Popular Bible Verses from Revelation 13

Share

Peghqinellelgem liigiknaaghaa una. Sumeghtaghalleghmikun liigikelleqaa sameng pisiitanga teghikusalluugem number‑nga. Taana number‑a yugmun aatghuuq, 666‑nguuq.

Qamaglluni nunami kiyaghlleghhiim manigughlleqaat teghikusalluuk. Iwernga tamaakut aatghit igaqngalghiit Igiitgun Unguvallghem manigughnaanghitaat. Kiyaghneghem igaqegkaqii aatghit nunangllallghilluni. Taakut igat pikii Penniighaghaam, yuget tuqutkiita.

Tuunglighhaan teghikusalluugem nalluniightiisqii number‑meng qamaglluki yuget aghenqigneghitgun iiggitgun nalighmeng qawiitgun. Tawaten qelghii aangwaaghughngaata, ukavansaghngaata, aklungiteghngaata, aklumaghngaata, qepghaghtelaaghunghiteghngaata, qepghaghtelaaghughngaata. Kina alngunak tukfighiyaghqaanghituq nalighmeng akikiyaghqaanghituq wetkuqun nalluniillelgukumi. Taana nalluniilkutaq teghikusalluugem aatqaa nalighmeng aatghan number‑kaa.

Kina alngunak tuguyaghqaakumi, tugulleqaat. Kina alngunak tuqusaghqaakumi savigpagkun, tuqulleqaat savigpagkun. Taakuk whaten pisiiguk: Kiyaghneghem yugi nuqenneghtuyaghqaagutlu ugpeqillelguyaghqaagutlu.”

Taagken esghaghaqa teghikusalluuk aanelghii kelliimeng. Qulanguftut sighunghi, maaghraghvinlek naasqulek. Qamaglluteng sighunghi qaghpalgututeftut, tamaghhaghmeng naasqut igaqughvikngaftut ateghmeng seghlequulghiimeng Kiyaghneghmun.

Aghtughyaghqaanghillelitaa pilluwiisqelluki Kiyaghneghem yugi, kayaalqesqellukillu. Igleghusaghqaaghtestii qamaglluki ramket, yuget, ulut, nunataanilnguutlu yuget.

Tuunglighhaa teghikusalluuk aghtughyaghqaanghillenguq allaaghlluwaghtiyaghqaaluni tawantellghani sivuliim teghikusalluugem. Tamaagun allaaghlluwhaghtilleghteggun puughtii qamaglluki yuget kiyaghlleghhiit nunami. Qelghii yuget nangaghnenglliisqelluki quulviisqelluku sivuliq teghikusalluuk. (Taana tuqutkaayalghii savigpagkun iwernga unguvaqaq.) Tuunglighhaa teghikusalluuk aghtughyaghqaanghillenguq aneghnengestiyaghqaaluni unguvalleghmeng nangaghneghanun teghikusalluugem. Enkaam nangaghneq akuziyaqlegughtuq. Taagken nangaghneghem qelghii yuget tuquqiisqelluki tamaakut maniguusunghilnguut ellminun.

Taana teghikusalluuk leopard‑esugnituq, itegii kayngem itegaatun ayuqelghiit, qaangha lion‑em qaanghatun ayuqelghii. Dragon‑em tuunaa teghikusalluuk aghtughyaghqaanghilleghmineng, umiilgusigmineng aqumutagneng, igleghutiyaghqaaghtestaallu ateni atuqluku.

Taagken teghikusalluuk akuziyaghqaaghtuq. Aangaayugteghllagtuq, seghlepestaatunllu akuzitkaa Kiyaghneq. Aghtughyaghqaanghillenguq igleghutiyaghqaaluni 42‑nun tanqinun.

Ataasiq naasqwa teghikusalluugem tuqutesugnitkaq kiitighluni, iwernga taana kiiyallgha maamegkaaftuq. Iingunaghhaghmeng nunam yugita saghiighayagulluku maligtaat teghikusalluuk.

Taagken esghaghaqa ilanga teghikusalluuk nunameng aanelghii. Maalghugegneng sighunelguftuq penniighaghaam sighunghatun, akuziiqlu dragon‑etun. Sivuliq teghikusalluuk tawanlluku tunglighhaan teghikusalluugem atuqaa qamaglluku aghtughyaghqaanghillgha. Taaggun aghtughyaghqaanghilleghqun maniguutestii qamaglluki nunam yugi sivulighmun teghikusalluugmun. (Kiiyallghan tuqutesugnitkaa, iwernga kiiyallgha maamegkaq.)