkek aghnaankuk, teghikusalluugenkuk. Taana teghikusalluuk igleghutilghii aghnameng, naasqulguuq maaghraghvinlek, sighunelguuqlu qula. 8Teghikusalluuk esghaqan unguvayalghiinguuq, Iwernga tuqukaaguq. Mayughllequq Saamnangilngughmeng Laagwaaghmeng naafqellengnaluni. Yulguuq nunami aatghit igaqellghilnguut Igiitgun Unguvallghem nuna piinlillghilluku. Tamaakut yuget esghaqumegteggu teghikusalluuk saghiighayugllequt qayughllak unguvayalghii, tuqukaq iwernga tagiyaghqaq.

9“Sumeghtaghayuqam liigikelleqaa una: Maaghraghvinlek naasqut maaghraghvinleguut qemit aghnam aqumgavigi. 10Taakut naasqut maaghraghvinleguutlu umiilget. Tallimat tuqukaagut, ataasiq igleghutinguuq, enkaam ataasiq salin tagingigatuq. Tagikumi igleghutiyaghqaaguq natengiighhaq. 11Teghikusalluuk unguvayalghii iwernga tuqukaq, pingayuneng ingluliitnguuq umiilek. Taana pingayuneng ingluliita umiilek ilakaat sivuliit maaghraghvinlek umiilget, naafqellengyaghtuuguq.

12“Esghaqaghten qula sighunghet, qulanguut umiilget salin igleghutingigatut. Iwernga aghtughyaghqaanghillengellequt igleghutiyaghqaaluteng ataasiq aflu maligulluteng teghikusalluugmun. 13Taakut ataasiq umyugaqluku tuunelleqiit teghikusalluugmun aghtughyaghqaanghilletengllu pilleghqatengllu. 14Enkaam pilluwaghlleqaat Penniighaghaq. Iwernga Penniighaghaam kayaalqelleqii qayughllak Atanqegkangat atanghet, Umiilkegkangatlu umiilget. Penniighaghaghmelnguut tuqluqaagut, nakmikegkaagut, ataasiighmelnguugutlu.”

15Taagken yaqulgem piinga, “Esghaghaten meghet aghnam yugusimineng akikikayugem aqumgavigi. Taakut meghet yulghuteghllaguut nunataghhaaneng tamaghhaaneng pinguut, ulukelghiit allaaghhiinaghmeng. 16Esghaqaghpek qula sighunghet, teghikusalluugemllu, ugumiilleqaat aghnaq yugusimineng akikikayuk. Saqraggiighulluku, amsiqaghqelluku, kemga neghluku, taagken siipnegha kumaghlleqaat. 17Taakut qula sighunghet tawaten pikaagut qayughllak Kiyaghneghem ellngitnun atuqestekaqaa piyukelleni. Angeghqumatkaagutlu tuunaluki ataneghpagulleteng teghikusalluugmun. Tawaten pikaagut kenlanga Kiyaghneghem piyukellgha apeghiillghanun. 18Taana aghnaq esghaqan neghllaguuq igleghutilghii umiilgitneng nunat.”

Currently Selected:

Revelation 17: ess

Highlight

Compare

Copy