Filemón 1

Pabloba nau kartad̶e naa b̶ʉd̶a

1Mʉ Pablobʉ. Jesucristo kakua jʉ̃a b̶uu. Dachi ãba Timoteo nama b̶uu. Ãba Filemón, daiba bichi kʉ̃ria panuu. Bichiba dai kĩra Dachi Akõre traju wau b̶uud̶eeba mʉʉba nau karta bichi baita b̶ʉʉruu. 2Maud̶e b̶ʉʉruu joma ãbarã bichi ded̶e araa ãbua imibadaurã baita, dachi neekau Apia baita maud̶e dachi ãba Arquipo baita. Arquipo dai ome arab̶aud̶e Dachi Akõre traju wau b̶uabarii kokoroa kĩra. 3Mʉʉba kʉ̃ria b̶uu Dachi Bajãad̶ebena Akõreba#3 Dachi Bajãad̶ebena Akõreba. Kajuma bed̶ead̶e b̶ʉ kub̶uu: Dios el Padre. maud̶e Dachi Mechiu Jesucristoba ãchi sõbiad̶eeba machi aid̶a panad̶amera maud̶e jirukaraayuwãe panabid̶amera.

Ãba Onésimo baita Pabloba chi chuburia id̶id̶a

4Mʉʉba Dachi Akõremaa ʉtaa id̶iiruucha bichi baita ichíturu kid̶ibai abarii. 5Mʉʉba ũrisii bichiba Dachi Mechiu Jesusd̶e ijãa b̶uu maud̶e joma ẽbẽrarã Dachi Akõred̶erã kʉ̃ria b̶uu. 6Mʉʉba Dachi Akõremaa ʉtaa id̶i b̶uu Cristod̶e ijãabadaurã ome bichi ãrea biꞌia b̶uamera.#6 Cristod̶e ijãabadaurã ome bichi ãrea biꞌia b̶uamera. Waabenarãmaarã, mau jara b̶uu «Cristod̶e ijãa b̶uud̶eeba bichi ichi ẽbẽrarã ome ãrea biꞌia b̶uamera». Maka joma ne bia dachiba Jesucristod̶eeba uru panuu bichiba ãrea kuitaai. 7Ãba, bichiba ẽbẽrarã Dachi Akõred̶erã kʉ̃ria b̶uud̶eeba kĩrajʉʉbiasii. Makaburu mʉ sid̶a#7 Mʉ sid̶a. Chi b̶ee kartad̶e b̶ʉ kub̶uu: dai sid̶a. kĩrajʉʉ nibabisii maud̶e ãrea dauchia jãadua sõbia nibabisii.

8Mau baita bichimaa id̶iiruu mʉʉba jaraaruu waumera. Cristod̶eeba mʉʉba bichimaa poyaa waubii b̶umina mʉʉba waubiibai. 9Maumaarã mʉʉba chi chuburia id̶iiruu bichi kʉ̃riad̶eeba maka waumera. Mʉ Pablo, chõra maud̶e jãabae Jesucristo kakua jʉ̃a b̶uuba, 10chi chuburia id̶i b̶uu chi bichi baita bari trajabarii Onésimo baita. Mau mʉ warr kĩra nii. Mʉ nama jʉ̃a b̶uud̶e mauba mʉʉd̶eeba Cristod̶e ijãasiid̶eeba mʉ warr kĩra b̶eesii. 11Naa mau bichi baita biꞌia trajaka bad̶a, maamina id̶ibae chi mau b̶ari trajabarii bia b̶eesii. Maka ichiba bichi baita biꞌia trajai maud̶e mʉ biꞌia aid̶ai.

12Mau bichimaa waya bʉiruu. Mʉʉba mau ãrea kʉ̃ria b̶uu. Michuburia mau biꞌia irsibise mʉ irsibiiruu kĩra.#12 Griego bed̶ead̶e mau chaarea b̶uu biꞌia ũrid̶amera. 13Chi Cristo bed̶ea bia kakua mʉ jʉ̃a b̶uud̶e mau mʉ ome uru b̶uai kʉ̃ria b̶uasii, joma bichiba mʉ baita jamaria poyaa waubai b̶uu waumera. 14Maamina bichiba wáubad̶e awẽed̶e maka waui kʉ̃riabasii. Mʉʉba chi chuburia id̶i b̶uu bichimaa makai kʉ̃riawẽed̶e waubiibai, maumaarã kʉ̃ria b̶uu bichiaburu maka wau kʉ̃ria b̶uai.

15Chi bichi baita bari trajabarii Onésimo bichi ome b̶uad̶a awawarrea miru wãsii. ¿Maud̶eeba maka wãsẽeka, mau waya neeruud̶e bichiba ewaricha uru b̶uamera? 16Maamina mau bichi baita bari trajabarii kĩra uru b̶uabai b̶uu, maumaarã mau kãyabãra aude biꞌia uru b̶uai b̶uu. Cristod̶eeba bichi ãba baerã kʉ̃riad̶eeba uru b̶uai b̶uu. Mʉʉba mau ãrea kʉ̃ria b̶uu, maamina mau kãyabãra bichiba mau biꞌia kʉ̃riai b̶uu, bichi baita bari trajabariid̶eeba maud̶e Dachi Mechiud̶eeba bichi ãbad̶eeba.

17Bichimaarã, Dachi Akõre baita dachiba arab̶aud̶e wau panuubʉrã, Onésimo biꞌia irsibise mʉ bichi deed̶aa urúbad̶e aaruu kĩra. 18Mauba barikia bichi kachirua wausiibʉrã maebʉrã chi nejarra deai b̶uubʉrã, jarase mʉʉba bichimaa sãabe deai. 19Ara mʉ juaba naka b̶ʉʉruu: mʉʉba mau deai b̶uu deai. ¡Kĩrabase mʉʉd̶ebena Cristod̶e ijãasiid̶eeba bichiba mʉʉmaa deai uru b̶uu! 20Ãba, Dachi Mechiu kakua mʉʉba chi chuburia id̶i b̶uu wause. Dachi Cristod̶e ãbarãd̶eeba mʉ sõ kĩrajʉʉbise.

21Mʉʉba maka b̶ʉʉruu kuitaa b̶uud̶eeba bichiba mʉ bed̶ea ijãai. Kuitaa b̶uu mʉʉba jara b̶uu bichiba aude biꞌia waui. 22Mau awara mʉʉba kʉ̃risia b̶uu machiba Dachi Akõremaa ʉtaa id̶i panuud̶eeba mʉ wãi. Maka mʉ machimaa poyaa wãi. Maud̶eeba mʉ kãi b̶eei baita bid̶a uru b̶uase.

Pabloba nau kartad̶e aanama b̶ʉd̶a

23Ãba Epafras Jesucristo kakua mʉ ome jʉ̃a uru panuu. Mauba jarabʉi b̶uu bichi biꞌia b̶uai. 24Marcosba, Aristarcoba, Demasba maud̶e Lucasba jarabʉi panuu bichi biꞌia b̶uai. Maarãba mʉ ome Dachi Akõre traju wau panuu.

25Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai.#25 Machi. Griego bed̶ead̶e naka b̶ʉ kub̶uu: machi jauri.

Currently Selected:

Filemón 1: cmi

Highlight

Copy

Compare