1 Thessalonians 2

Paul‑em Qepghallgha Thessalonica‑mi

1Ugpeqaalgutemnni, liisimakaghsi elpesinun pilleghput temngingunghitkaaguq. 2Iwernga sivunghani elpesinun pillemta, liisimakaghsi Philippi‑mi ikfiqliightestekaqiinkutlu seghlequuqaqiinkutlu. Tamaanlluta qaywa uglalghiim yugem aghuliighhnaqutkeghngiinkut Kiyaghneghem ilutustekaqiinkut, enkaam ungipaasaghtughamsi Pinilghiineng Ungipaaneng Kiyaghneghem. 3Ungipaqilleghput ipanguuq. Iqlengiqngunghitukut elpesinun, seghleghmeng piyukegkiitukut elpesinun, puughhnaqutkigatamsi. 4Yeghlegi, ungipaqaqaput Pinilghiit Ungipat qayughllak Kiyaghneghem itagnaqluta neghyukutkaqii whangkunnun. Akuzillemteggun efqughhnaqutkengngunghitaput yuget, iwernga efqughsukaghput Kiyaghneghuuq, nanqigtingalghii ilumta sumeghtaghallghaneng. 5Liisimakaghsi usuquughsaghtuunghitamsi nalighmeng sakengviksaghtuunghitamsi. Kiyaghneq liisimakistekaghput. 6Usuqesaayugtengngunghitukut yugneng, elpesineng, nalighmeng kinkuneng. 7Apostle‑ngutemnneng Christ‑amun, tungsighniighviksaghqaqsaghamsi sameng alngunak. Iwernga elpesinilluta yakumangilliqutkumangitamsi, yeghlegi mamaghtikayugestun naastun aflengakilghiistun taghnughhaghmeggneng ayuqegkaagukut. 8Piniqepigtamsi, enkaam quyakusiqinaghluku elpesinun liisimakesugaput Kiyaghneghem Pinilghiit Ungipii. Pinilghiinginaat Ungipat pigpenaki, quyakusiqinaghluku sameng tamaghhaaneng kayusighyuglusi ayuqamsi, qayughllak piniqsaliitkaqamsi. 9Ugpeqaalgutemnni, neqamikaghsi naten angkaan qepghalleghputlu ughleghiilleghputlu! Qepghaqaagukut unugtuumaan, aghneghtuumaan qayughllak elpesinun uqigtuqutnguyunghilnguukut; elpesinisimaluta ungipaqikaagukut Pinilghiineng Ungipaaneng Kiyaghneghem.

10Elpesillu Kiyaghneqlu liisimakistekamsi. Elpesini ugpeqani kiyaghtekaagukut pelungilluta, ipapighqelluta, anaggutellngunaamta. 11-12Liisimakaghsi katam atam aflengakillghatun taghnughhaghmineng, whangkutallu tamaghhaghpesi tawaten katam aflengakegkaqamsi. Kayemegkaqamsi, ilutughsaqaqamsi, qelghutaataqaqaghput elpesinun atuqesqelluku kiyaghtaalleq efqughnalghii Kiyaghneghmi. Tuqluungwiisi ilatesqellusi ellmi katam Ataneghpagulleghminunllu pinighnalleghllagminunllu.

13Iqamsiqayugvikumanginaangwaaghputlu Kiyaghneq una apalluqluku: whangkunneng nagaqughluku tuguklighaghsi Kiyaghneghem ungipaa. Elpesi tuguklighaghsi Kiyaghneghmeng ungipaaluku, nakaan yugneng ungipaaluku. Taananguuq Kiyaghneghem ungipaghpigaa qepghalghii elpesini ugpeqilghiini. 14Ugpeqaalgutemnni, elpesi tawatetusi ugpeqistengistun Christ Jesus‑em qerngughutkayuget yughaghvigitni Kiyaghneghem Judea‑mi. Nunalgutegpesi ikfiqestekaqiisi katam Jews‑et ikfiqestellghistun ugpeqat Judea‑mi. 15Jews‑nguut tuqutikat Ataneghmeng Jesus‑meng, uuknaliqistenengllu, amyuqetaatkegkaqiinkutlu. Efqughhneghitaat Kiyaghneq, kipullginaaghuutlu tamaghhaanun yugnun 16aghuliighhnaqutkelleghmegteggun ungipaqilleghput Gentile‑enun yugulillengnayukata. Tawaten pilleghmegteggun ilamanginaghiit seghleghqelleteng enkaam qenwatlu Kiyaghneghem ugumiyaguteghllagluki qantaghaqun aghyuughlleqii.

Paul‑em Laalighfikenqigsukangi Thessalonica‑ghmiit

17Ugpeqaalgutemnni, amyuqetaatkistemta aghulaqestaqngamikut Thessalonica‑meng, pellghututestaghtiinkut, iwernga paninang sumeghmikaqamsi. Esghaghyupigtaqsaghamsi gginasaghqughlusi 18enkaam takunaqutkaqsaghamsi. Whanga, Paul, takunaqutkaataghaqsaghamsi iwernga Tughneghaam amigighaghtaqiinkut. 19Elpesi sighimalqamsi, quyasiqamsi, qaghpakamsillu. Taana qaghpa whangkuta qukaayugusiqelleqaghput manungani Atanemta Jesus‑em tagikan. 20Ipapestaaq elpesi qukaayugusiqamsillu quyasiqamsillu!

Currently Selected:

1 Thessalonians 2: ess

Highlight

Copy