Revelation 13

Maalghuk Teghikusalluugek

1Taagken esghaghaqa teghikusalluuk aanelghii kelliimeng. Qulanguftut sighunghi, maaghraghvinlek naasqulek. Qamaglluteng sighunghi qaghpalgututeftut, tamaghhaghmeng naasqut igaqughvikngaftut ateghmeng seghlequulghiimeng Kiyaghneghmun. 2Taana teghikusalluuk leopard‑esugnituq, itegii kayngem itegaatun ayuqelghiit, qaangha lion‑em qaanghatun ayuqelghii. Dragon‑em tuunaa teghikusalluuk aghtughyaghqaanghilleghmineng, umiilgusigmineng aqumutagneng, igleghutiyaghqaaghtestaallu ateni atuqluku. 3Ataasiq naasqwa teghikusalluugem tuqutesugnitkaq kiitighluni, iwernga taana kiiyallgha maamegkaaftuq. Iingunaghhaghmeng nunam yugita saghiighayagulluku maligtaat teghikusalluuk. 4Qamaglluteng yuget manigughaat dragon‑a qayughllak teghikusalluugmun tuunegkanga aghtughyaghqaanghilleni. Manigughaatlu teghikusalluuk, piit, “Kinangam teghikusalluugtun ayuqa? Kitumngam pilluwaghlleqagu?”

5Taagken teghikusalluuk akuziyaghqaaghtuq. Aangaayugteghllagtuq, seghlepestaatunllu akuzitkaa Kiyaghneq. Aghtughyaghqaanghillenguq igleghutiyaghqaaluni 42‑nun tanqinun. 6Piinlighaa seghlepestaatun akuzitkilleni Kiyaghneghmeng, aatghaneng, kiyaghfiganeng, tamaakunengllu kiyaghlleghhiineng qilagmi. 7Aghtughyaghqaanghillelitaa pilluwiisqelluki Kiyaghneghem yugi, kayaalqesqellukillu. Igleghusaghqaaghtestii qamaglluki ramket, yuget, ulut, nunataanilnguutlu yuget. 8Qamaglluni nunami kiyaghlleghhiim manigughlleqaat teghikusalluuk. Iwernga tamaakut aatghit igaqngalghiit Igiitgun Unguvallghem manigughnaanghitaat. Kiyaghneghem igaqegkaqii aatghit nunangllallghilluni. Taakut igat pikii Penniighaghaam, yuget tuqutkiita.

9“Nagatek, sigutelgukufsi: 10Kina alngunak tuguyaghqaakumi, tugulleqaat. Kina alngunak tuqusaghqaakumi savigpagkun, tuqulleqaat savigpagkun. Taakuk whaten pisiiguk: Kiyaghneghem yugi nuqenneghtuyaghqaagutlu ugpeqillelguyaghqaagutlu.”

11Taagken esghaghaqa ilanga teghikusalluuk nunameng aanelghii. Maalghugegneng sighunelguftuq penniighaghaam sighunghatun, akuziiqlu dragon‑etun. 12Sivuliq teghikusalluuk tawanlluku tunglighhaan teghikusalluugem atuqaa qamaglluku aghtughyaghqaanghillgha. Taaggun aghtughyaghqaanghilleghqun maniguutestii qamaglluki nunam yugi sivulighmun teghikusalluugmun. (Kiiyallghan tuqutesugnitkaa, iwernga kiiyallgha maamegkaq.) 13Tuunglighhaa teghikusalluuk allaaghlluwhaghtighllagaataghtuq, talwa qilagmeng nunamun keneq ukigtestaa yuget esghaamanghitni. 14Tuunglighhaa teghikusalluuk aghtughyaghqaanghillenguq allaaghlluwaghtiyaghqaaluni tawantellghani sivuliim teghikusalluugem. Tamaagun allaaghlluwhaghtilleghteggun puughtii qamaglluki yuget kiyaghlleghhiit nunami. Qelghii yuget nangaghnenglliisqelluki quulviisqelluku sivuliq teghikusalluuk. (Taana tuqutkaayalghii savigpagkun iwernga unguvaqaq.) 15Tuunglighhaa teghikusalluuk aghtughyaghqaanghillenguq aneghnengestiyaghqaaluni unguvalleghmeng nangaghneghanun teghikusalluugem. Enkaam nangaghneq akuziyaqlegughtuq. Taagken nangaghneghem qelghii yuget tuquqiisqelluki tamaakut maniguusunghilnguut ellminun. 16Tuunglighhaan teghikusalluugem nalluniightiisqii number‑meng qamaglluki yuget aghenqigneghitgun iiggitgun nalighmeng qawiitgun. Tawaten qelghii aangwaaghughngaata, ukavansaghngaata, aklungiteghngaata, aklumaghngaata, qepghaghtelaaghunghiteghngaata, qepghaghtelaaghughngaata. 17Kina alngunak tukfighiyaghqaanghituq nalighmeng akikiyaghqaanghituq wetkuqun nalluniillelgukumi. Taana nalluniilkutaq teghikusalluugem aatqaa nalighmeng aatghan number‑kaa.

18Peghqinellelgem liigiknaaghaa una. Sumeghtaghalleghmikun liigikelleqaa sameng pisiitanga teghikusalluugem number‑nga. Taana number‑a yugmun aatghuuq, 666‑nguuq.

Currently Selected:

Revelation 13: ess

Highlight

Compare

Copy