Acts 18

Paul Corinth‑ellghii

1Taam kingunganeng Paul Corinth‑etkaq Athens‑meng. 2Tamaani nallaqaa Jew aatgha Aquila, Pontus‑mi allgeqaq. Italy‑meng kaanneghhaaftuk nulighqullghiik Priscilla‑nkuk, qayughllak Umiilegpigaam Claudius‑em eflequqii Jews‑et Rome‑emeng. Paul‑em laalighfiklukek 3elkegkenitkaq qayughllak qepghaqaak ellngan qepghaqaatun ayuqelghii. Tiintangllallghem akinga kiyaghusiqegkangat. 4Sabbath‑a tamaghhaan Paul synagogue‑mun piluni ungipaghaqelghii Jews‑enunllu, Greek‑enunllu ugpeghesqelluki.

5Silas‑enkuk Timothy‑nkuk kaatkak Macedonia‑meng, taagken kenlekluku Paul ungipaqinginaghluni lliiqaq. Jews‑enun aapqaa Jesus, Christ‑anguniluku. 6Jews‑et kipullginaaghyatnillu seghletunllu akuzitkesatni, aatkami pagulangi ufsugulluki pikii, “Iflakufsi elpesi pilqaghsi, whanga pilqennaanghitaqa. Whaken kenlekluku Gentile‑enun ungipaqinaqunga.” 7Enkaam unilluki Jews‑et Titius Justus‑mun lliiqaq, Gentile‑mun maniguutkayugmun Kiyaghneghmun. Mangteghaa synagogue‑em saaghwanilnguq. 8Synagogue‑em igleghutistenga Crispus‑nguftuq. Qamaglluteng nengllugutkullghiit ugpeqegkaat Ataneq. Corinth‑eghmiilghutetlu nagalluku Paul ugpeghluteng paaptaayekat.

9Taagken unugmi ataasimi Paul esghaghwaalleghqun Atanghem pikaa, “Alingegpenang, yeghlegi ungipaqikestaa iilqayufqaavek 10qayughllak elpenitaqunga. Kitumun alngunak aqnightesnaanghitamken, qayughllak neghllagmi whani uglapiglleghhii yuuk whanga pikaqa.” 11Enkaam Paul tamaani apeghtughikaq Kiyaghneghem akuzitanganeng ataasiq ayumiqulleq alla aghvinlek tanqit ilalluki.

Jews‑et Paul Aglaaskangat Nanqigtivigmun

12Gallio, Rome‑em umiilgughtestaqngagu Greece‑mun, Jews‑et qerngughulluteng sughugluku Paul aglaatkaat nanqigtivigmun. 13Kaatulluku pikat, “Uum yugem apeghtughaqii yuget Kiyaghneq manigiisqelluku allanguluku Liilightuusamnneng!”

14Iiwenllu Paul akuzinaqaquq, Gallio‑m Jews‑et pikii, “Una yuuk tegleguqaayaqan, yugtaqaayaqan nalighmeng sangwaa alngunak seghlepestaaq pikaqsaqagu ilapgapestaaghnayaghamsi. 15Iwernga una yuuk tawaten pimangituq. Aaghtiiraaghutkengngunghitasi Rome‑em liilightuusii, aaghtiiraaghutkengngwaasi elpesi katam Liilightuusasi, akuzitetlu aatghetlu sameng pisiitangi. Tamaaken nanqigtiyaghqaanghitunga, elpesineng piteki.” 16Enkaam eflequqii aanesqelluki. 17Taagken yuget akuqaghluku synagogue‑em igleghutistenga Sosthenes, qevutiiqaat nanqigtivigem manughaani iwernga Gallio‑m avelghaqiinaqii.

Paul‑em Uteghnillgha Antioch‑mun

18Taam kingunganeng Paul paninang ugpeqanitkaq qafsinegllak aghneq Corinth‑mi. Taagken angyaghpagkun aghulaqegkaq Syria‑mun kelqellukek Priscilla‑nkuk Aquila‑nkuk. Kaasameng Cenchrea‑mun Paul qiguqaq liigikesqelluku akequsani Kiyaghneghmun apeghiillgha. 19Kaalluteng Ephesus‑mun, tamaani Paul‑em unitkakek Priscilla‑nkuk Aquila‑nkuk, synagogue‑elluni liigikesnaqutkegkaa Jews‑enun Jesus, Christ‑anguniluku. 20Ellmeggnitaghiisqegkaqsaqangat iwernga pipagningitkaq. 21Enkaam aghulaqnaqngami pikii, “Kiyaghneghem piyukelqegkagu alla tagillequnga.” Taagken Ephesus‑meng angyaghpagkun aghulaqegkaq.

22Kaalluni Caesarea‑mun nagneqaq Jerusalem‑emun laalighfiknaluki ugpeqat, taagken Antioch‑etkaq. 23Tamaantaghlluni aghulaqegkaq. Igleghutkelluku Galatia‑kunllu Phrygia‑kunllu, qamaglluki ugpeqat kayemumiita pikii.

Apollos Ungipaqilghii Ephesus‑millu Corinth‑millu

24Paul tawaten aneghsimaluku Apollos, Ephesus‑mun kaatkaq. Jew‑ngulghii allgeqaq Alexandria‑mi. Elngaatall akuzillegllaklu liiteghllakaqlu Akuzitneng Igaqegkaneng. 25Salin Alexandria‑melluku kitum apeghtuqaqegkanga Atanghem tumanganeng. Enkaam sagiqepiglluni akuzitkengngukangallu apeghtuusaqngukangallu elqughaghlluku Jesus, apeghtuusiillu. Naqam liisimakegkanga paaptaayelleq John‑em apeghtuutellghiinaatun ayuqelghii. 26Ephesus‑mi Apollos synagogue‑elluni tetugpenani ungipaqikaq. Priscilla‑nkuk Aquila‑nkuk nagalluku aqelqangllaqaak liigikestaghaghnaluku Kiyaghneghem tumanganeng, wataqaaghaq elqughaghlluku. 27Apollos Greece‑mun piyugyan, ugpeqat kayemegkaat enkaam latakat Greece‑eghmiit ugpeqiitnun upughatesqelluku. Taakut Greece‑eghmiit ugpeqegkaqegkangat Jesus Kiyaghneghem kayusillghakun. Apollos‑em kaalluni elngaatall iknaqughsaqaqegkangi ugpellghit apeghtughilleghmikun. 28Yugtuqami aaghtiiraaghllakii Jews‑et, Akuzitet Igaqegkat ipapighqusiqluki Jesus, Christ‑anguniluku.

Currently Selected:

Acts 18: ess

Highlight

Copy