Galatians 5

Itemngalleq Christ‑akun

1Christ‑am whangkuta itemutkaqutanganeng, itemepiigumaakut. Enkaangam nekevghatek aghuliilkaalusi, qepghaghtelaaghughhneqigtegpenasi Liilightuusanun.

2Nagatek! Whanga, Paul, ungipaatamsi: circumcise‑estekufsi Liilightuusam pisqellghatun, taawa Christ‑am apeghiiqaa kayutkennaanghitaghsi. 3Alla kelengasaaghaqa tamaghhaan yuuk, circumcise‑estekumi taawa qaatkengngwaaghyaghqaqii qamaglluki Liilightuusat. 4Liilightuusatgun nallghusaghtesnaqutkegkufsi Kiyaghneghem elqughutngallghanun, aaflequsi elpesineng Christ‑ameng, unilleqaghsillu Kiyaghneghem nangllegtallgha. 5Agleghnalghiignekun Taghneghagnekun utaqangwaaghput sighimalleghput apeghiighesqelluku. Sighimalleghput taananguuq: Kiyaghneghmun nallghusiisqelluta elqughutngallghanun ugpeqellemteggun Christ‑a. 6Christ Jesus‑em pikngukanginkut, yuuk megnunanghituq circumcise‑ekaakumi nalighmeng circumcise‑ellghilkumi. Una esgha megnunalghii, ugpeqilleq Christ‑akun piniqistilghii yulgutemnneng.

7Sivunghani pinitungwaaq pinguyaghtusi. Kitum qaatkunnanightestisi ipapighqelleghmun? 8Kiyaghneghem tuqlughistegpesi pilqenghitaa. 9Neqamikluku, “Yeast‑angiighhaam ghhuughtesteghllagaqaa akuutaq.” 10Elpesillu whangallu pikutanganeng Atanghem, nalluneqsukenghitanka ugpeqnanifqiita apeghtuusanka elpesinun pisqelluki. Liisimakaqallu Kiyaghneghem aghyuughlleqaa seghleliighqilghii elpesineng, kinanguyaghngaan.

11Ugpeqaalgutemni, ungipaqingigatunga yuget circumcise‑esqelluki. Tawaten ungipaqinguyaquma Jews‑et amyuqetaatkennanighnayaghaatnga enkaam qaquuraa Christ‑am sugagniighutkennayanghitaat. 12Tamaakut seghleliighqilghiit elpesineng circumcise‑elleghmeng, ellngistuq circumcise‑estengnguluteng eunuch‑englallghiit ellmeggneng.

13Ugpeqaalgutemni, Kiyaghneghem tagsiqaqiisi itemngalleghmun Christ‑akun. Taawanginaq atuqegpenaan itemngalleghsi atughyaghqaaluki seghleghqengngalghiit piyukellghi yugusim. Itupill qepghaateki ilasi piniqelleghpesigun. 14Qayughllak qaatkelleqasi qamaglluki Liilightuusat qaatkegkufsigu una Liilightuusaq: “Piniqluku yulguten piniqelleghpetun elpeneng katam.” 15Iwernga elpesineng qaniqunnaqngukufsillu pillugunnaqngukufsillu ugighsalghiistun teghikusastun, kelengatek, qayughllak naafqutunnaqusi.

Kiyaghtek Agleghnalghiignekun Taghneghagnekun

16Whaten piimsi, kiyaghtek qaatkellukek Agleghnalghiik Taghneghak. Tawaten pikufsi atuqnaanghitasi seghleghqengngalghiit piyukellghi yugusim. 17Qayughllak seghleghqengngalghiit piyukellghi yugusim kipullegngaat Taghneghagnun, piyukellghi Taghnegham kipullegngaat piyukellghanun yugusim. Taakuk anguyakutuk enkaam atuqnaanghitasi piyukellesi. 18Taghnegham maghyaghquungukangisi taawa Liilightuusat atuqsaghqaananighasi.

19Yugusim seghleghqelleghtuqam piyukellghi nalluniitut. Ukunguut: alngunaseghaq, seghletun atuqutelleq, nuqesigalnguut alngunak atuqimun, 20maniiguutelleq kiyaghnengllaqanun, uyviiniqelleq, anguyiqelleq, pillugutelleq, qungyaqilleq, sakritelleq, ellnginaayugtelleq, aafqemeraalleq, qerngughpagtaatelleq, 21aqinalleq, suumelleq, qerngughulluteng aghsaghpaagtaqut seghletun pilleghmun, ilanganengllu seghleghqelleghneng. Kelengasaaghnaqlaataghamsi sivunghani pillemtun, tamaakut tawaten kiyaghlleghhiit ilatnganaanghitut quyasleghaneng Kiyaghneghem Ataneghpagullghan.

22Naqamenraq Agleghnalghiim Taghnegham piitestekii ukunguut: piniqelleq, quyamalleq, nekeggmelleq, nuqenneghtulleq, nangllegtalleq, pinilleq, ataasiighmetelleq, 23yakumangingitelleq, nuqetelleqlu. Taakut iinghutellghitut alngunak liilightuusani. 24Christ Jesus‑em pingita qaquuraatkaqiit seghleghqengngalghiit piyukellghit yugusimeng. 25Kiyaghtengngukumta Taghneghagnekun, qaatkeltekek Taghneghak. 26Qukaayugneghufqaamta, qinuyugtifqaamta, aqinakutefqaamta.

Currently Selected:

Galatians 5: ess

Highlight

Copy