Galatians 4

1Nagneghutaghllakun whaten, ighneq piliitiyaghqaq atami saghyanganeng qepghaghtelaaghestun kiyaghutkayuguuq mekestaaghhaaluni, qaywa ellngan piksaghngaagu sangwaa tamaghhaan atami pinga. 2Mekestaaghhaaluku yuget aflengakegkaqaat, sangwaatlu tamaakut ellngan pikaghqii kenlanga atangan piyaghqaaghhnillghanun. 3Whangkutallu tawatesaghtukut. Taghnughhaaluta qepghaghtelaaghuyaghtukut nunam igleghutistengitnun tughneghaghnun. 4Iwernga Kiyaghneghem nakmikegkaa aghneq kaasan kayagtekaa Ighneni, allgeqaq aghnakun. Ellngan qaatkegkaqii Liilightuusat 5itemunnaluta Liilightuusaneng, avaqutaliitesqellutallu Kiyaghneghmun. 6Elpesi avaqutaqutmineng Kiyaghneghem, Ighneghmi Taghneghakek kayagtekaqaak ilumnnun, qevullutek pikak, “Abba, Ata!” 7Enkaam Kiyaghneghqun qepghaghtelaaghunanightuten, avaqutaqaaten. Avaqutaqaaghtutmineng ellmi pini elpenun piliitesleqii.

Paul‑em Sumeghyalitkegkangi Galatia‑ghmiit

8Sivunghani nalluksaghaghsi Kiyaghneq, enkaam qepghaghtelaaghuyaghtusi kiyaghneghunghilngughnun. 9Iwernga maaten liisimakaghsi Kiyaghneq, nalighmeng ipapestaaq Kiyaghneghuuq liisimakistezi. Sangafsingam uteghsugetsi kayaalngughnun sasiinghilngughnun igleghutilghiinun tughneghaghnun? Sangan tamaakunun qepghaghtelaaghughhneqigsugetsi? 10Paninang qaatkaqasi apeghtughallghit aghneghnun, tanqinun, ayumiqulleghnun aghneghnunllu salqumsivikaqegkangitnun. 11Alingutkaqamsi, qamaglluni qepghaatilqa elpesinun sasiinghinnayukan.

12-13Ugpeqaalgutemni, tungsighvikamsi, whangamtun lliighesqeqaghllusi qayughllak whangallu elpesistun lliiqaagunga Gentile‑estun.

Sivunghani ungipaqitaqngamsi Pinilghiineng Ungipaneng seghletun pimangitaghpesinga. Neqamikaghsi tawani takukaqamsi qayughllak qinuyugulghiinga. 14Qaywa qinuyulleghma seghleliightesaghngaaghmisi ukavaghsimangitaghpesinga nalighmeng ighsakumangitaghpesinga. Yeghlegi, upughataghpesinga nikimqun Kiyaghneghem yaqulgatun, nalighmeng Christ Jesus‑etun. 15Naagu quyangalqesaqesi? Liisimakamsi piyaqleguyaqata iyesi nusugluki tagivaghnayaghasi. 16Enkaam anguyiitestengngaa qayughllak ungipaaskemsi ipapigmeng?

17Tamaakut yuget qaatkutesukangisi Jews‑et Liilightuusiitnun, piyukepigtiisi ellmeggnun malighqutaqesqellusi, iwernga apallaat pininghituq. Ellngita aaftesugiisi whangamneng, ellnginaghmeng maligtesqelluteng. 18Pinightuq yuget suumqegkumegteki yulguteteng, taawanginaghhaq apalliit piniqata. Quunpeng taana ipanguuq, aviisaghngaaghma. 19Taghnughhaghhamni, katam aghnam aqnighqellghatun ighniyulleghmini whangallu tawaten aqnighqutkenneqigtengngwaamsi kenlanga Christ‑atun lliilleghqaghpesinun. 20Whaatuq maaten elpesinilnguunga enkaam liisimaknayalghiinga naten aleghqughyaghqaalusi. Sumeghyalitkeghllawaamsi.

Usputaghqak Hagar‑enkuk Sarah‑nkuk

21Elpesi atuqiyulghiini Jews‑et Liilightuusiitneng, talwa liigikigatasi Liilightuusat sameng pisiitangi. 22Igaqngaaq Akuzitni Igaqegkani Abraham‑nguq maalghugegneng ighnelguuq, aallgha qepghaghtelaaghqun aghnakun, ilanga qepghatelaaghunghilngughqun aghnakun. 23Ighnegha qepghaghtelaaghqun allgeqaaguq yugestun kitutun alngunak. Iwernga ilanga ighneghan qepghaghtelaaghunghilngughqun allgeqaaguq qayughllak Kiyaghneghem akequsaqegkanga. 24Taakuk aghnak usputaaguk maalghugegnun akequsagkenun Kiyaghneghem. Qepghaghtelaaq Hagar akequsaatun Kiyaghneghem ayuquq Mount Sinai‑mi enkaam allgeqaagut qepghaghtelaaghqaaluteng. 25Hagar Mount Sinai‑nguluni ayuquq, Arabia‑melnguq. Aghneghmimllu Jerusalem‑ngatun ayuquq, qayughllak avaqutaqullghiit qepghaghtelaaghuut Liilightuusanun. 26Iwernga paamna Jerusalem qepghaghtelaaghituq, ellnga naakaghput. 27Akuzitet Igaqegkat pikaagut,

“Quyaghllagi, elpek qumingigalnguuten,

aqnighqigalnguuten ighniyulleghmeng.

Ugigpek uniteghngaaten,

araa quyaghllagem angtalanganeng qayughllak taghnughhaghtaaghasaghqaaguten aghnameng ugilegmeng.”

28Ugpeqaalgutemni, Isaac‑etun ayuqusi qayughllak avaqutaqiisi Kiyaghneghem apalluqluku akequsani Abraham‑emun. 29Tamaani aghneghni taana ighneq allgeqaq yugestun kitutun alngunak amyuqetaatkegkaqaa ighneq allgeqaq Taghnegham pillghakun. Paninang maaten tawatetuq. 30Iwernga Akuzitet Igaqegkat sameng piitgu? “Qepghaghtelaaq aghnaq, ighneghallu aghulaqestekek. Qayughllak qepghaghtelaaghem aghnam ighnegha nengighnaanghituq atami saghyanganeng maligulluni ighneghanun qepghaghtelaaghunghilnguum aghnam.” 31Ugpeqaalgutemni, whangkuta avaqutaqenghitiinkut qepghaghtelaaghem aghnam, iwernga avaqutaqiinkut qepghaghtelaaghunghilnguum aghnam.

Currently Selected:

Galatians 4: ess

Highlight

Copy