Revelation 16

Sagneghet Imaqelghiit Kiyaghneghem Sakritelleghllaganeng

1Taagken Temple‑meng nagaqughaqa iglagtulghii ma, ungipaaskangi maaghraghvinlek yaqulget, “Kuuvyaghtughteki nunamun maaghraghvinlek sagneghet Kiyaghneghem sakraalleghllagi!”

2Enkaam sivuliim yaqulgem sagneni kuuvyaghtughaa nunamun. Taagken seghlepestaaghllaget aqnighnapiglleghhiit pupiget piitquutut nalluniillengegkanun teghikusalluugmeng. Tamaakunguut maniguutkat nangaghneghanun.

3Tuunglighhaan yaqulgem sagneni kuuvaa kelliinun. Taagken kellii aawatun tuqukam yugem lliighluni, enkaam qamaglluteng unguvalghiit kelliini tuqulaghaatut.

4Pingayiitangita yaqulgem sagneni kuuvaa kiigwnunllu, sengngununllu meghnun enkaam aawughquutut. 5Nagaqughaqa igleghutilghii meghneng yaqulek pilghii,

“Kaay, Agleghnalghii Kiyaghneq,

elpenguuq maaten kiyaghlleghhii,

elpenguuq quunpeng kiyaghlleghhii!

Nanqigtilleghtenllu aghyuughilleghtenllu elqughutngaat.

6Yuget tuququqaqiit yugten, uuknaliqistetenllu,

enkaam meghyaghqalitaten aawmeng.

Tawaten aghyuughyaghqaaluteng ellmeggneng allgeghtekaqaat!”

7Taagken nagaqughaqa aghqefigegneng ma pilghii,

“Aa‑a Ataneq, Kiyaghneq Aghtughyaghqaanghilnguq!

Ipanguutlu elqughutngaatlu nanqigtilleghqaghten!”

8Estamiitangita yaqulgem saghneni kuuvaa siqineghqun enkaam Kiyaghneghem siqinghem kenghanun paneghtestii yuget. 9Siqinghem uguqnaghllagan paneghtestii yuget. Enkaam sanguughteghllagaat aatgha Kiyaghneghem, igleghutistengutanganeng tamaavek seghleliilleghllagnun. Avuteghqenghitutlu, usuqenghitaatlu Kiyaghneghem aangelleghllaga.

10Tallimiitangita yaqulgem sagneni kuuvaa teghikusalluugem umiilgusiin aqumutagkenkun, enkaam ataneghpagullgha mamleghqwaagaa. Yuget ikfiqem uluteng amqeghqughiit. 11Sanguughteghllagaat Kiyaghnegha qilagem apalluqluku aqnighqelleghmeggnengllu pupigtaalleghmeggnengllu. Avuteghqenghitutlu seghletun pilleghmeggneng.

12Aghvinliitangita yaqulgem sagneni kuuvaa kiiwllagegnun Euphrates‑egnun. Kiiwek pateghtuk yataaghqunnaluki tuumkaghqameng umiilget tagilghiit asivaghmeng. 13Taagken esghaghanka pingayut nukeggnalghiit tughneghaat frog‑esugnilnguut. Aanut qaanghitneng dragon‑em, teghikusalluugem, uuknaliqistesighwaaghemllu. 14Taakut tughneghaat allaaghlluwhaghtikayuguftut. Aghulaqut umiilgitnun nunataghhaan tamaghhaan qerngughhnaluki pilluwamun aghneghllagani Kiyaghneghem Aghtughyaghqaghhaanghilnguum.

15Ataneq piiq, “Nagataghtek! Taginguunga teglegniightetun! Quyanaghtuq teghhumalghii, aatkani piiftengngwaaghluki ayuqegkangi. Enkaam igleghhnaanghituq amsikaghmi, kayngusaghaannaanghituqlu tesqagani yuget esghaqumegteggu!”

16Taagken tughneghaat qerngughtiit umiilget Armageddon‑mun. Tawaten Hebrew‑ghmiistun atillgha ayuquq.

17Taagken maaghraghvinliitangita yaqulgem sagneni kuuvaa eslakun. Temple‑mi umiilgusigneng aqumutaghllagegneng iglagtupiglluni ma piiq, “Apeghiightuq!” 18Taawa nighwaagpagtaghtuq, tengngaagtaghtuq, kallituq, nunallu ufsuguteghllagtuq. Taana nunam ufsugutelleghllaga seghlelleghpigaaguq Kiyaghneghem yungllaghyuggallghaneng. 19Neghllak pelleghtuq pingayughqelluni. Nunatlu neghllagit qamagtengngwaaghluteng naavuutut. Kiyaghneghem neqamikii Babylon‑eghllagem seghleghqellghi. Enkaam meghestaa wine‑a qayuusimelnguq sakritelleghllagmineng imaqelghii. 20Qamaglluteng qiighqat aviighuquutut, qamagllutengllu naayghat kaavuutut. 21Kaftekragrugllaget 100 uqigtutkavzilghiit qilagameng ifkaquutut yugnun. Enkaam tamaakut yuget sanguughteghllagaat Kiyaghneq apalluqluki kaftekragrugllaget. Taana seghleliilleghllak seghlepigulghii.

Currently Selected:

Revelation 16: ess

Highlight

Compare

Copy