Romanos 8

Dachi Akõre Jaurid̶e nibad̶ai ʉ̃rʉbena

1Jãabae Dachi Akõreba ne ab̶a bid̶a nebʉra barau awẽma, dachi Cristo Jesús ome panuud̶eeba.#8:1 Griego bed̶ead̶e chi b̶ee kartad̶e nau sid̶a b̶ʉ kub̶uu: ãchi nau kakuaba kachirua wau kʉ̃ria b̶uud̶eeba nibad̶aabasiid̶eeba, maumaarã Dachi Akõre Jaurid̶eeba nibasiid̶eeba. 2Cristod̶eeba Dachi Akõre Jauriba dachimaa chi chokae b̶uai chiwid̶i deasiid̶eeba, dachi kachiruad̶ebena maud̶e biud̶ai bad̶ad̶ebena enakuasii. 3Moisesba b̶ʉd̶aba dachi kachiruad̶ebena poyaa enabiaibasii. Chi nau kakuaba wau kʉ̃ria b̶uud̶eeba nibabadaurãba mau Moisesba b̶ʉd̶a waud̶ai bad̶amaarã kachirua waubadau. Maamina Dachi Akõreba ichi Warr bʉisii dachi chi kachiruarã kĩra b̶uamera. Maud̶e dachiba kachirua wauped̶aad̶a kakua biusii. Maka chi dachi kakua kachirua wauped̶aad̶a Dachi Akõreba kastikasii. 4Ichiba maka wausii dachiba poyaa jipa waud̶amera Moisesba b̶ʉd̶ad̶e jara b̶uu kĩra. Jãabae dachi poyaa jipa nibad̶ai nau kakuaba wau kʉ̃ria b̶uud̶e nibad̶akaud̶eeba, maumaarã Dachi Akõre Jaurid̶eeba nibabadaud̶eeba.

5Chi nau kakuaba wau kʉ̃ria b̶uud̶eeba nibabadaurãba ara mau kĩra kʉ̃risiabadau. Maamina chi Dachi Akõre Jaurid̶eeba nibabadaurãba Dachi Akõre Jauriba kʉ̃ria b̶uu kʉ̃risiabadau. 6Ab̶auba chi nau kakuaba wau kʉ̃ria b̶uu kʉ̃risia b̶uaruubʉrã biui. Maamina chi Dachi Akõre Jauriba kʉ̃ria b̶uu kʉ̃risia b̶uaruubʉrã jirukaraayuwãe b̶uai maud̶e Dachi Akõre ome chokae b̶uai. 7Ab̶auba chi nau kakuaba wau kʉ̃ria b̶uu kʉ̃risia b̶uaruubʉrã, Dachi Akõre kĩramaabʉ. Moisesba b̶ʉd̶a wau kʉ̃riakau; ne ab̶a bid̶a poyaa waukau. 8Chi nau kakuaba wau kʉ̃ria b̶uud̶eeba nibabadaurã Dachi Akõreba biꞌia unukau.

9Maamina Dachi Akõre Jauri biawãra machi sõd̶e b̶uubʉrã, ichid̶eeba nibabadau. Nau kakuaba wau kʉ̃ria b̶uud̶eeba nibad̶aabai. Biawãra chi Cristo Jauri wãꞌãe nii, Cristod̶ewãema. 10Maamina Cristo machi sõd̶e b̶uubʉrã, machi jauri chokae b̶uu Dachi Akõreba machi nebʉraswãe nuree a b̶uud̶eeba. Machiba kachirua wau panad̶a kakua nau kakuad̶e biud̶ai. 11Maamina ichi Jauri machi sõd̶e b̶uud̶eeba, ichid̶eeba machi chi kakua biui b̶uu chokae jiradubii, Cristo Jesús chokae jiradubid̶a kĩra.

12Maud̶eeba ãbarã, dachi biawãra Dachi Akõre Jaurid̶eeba nibad̶ai panuu. Nau kakuaba wau kʉ̃ria b̶uud̶eeba nibad̶aabai panuu. 13Machi nau kakuaba wau kʉ̃ria b̶uud̶eeba nibaaduubʉrã biud̶ai. Maamina chi nau kakuaba kachirua wau kʉ̃ria b̶uu Dachi Akõre Jaurid̶eeba ida b̶uuduubʉrã, Dachi Akõre ome chokae panad̶ai. 14Joma Dachi Akõre Jaurid̶eeba nibabadaurã Dachi Akõre warrarãbʉ. 15Machiba Dachi Akõre Jauri adausid̶aud̶e machi wapeabiabasii, chi chibari baita bari trajabarii makabarii kĩra. Maumaarã machi duanusii Dachi Akõre warrarã bad̶amera maud̶e «Chacha» ad̶amera. 16Dachi sõd̶e Dachi Akõre Jauriba kuitaabia b̶uu biawãra Dachi Akõre warrarã. 17Ichi warrarãd̶eeba dachirã maud̶e Cristo baarauba ichiba uru b̶uud̶ebena adaud̶ai. Biawãra Cristo biꞌiwãe uru panad̶a kĩra dachi ãrea biꞌiwãe panuubʉrã, Dachi Akõreba Cristo baara ãbua ãrea biꞌia duanui.

Dachi Akõreba chiwid̶i waukuai b̶uu esed̶au panuu

18Mʉʉmaarã, chi nau id̶ibaebena dachi ãrea biꞌiwãe panuu b̶aꞌãra b̶uu, chi kaad̶ebena ewarid̶e Dachi Akõreba dachi biꞌia duanui audeara. 19Joma Dachi Akõreba waukuad̶aba esed̶au b̶uu ichi warrarã biꞌia paneeduu isa unubimera, 20naed̶e biꞌiwãe b̶uasiid̶eeba. Du ab̶a maka biꞌiwãe b̶eebasii, maumaarã Dachi Akõreba maka b̶eebisii. Maamina joma biꞌiwãe b̶eed̶aba esed̶au b̶uu 21Dachi Akõreba mau biꞌia b̶umera ichi warrarã biꞌia b̶ui kĩra. Chi chibari baita bari trajabarii ena b̶uu kĩra, chi Dachi Akõreba waud̶a makaa b̶eraabai.

22Dachiba kuitaa panuu wẽraba warr adauruud̶e isa adaubai kʉ̃riabarii kĩra, joma Dachi Akõreba waukuad̶aba puꞌuaba isa biꞌia b̶uai kʉ̃ria b̶uu. 23Maud̶e dachia bid̶a puꞌuaba isa neebii esed̶au panuu, Dachi Akõreba dachi chi kakua biꞌia b̶umera. Ichi warrarã adauruud̶e maka waui. Ichi Jauri dachimaa naed̶e deasii biawãra dachi ichi warrarã kuitaad̶amera. 24Dachi Akõreba dachi karibasiid̶eeba mau esed̶au panuu. Chi dachiba esed̶au panuu wabid̶a wãꞌãe panuu. Uru panad̶a basirã ¿sakãe esed̶au panad̶ai basma? ¿Kaiba ichiba chi uru b̶uu, adaui baita esed̶au b̶uaima? 25Maamina chi dachiba esed̶au panuu wabid̶a wãꞌãe panuud̶eeba joma dauchia jãadua panuud̶eeba kuitaa panuu biawãra adaud̶ai.

26Mau awara ara dachi du ab̶a poyaara panuud̶eeba Dachi Akõre Jauriba aid̶a b̶uu. Biawãra adua panuu saka Dachi Akõremaa arakʉd̶e ʉtaa id̶id̶ai. Maamina Dachi Akõre Jauriba chi bed̶ea dachiba poyaa berread̶akaud̶eeba dachi kakua Dachi Akõremaa ʉtaa id̶ibarii. 27Maud̶e Dachi Akõre dachi sõ ichiabariiba ichi Jauriba ʉtaa id̶i b̶uu kuitaa b̶uu, ichiba kʉ̃ria b̶uu kĩra ichid̶irã baita ʉtaa id̶ibariid̶eeba.

Dachi Akõreba ne jomad̶e aid̶abarii

28Mau awara Dachi Akõreba kʉ̃risia b̶uad̶a kĩra chi ichi kʉ̃riabadau ichiba iukuasii. Dachiba kuitaa panuu maarã baita Dachi Akõreba ne jomad̶e biꞌia waubarii. 29Mau maka b̶uu ichiba naed̶e kuitaa b̶uasiid̶eeba kairã ichid̶irã bai. Ãchi b̶usii ichi Warr Jesús kĩra nuread̶amera. Maka ichi Warr ãbarã ãrea panuud̶ebena, mau chi nabenabʉ. 30Dachi Akõreba chi ichiba naed̶e duanud̶arã iukuasii, ichi Warr Jesús kĩra nuread̶amera. Chi ichiba iukuad̶a chi ichid̶irã jipa nuree baara b̶usii. Chi ichiba chi ichid̶irã jipa nuree baara duanud̶arãmaa ichi biꞌia niid̶ebena deai.

31¿Mau ʉ̃rʉbena saka kʉ̃risiad̶ai panuma? Dachi Akõre dachi baara b̶uud̶eeba ¿kaiba dachi poyaaima? 32Biawãra Dachi Akõreba ichi Warr wãakaabasii maumaarã joma dachi kakua ida beabisii. Maud̶eeba ¿ichiba dachimaa joma biꞌia Cristo ome ãbua deabaika? 33¿Kaiba Dachi Akõremaa ichiba jʉrʉ adaud̶arã ʉ̃rʉbena poyaa kachirua jaraima? Ara Dachi Akõreba dachi chi ichid̶irã jipa nuree baara duanubarii. 34¿Kaiba dachi nebʉra bara panuu ad̶aima? Ab̶au bid̶a maka jaraabai Jesucristo dachi kakua biusiid̶eeba. Ichi biu b̶uad̶a chokae jiradusii. Jãabae Dachi Akõre jua biare b̶uu. Aria dachi baita Dachi Akõremaa chi chuburia id̶i b̶uu. 35¿Kaiba dachi Cristoba kʉ̃ria b̶uud̶ebena poyaa ãyaa b̶uima? Ewari chaarea neeruud̶e, ãrea biꞌiwãe panuud̶e, ẽbẽrarãba dachi kachirua wauduud̶e, jarrbisia ewarid̶e, paruswãe panuud̶e, kachiruad̶e panuud̶e, ẽbẽrarãba bea kʉ̃ria panuud̶e ab̶au bid̶a dachi Cristoba kʉ̃riad̶ebena poyaa ãyaa duanud̶aabai. 36Dachi Akõre bed̶ead̶e naka b̶ʉ kub̶uu:

«Ewaricha bichi kakua dai bea kʉ̃ria panuu. Oeja beabadau kĩra bead̶ai kʉ̃risia panuu».#Salmos 44:22.

37Maamina Cristoba dachi kʉ̃ria b̶uu. Ichid̶eeba joma mau dachiba poyaabadau. 38-39Maud̶eeba mʉʉba kuitaa b̶uu dachi biuduubʉrã maebʉrã chokae panuubʉrã, Dachi Akõreba dachi kʉ̃riad̶ebena awara panad̶aabai. Nau ewarid̶e maud̶e kaad̶ebena ewarid̶e awara panad̶aabai. Maud̶e angelerãba, jai kachiruarãba, chi jai kachirua mechiurãba, chi ʉtʉbenarãba, chi ekarebenarãba, maebʉrã ab̶a bid̶a Dachi Akõreba waud̶ad̶ebena bid̶a dachi ichiba kʉ̃riad̶ebena poyaa ãyaa duanud̶aabai.#8:38-39 Jai kachiruarã. Griego bed̶ead̶e naka b̶ʉ kub̶uu: chi mechiurãba, joma poyaa nureerãba. Ara mau kʉ̃ria, Dachi Mechiu Jesucristod̶eeba unubiasii.

Currently Selected:

Romanos 8: cmi

Highlight

Compare

Copy