Romanos 5

Jesusd̶eeba Dachi Akõre ome sõbia panuu

1Dachi Mechiu Jesucristod̶e ijãa panuud̶eeba Dachi Akõreba dachi chi ichid̶irã jipa nuree baara duanubarii. Maud̶eeba Cristod̶eeba Dachi Akõre ome sõbia panuu. 2Mau awara Jesucristod̶e ijãa panuud̶eeba Dachi Akõreba ichi sõbiad̶eeba dachi ewaricha aid̶abarii. Maud̶e kĩrajʉʉ panuu kuitaa panuud̶eeba Dachi Akõre biad̶ebena adaud̶ai. 3Mau awara dachi ãrea biꞌiwãe panuud̶e kĩrajʉʉ panabadau, kuitaa panuud̶eeba mauba dauchia jãaduad̶ai kuitaad̶ai. 4Mau dauchia jãadua panuud̶eeba kuitaa panuu Dachi Akõreba dachi biꞌia unu b̶uu. Maud̶eeba kuitaa panuu Dachi Akõre biad̶ebena adaud̶ai. 5Mau setawãema, maumaarã biawãra adaud̶ai. Maka kuitaa panuu Dachi Akõreba ichi Jauri dachimaa deasiid̶eeba. Ichi Jaurid̶eeba dachi sõd̶e kuitaabia b̶uu dachi biawãra ãrea kʉ̃ria b̶uu.

6Dachiba ara dachi kachiruad̶ebena poyaa karibad̶awẽa panasid̶aud̶e ewari araa baaruud̶e Cristo dachi chi kachiruarã kakua biusii. 7Ẽbẽra b̶aꞌãra bid̶a wãꞌãe ab̶a jipa nii kakua ara ichi beabii. Maamina ẽbẽra biꞌia nii kakua ¿ab̶auba ara ichi beabii b̶ubaaka? 8Maamina Dachi Akõreba dachi ãrea kʉ̃ria b̶uu unubiasii wabid̶a kachiruad̶e panuud̶e Cristo dachi kakua biusiid̶eeba. 9Cristo oa chesiid̶eeba Dachi Akõreba dachi chi ichid̶irã jipa nuree baara duanusii. Maud̶eeba Cristod̶eeba Dachi Akõreba dachi kastikai bad̶a biawãra karibai. 10Dachi wabid̶a Dachi Akõre ome chi kĩramaa nureasiid̶e ichi Warr biusiid̶eeba dachi ichi ome biꞌia b̶usii. Cristo chokae b̶uud̶eeba, maka dachi biawãra karibai. 11Mau awara Dachi Mechiu Jesucristod̶eeba Dachi Akõre ome biꞌia nureed̶eeba ichid̶eeba Dachi Akõre ome sõbia panuu.

Adán maud̶e Cristo

12Ẽbẽra ab̶ad̶eeba kachirua nau iujãad̶e neesii. Maud̶e mau kachiruad̶eeba dachi biud̶ai neesii. Jomaurãba kachirua waubadaud̶eeba biubadau. 13Dachi Akõreba ichi bed̶ea Moisesmaa b̶ʉbii naed̶e, ẽbẽrarãba nau iujãad̶e kachirua waubachid̶au. Maamina mau Moisesba b̶ʉd̶a wãꞌãe basiid̶eeba, mauba jarawẽa b̶uu ẽbẽrarãba kachirua wau panuu kakua, nebʉra bara nuree aabasii. 14Maka b̶umina Adán ewarid̶eed̶ebena ab̶a Moisés ewarid̶aa ẽbẽrarã biubachid̶au kachirua waubachid̶aud̶eeba. Adanba Dachi Akõreba ichimaa jarad̶a ijãabasii, maamina ãchiba Adán kĩra maka kachirua waud̶aabasii.

Adán kakua, joma kachirua paneed̶a kĩra, chi neei b̶uu a panad̶a kakua joma poyaa biꞌia paneesid̶au.#5:14 Griego bed̶ead̶e naka b̶ʉ kub̶uu: Adán chi neei b̶uad̶a kĩra b̶uasii. 15Biawãra ẽbẽra ara ab̶aba kachirua waud̶a kakua joma biusid̶au. Maamina ẽbẽra june ab̶ad̶eeba Dachi Akõreba ichi sõbiad̶eeba chokae b̶uai bari deasii joma chokae nuread̶amera.#5:15 Joma. Griego bed̶ead̶e naka b̶ʉ kub̶uu: ãrea. Jesucristoba ichi sõbiad̶eeba dachi baita waud̶a, chi Adanba kachirua waud̶a audeara bibuara b̶uu. Maud̶eeba chi Dachi Akõreba bari dea b̶uu, Adanba kachirua waud̶a kakua need̶a kĩra b̶uwãema. 16Mau awara Adanba kachirua waud̶a kakua, Dachi Akõreba ẽbẽrarã ichiaped̶a joma nebʉra bara nuree asii. Maamina ẽbẽrarãba kachirua ãrea waubachid̶amina Dachi Akõreba ichi sõbiad̶eeba maarã chi ichid̶irã jipa nuree baara duanubarii. 17Biawãra ẽbẽra ab̶aba kachirua waud̶a kakua joma biubadau. Maamina june ẽbẽrad̶eeba, mau kãyabãra ewaricha ichi ome chi reyrã kĩra panad̶ai. Mau Jesucristod̶eeba Dachi Akõreba ne ab̶a bid̶a deábad̶e awẽa, ichi sõbiad̶eeba ãrea karibaped̶a, ẽbẽrarã nebʉraswãe nuree a jarabarii.

18Maka ẽbẽra ab̶aba kachirua waud̶a kakua Dachi Akõreba ichiaped̶a joma nebʉra bara panuu asii. Maud̶e ẽbẽra ab̶aba jipa waud̶a kakua Dachi Akõreba joma poyaa chi ichid̶irã jipa nuree baara b̶ui ewaricha ichi ome chokae panad̶amera. 19Biawãra ẽbẽra ab̶aba Dachi Akõreba jarad̶a waubasiid̶eeba ẽbẽrarã ãrea kachirua waubadaurã paneesid̶au. Maud̶e ẽbẽra ab̶aba ichiba jarad̶a joma wausiid̶eeba ẽbẽrarã ãrea Dachi Akõreba jipa nuree a jarai.

20Dachi Akõreba Moisesmaa b̶ʉbisii, ẽbẽrarãba kuitaad̶amera ãchiba kachirua ãrea waubadau. Maamina ẽbẽrarãba kachirua ãrea wausid̶aud̶e Dachi Akõreba ichi sõbiad̶eeba ãrea kĩra chuburiasii. 21Biawãra ẽbẽrarãba kachirua waubadaud̶eeba biubadau. Maamina Dachi Akõreba ichi sõbiad̶eeba ẽbẽrarã chi ichid̶irã jipa nuree baara duanubarii Dachi Mechiu Jesucristod̶eeba ewaricha ichi ome chokae panad̶amera.

Currently Selected:

Romanos 5: cmi

Highlight

Compare

Copy